Read dhopadhola Menyirok ri Yohana 6 Bible Online

Menyirok ri Yohana 6 - dhopadhola bible

Menyirok ri Yohana 6

¹Gikenyo aneno Nyathi rombo munyo halo woko acel kwoŋ gimwono papila abirio t'awinjo acel kwoŋ cwec aŋwen ca waco i dwonde ma cale lithkoth ma mwoc ni, “Biye!”

²Aŋiyo aka ruwaŋan kenyo oyido nitie kayina matar. Ŋat'obedo wi kayina no otiŋo asere, aka omiy go sangaria. Go okadho paka jaloy lweny woloyi lweny kicutho.

³Gikenyo Nyathi rombo ohalo woko gimwono papila mar'ario; aka awinjo cwec mar'ario waco ni, “Biye!”

⁴Kayina man owok, m'obokere, ŋat'obedo wiye omiy meni ma kwanyo woko siem i piny, nike ji jowonekere, ato omiy go abor mapando swa.

⁵Gikenyo Nyathi rombo ohalo woko gimwono papila mar'adek, aka awinjo cwec mar'adek waco ni, “Biye!” Aŋiyo, t'aneno kayina macol; ŋat'obedo wiye otiŋo rapor i cinge ma kipima cemo.

⁶Awinjo gim'ocale pa dwondi nyatoro m'owok i dier cwec aŋwen no ka waco ni, “Rapor ma romo kikopo mathin ma ŋano wotana welo ma siringi gana acel, aka rapor ma romo kikopere adek ma bel wotana welo ma siringi gana acel. Aka ikir'inyeki mo kodi vini!”

⁷Gikenyo Nyathi rombo ohalo woko gimwono papila mar'aŋwen t'awinjo cwec mar'aŋwen waco ni, “Biye!”

⁸Aŋiyo, t'aneno kayina ma dibworo, ŋat'obedo wiye nyinge ilwoŋo ni Tho, aka piny pa jom'otho luwo go yuŋeye dho tiende. Omiy jo meni kwoŋ acel wiy aŋwen ma piny, neko woko ji g'abor kodi kec, kodi two nundu, kodi ogwaŋe mager ma piny.

⁹Gikenyo Nyathi rombo ohalo woko gimwono papila mar'abic; t'aneno i tiendi migam, cuny ji m'oneki rupiri jotito wac pa Were aka jobedo jogenirok i wodho kony i wac no.

¹⁰Jokoko gi derino madwoŋ ni, “Rwoth Majameni je, maleŋ aka jar'adieri! Kiri keraŋo aka inothum banja ri ji ma piny t'imiyo jo gir'acula ro neko wan?”

¹¹Dhano je omiy nanga matar. T'iwaci rijo ni jowoywomere mathin cuka kama welo pa jotic jowoti jo kodi wutmin jo ma bende iripo neko jo paka oneki jo worum.

¹²Aneno Nyathi rombo halo woko gimwono papila mar'aucel. Yengirok pa piny obedo madwoŋ, to ceŋ lokere macol, paka bongi m'orwaki i cwodho, to dwe lokere m'obokere tektek pa remo.

¹³Micalin jopodho piny wok i polo, paka nyandere manumu ma podho wok wi yen ka koyo madwoŋ oyengo.

¹⁴Polo oleny woko pa papila m'imino, aka gote je kodi kigoda lowo je man i dier nam okwany woko i kabedo pajo.

¹⁵Gikenyo kerin ma piny, jodhum kodi jotel ma lweny, joŋaŋo kodi jomeni, kodi ji man je, ŋecin kodi joma ni siem, jopondo i ŋungin kodi i tiendi telin ma gote.

¹⁶Jolwoŋo gote kodi telin ni, “Riewere win kwoŋ wan wipan wan ruwaŋ ŋat'obedo wi kom ma dhum, kodi ri keme pa Nyathi rombo!

¹⁷Kole ndelo ma keme pajo otundo, ŋat'onyal ciro ŋa?”