Read dhopadhola Menyirok ri Yohana 7 Bible Online

Menyirok ri Yohana 7 - dhopadhola bible

Menyirok ri Yohana 7

¹Rumacen aneno jomalaika aŋwen jocungo i tum aŋwen ma piny, munyo jogeŋo koyo aŋwen ma piny, ŋey koyo moro wokiri wokudhi wi piny, kosa wi nam, kosa kwoŋ yath moro je.

²Aka aneno malaika man bino wok yuwok ceŋ kodi gimwono ranyuth pa Were makwo. Go olwoŋo gi dwonde ma malo jomalaika aŋwen ma Were oyido omiyo jo meni ma nyeko piny kodi nam.

³Malaika no owaco ni, “Wikiri winyeki piny, kosa nam, kosa yen, cuka wanokethi ranyuth kwoŋ jotic pa Were mawan ma wamwono ruwaŋ jo.”

⁴Aka awinjo welo pa joma okethi ranyuth kwoŋ jo, 144,000 wok i nonin je mapa nyithindho pa Isiraili.

⁵Nono pa Yuda, gana apar g'ario m'oketh ranyuth kwoŋ jo, i nono pa Ruben, gana apar g'ario m'oketh ranyuth kwoŋ jo. I nono pa Gad,

⁶gana apar g'ario m'oketh ranyuth kwoŋ jo, i nono pa Aser, gana apar g'ario m'oketh ranyuth kwoŋ jo, i nono pa Nafital, gana apar g'ario m'oketh ranyuth kwoŋ jo, i nono pa Manase gana apar g'ario m'oketh ranyuth kwoŋ jo.

⁷I nono pa Simeo, gana apar g'ario m'oketh ranyuth kwoŋ jo, i nono pa Jolevi, gana apar g'ario m'oketh ranyuth kwoŋ jo, i nono pa Isakar,

⁸gana apar g'ario m'oketh ranyuth kwoŋ jo. I nono pa Zebulun, gana apar g'ario m'oketh ranyuth kwoŋ jo, i nono pa Yozefu, gana apar g'ario m'oketh ranyuth kwoŋ jo, i nono pa Benyamin, gana apar g'ario m'oketh ranyuth kwoŋ jo.

⁹Gikenyo aŋiyo, t'aneno Lwak ji madwoŋ m'ongoye ŋata d'onyalo kwano jo! Jowok i piny je, i nonin gi ji ma dhodhok je, to jocungo ruwaŋ kom ma dhum mapa Nyathi rombo, kareno joruko nangin matar, aka jotiŋo thith i cingi jo.

¹⁰Jokoko gi dwondi jo ma malo ni, “Both wok bongi Were ma bedo wi kom ma dhum kodi Nyathi rombo!”

¹¹Jomalaika je oyido jocungo jothoko kom ma dhum no kodi jodongo no kodi cwec makwo aŋwen no. Gikenyo jogore piny gi nyim jo ruwaŋ kom ma dhum no to jolamo Were

¹²ka jowaco ni, “Ameno! Pak kodi dwoŋ, kodi rieko kodi foy, kodi wor, kodi meni, kodi nyalo wobedi ri Were mawan cil gi cil! Ameno!”

¹³Acel kwoŋ jodongo no openjan ni, “Meno jokune ma jorukere i nangin matar no, kendo jowok kune?”

¹⁴Adwoko ni, “Jadwoŋ, iŋat'iŋeyo.” Go owaco ran ni, “Me a ji ma jowok i candirok madwoŋ. Jolwoko ruk pajo to joloko matar i remo pa Nyathi rombo.

¹⁵Meno am'omiyo jocungo ruwaŋ kom pa Were ma dhum aka onyo jotiyo rigo wor g'odieceŋ i Ot pere. Ŋata bedo wi kom ma dhum bino kuro jo kareno bedo gi jo kenyo.

¹⁶Jok'owinji kec gi riyo kendo; kendo ceŋ kosa lietho k'orewi jo.

¹⁷Ato Nyathi rombo manitie i dier kom ma dhum, bino bedo jakwath pajo, bino leko jo to tero jo ruwaŋ pi ma kwo, aka Were bino yweyo woko pigi waŋ jo kicutho.”