Read dhopadhola Menyirok ri Yohana 9 Bible Online

Menyirok ri Yohana 9 - dhopadhola bible

Menyirok ri Yohana 9

¹Gikenyo malaika mar'abic okudho gwara pere, t'aneno micala moro opodho wi piny wok i polo malo, omiy micala no rayaw ma mwombe maluth ma bu gike.

²Malaika no oyawo mwombe no, aka yiro owok'iye, pa yiro ma wok i kendo m'ombo. Yiro no oloko lero ma ceŋ kodi polo macol.

³Aka bonyo oloro piny wok i yiro no, aka omiy jo meni ma cale kodi apa thwol gwokere ma piny.

⁴Owaci rijo ni jokiri jowonyeki lum, kosa yen, kosa gim'otwi moro je, to jowotimi raco kwoŋ ji ma jongoye kodi ranyuth pa Were ruwaŋ jo kende.

⁵K'oyey jo neko ji me, to miyo jo acanda kende cowo hongo ma dwe abic. Litho ma ji jolimo ocale gi litho ma dhano winjo ka thwolgwok okayo go.

⁶I hongo no ji jobino rango tho, to jok'onwaŋ, jobino yenyo tho, to tho bino yombo jo.

⁷Bonyo no oyido jocale kayina ma joyikere ri lweny, i wiy jo jobedo kodi gim'ocale sangaria ma zahabu, aka nyim jo ocale kodi nyim ji.

⁸Ye wiy jo ocale kodi ye wiy mon, laki jo ocale gi laki simbwor.

⁹Kor gin ocale pa oum kodi kwot ma nyweny, aka derino ma bwombi gin otimo ocale kodi derino pa cawila ma kayina mathoth joywayo ka joredo yu lweny.

¹⁰Jobedo gi yiw gin man gi lake ma wodho kwir, ma cale kodi apa thwol gwokere, aka jobedo gi meni ma kelo litho kwoŋ ji gi yiw gin cowo hongo ma dwe abic no.

¹¹Jobedo gi kere ma dhumo jo m'obedo malaika ma kuro mwombe maluth ma bu gike. Nyinge i Dhoyuda bedo Abadon; aka i Dhogrik bedo Apolion (Dwoŋ mere ni Janek).

¹²Candirok marapena orumo, odoŋ candirok man ario ma fodi labino.

¹³Gikenyo Malaika mar'aucel okudho gwara pere, t'awinjo dwondi jo m'owok i tungi migam aŋwen ma zahabu m'ocungo ruwaŋ Were.

¹⁴Dwondi jo no owaco ri malaika mar'aucel man gi gwara no ni, “Gony jomalaika aŋwen m'otwey jo dho jwom madwoŋ m'ilwoŋo ni Yufrete!”

¹⁵Gikenyo ogony jomalaika aŋwen no, m'onwaŋo otiek yiko jo kicutho ri sawa, gi ndelo, gi dwe, gi oro mere, ma neko acel wiy adek ma thotho pa ji je.

¹⁶Owaci ran welo pa lwak jolweny ma joŋweco gi kayina, obedo kiti miya ario (milion miya ario).

¹⁷Aka i menyirok no aneno kayina kodi wegi mere ama: Oyido joruko kwot ma nyweny i kor gin, m'obokere pa mac, m'oliewa kodi manyatongweno pa salufa. Wic kayina no jocale wic simbwor, aka i dhok gin owok mac, yiro, kodi buru salufa ma moko mac i kibiriti.

¹⁸Thoyamo adek me, mac, yiro, kodi buru salufa ma moko mac i kibiriti ma jowok i dhok kayina no oneko woko acel wiy adek ma thotho pa ji.

¹⁹Ato meni pa kayina no nitie i dhok gin, kodi i yiw gin bende. Yiw gin ocale thwol, man gi wic, aka jooro gigipiny no ma kelo litho kwoŋ ji.

²⁰Ji m'odoŋ, ma thoyamo no k'oneko jo, jok'oŋuto kwoŋ gigipiny ma jotimo. Jok'oweyo lamo jwogi, kodi cal m'otimi gi zahabu, feza, ywel, tele kodi yath apaya ma kinyal neno, kosa winjo, kosa woth.

²¹Jono jok'oŋuto kada kwoŋ neki, yido pajo, kidakana pajo, kosa kwalo gigipiny pa ji.