Read dhopadhola Ruth 4 Bible Online

Ruth 4 - dhopadhola bible

Ruth 4

¹Bowaz okidho i waŋkac to bedo piny kenyo; to wat pere m'oyido go otieko luwo kwoŋe bende bino. Bowaz olwoŋo go ka waco ama: “Biye bedi kome jawodhan”.

²Gikenyo to Bowaz kwanyo cwo apar kwoŋ jotel ma tindi to waco rijo bende bedo piny.

³To Bowaz waco ri wat pere no ni, “Naume otieko weyo piny Mowab odwoko ka; go pama tana adec ma lowo m'oyido obedo apa wat mawan Elimelek.

⁴An won aparo ni ber awaci rin gime, k'inyalo, nyew ruwaŋ ji me kanyacel gi jotel pa ji paran ma jobedo me. To k'ikimiti, wac ran i hongo me won, kwoŋbedo an bende anyalo tero paka cik ma lunjirok waco”. Jalo odwoko ni, “Abino nyewo”.

⁵Bowaz owaco rigo ni, “Tekin inyewo lowo ma bongi Naume, ŋey nike bende ilunjo Ruth citho ma wok Mowab, ŋey lowo wodoŋ i nyingi peco pa jatho”.

⁶Jalo odwoko ni, “Akinyali nyewo kwoŋbedo meno nyutho ni nyithindho paran jok'olunji. Nyew, to an be”.

⁷Aka i piny pa Joisiraili, ma ridho wil kosa mitan, ŋata tana onwaŋo kwanyo war pere to miyo ŋata nyewo. Me nyutho winjirok.

⁸Jalo to waco ri Bowaz ni, “Nyew.” Aka ogonyo war pere to miyo Bowaz.

⁹Bowaz owaco ri jodongo kodi ji je ni, “Wibedo jokony ni konon anyewo lim me m'oyido obedo apa Elimelek kodi apa yac pere Kilion gi Mahilon.

¹⁰Medo kwoŋ meno, Ruth nyar Jamowab ciliendi Mahilon lokere dhako paran. Gime bino miyo lim pa Mahilon wodoŋ i nyingi go; aka nyinge kilarere i dier ji gi piny pere. Wibedo jokony ma gime konon”.

¹¹To ji je m'oyido jonitie i waŋkac kanyacel gi jodongo jodwoko ni, “Wabedo jokony. Wakwayo ni Rwoth wokonyi dhako me m'ikidho nywomo wobedi paka Laker gi Leya, ma jonywolo nyithindho kweth ri Yakobo. Mondo ibedi ŋat'oŋaŋ i nono ma Efratha kodi ŋat'oŋeyere i Bethelehem.

¹²Rwoth wokonyin inwaŋ nyithindho gi dhako me, aka peco perin wobedi paka apa Perez ma Tama onywolo ri Yuda”.

¹³Piyo piyo to Bowaz tero Ruth bedo cege, obedo gine, aka Rwoth okonyo go ogamo iye to nywolo wode.

¹⁴Gikenyo mon ma tindi ma Bethelehem jowaco ri Naume ni, “Rwoth wopak ma k'othwonin nyakwarin ndelo me, weyi go woŋeyere i piny Isiraili.

¹⁵Go wokurin to bedo kwot perin ka iti. Kole ciwodin manitie rin gi cwe loyo yac abirio am'onywolo go”.

¹⁶Naume otiŋo nyathi i kore to cako kikwonga go.

¹⁷Mon mager jowaco ni, “Naume onywolo wode”. To jomiyo go nyinge ni Obed. Obed onywolo Yese, Yese onywolo Daudi.

¹⁸Me a nyikway Perez.

¹⁹Perez obedo ba Heziron, Heziron ba Ram, Ram ba Aminadab,

²⁰Aminadab ba Nason, Nason ba Salimon,

²¹Salimon ba Bowaz, Bowaz ba Obed,

²²Obed ba Yese. To Yese nywolo Daudi.