Read dhopadhola Menyirok ri Yohana 8 Bible Online

Menyirok ri Yohana 8 - dhopadhola bible

Menyirok ri Yohana 8

¹Munyo Nyathi rombo ohalo woko gimwono papila mar'abirio, liŋ obedo i polo cowo hongo ma romo adec sawa gipi.

²Gikenyo aneno jomalaika abirio ma jocungo ruwaŋ Were, omiy jo gwarin abirio.

³Malaika man m'onwaŋo nitie kodi giketho cuk mac ma waŋo buban, m'otimi gi zahabu, obino to cungo cegin gi migam. Omiy go buban madit ma womedi gi kwayo pa ji maleŋ pa Were aka wocwayi wi migam ma zahabu ma dho kom ma dhum.

⁴Yiro m'owok i buban ma waŋ, kanyacel gi kwayo pa ji maleŋ pa Were, oidho malo bongi Were wok i cingi malaika no.

⁵Gikenyo malaika no okwanyo giketho cuk no, opoŋ'iye mac wok i migam to wok to bolo i piny. Gino omwoc pa lithkoth gi derino, gi pilin pa koth, kodi yengirok pa piny.

⁶Gikenyo jomalaika abirio kodi gwarin pajo abirio joyikere cako kudho.

⁷Malaika marapena okudho gwara pere, to pe kodi mac m'oruwere gi remo wok to oy ri piny. Acel wiy adek ma piny owaŋ, to acel wiy adek ma yen waŋ woko, to lum m'onwaŋo nyaboke pendi je waŋ woko.

⁸Gikenyo malaika mar'ario okudho gwara pere, to gimoro ma cale got madwoŋ, maliel mac, bolere i nam.

⁹Acel wiy adek ma nam olokere remo, acel wiy adek ma gigipiny makwo je ma pi jotho woko, to acel wiy adek ma mel je nyekere woko.

¹⁰Gikenyo malaika mar'adek okudho gwara pere, to micala m'ombo, maliel pa mac odingili gore piny wok i polo, aka opodho wi acel wiy adek ma wakawaka, kodi i waŋ pi.

¹¹Nyingi micala no obedo Keco. Acel wiy adek ma pi olokere makec, to ji mathoth jotho ro madho pi makec no.

¹²Gikenyo malaika mar'aŋwen okudho gwara pere, to acel wiy adek ma waŋceŋ mukere woko, kodi acel wiy adek ma dwe, kodi acel wiy adek ma micalin; ameno colo obedo iy'acel ma wi adek maliel pajo. Lero oyido ongoye iy'acel ma wi adek mar'odieceŋ kodi acel wiy adek ma wor bende.

¹³Munyo fodi aŋiyo, awinjo ango m'oyido ringo malo swa i koyo munyo koko gi dwonde ma malo ni, “Awi kidamba! Kidamba! Kidamba kidho bedo ri ji ma piny ro derino ma gwarin ma jomalaika m'odoŋ adek jocegin kudho!”