Read dhopadhola 1 Samwiri 15 Bible Online

1 Samwiri 15 - dhopadhola bible

1 Samwiri 15

¹Samwiri owaco ri Saulo ni, “An ama Rwoth ooran wirin gi mo paka kere pa ji pere; onyo pama winji gima Rwoth pa lwak jolweny waco.

²Go kidho miyo Joamalek gir'acula rupiri kwarere pajo jok'oyere gi Joisiraili ndir munyo jowok i piny Misir.

³Kidhi imonji Joamalek, aka isika woko gigipiny pajo je ma jonitie gine. Ikir'iwey kada gimoro acel; neki cwo, mon, nyithindho, kodi ma fodi jodhoth, dhok, rombo, kayina, gi punde.”

⁴Saulo olwoŋo jolweny pere je to kwano jo i tindi Telem; oyido jonitie jolweny 200,000 ma Joisiraili, kodi 10,000 ma jo wok Yuda.

⁵To Saulo kodi jolweny pere jokidho i tindi pa Joamalek, aka jopondo milelo.

⁶Saulo owaco ri Jokena ni, “Eye win wingoye bongi Joamalek, akir'aneki win kanyacel gi jo; kwoŋbedo cango wimako gi Joisiraili wor munyo jowok i piny Misir.” To Jokena jongoye bongi Joamalek.

⁷To Saulo kengila Joamalek, wok iy'adec ma Havila tundo Sur, yuwok ceŋ ma Misir.

⁸Go omako kere pa Joamalek makwo, aka osika ji je gi lew toŋ.

⁹To Saulo gi jolweny pere joweyo Agag makwo, aka jok'oneko rombo, dhok, nyithindhi dhok, kodi nyithindhi rombo mabeyo, kodi gimoro je m'oyido ber. To josika woko gigipiny je ma bukony kodi ma bu cwe.

¹⁰Rwoth oluwo wac pere won ri Samwiri ni,

¹¹“Arem raŋo aloko Saulo kere; rupiri go otieko ngoye woko bongan oweyo luwan, aka k'oluwo or paran.” To Samwiri mako nge, aka wor gipi oywaki ri Rwoth.

¹²Yawere odikin Samwiri okidho bongi Saulo. Nyatoro moro owaco rigo ni Saulo oyido okadho i tindi Kamel, kama go oyido oget'iye gi telin gim'ibino poyo gine go ma kikengila Joamalek; aka wok kenyo go oyido omedere kadhi Gilgal.

¹³Samwiri obino kiri bongi Saulo, to Saulo m'otho go, ka waco ama: “Rwoth womiyin silwany, Samwiri! Atieko timo gima Rwoth oyido mito.”

¹⁴Samwiri openjo Saulo ni, “To raŋo doko awinjo dhok gi rombo joywak?”

¹⁵Saulo odwoko ni, “Jolweny paran jonyaga wok bongi Joamalek. Joweyo dhok gi rombo mabeyo ma miyo Rwoth Were perin cowirok, aka m'odoŋ je wasika woko.”

¹⁶To Samwiri waco ri Saulo ni, “Alawaco rin gima Rwoth owaco ran nyoro wor.” Saulo odwoko ni, “Waci ran.”

¹⁷Samwiri owaco ri Saulo ni, “Makada nende itere pa ŋatasisiri, to ibedo jatel pa nonin je ma Isiraili. Rwoth ama owirin gi mo bedo kere pa Joisiraili.

¹⁸To Rwoth owodho rin or ni ikidhi isika woko Joamalek ma joreco no. Go owaco rin ni i lweny gi jo cuka ineko jo je.

¹⁹To onyo raŋo ikiwinjo dwondi Rwoth? Raŋo ikwakere kiwada gima winyaga, t'itimo gima k'osangala Rwoth?”

²⁰Saulo odwoko ni, “Awinjo dwondi Rwoth, akidho paka go ooran, t'adwoko gi Agag kere pa Joamalek, aka asika woko Joamalek je.

²¹To jolweny paran jok'oneko rombo gi dhok ma jonyaga; kwanyo woko, jokelo ka i Gilgal, ma miyo Rwoth Were perin cowirok.”

²²Samwiri openjo Saulo ni, “Ginaŋo ma sangala Rwoth? Winjo dwondi Rwoth, kosa mic gi cowirok awaŋa, winjo Rwoth ber loyo cowirok, aka winjo go loyo bor rombo.

²³Gwenyirok gi Were rom kodi thieth, aka wictek rom gi lamo cal. Paka ikwero winjo wac pa Rwoth, Go bende onyo okwerin paka kere.”

²⁴Saulo odwoko Samwiri ni, “Ey, atimo reco; akiwinjo or pa Rwoth kodi wac perin. To oyido alworo jolweny paran, t'atimo gim'oyido jomito.

²⁵T'onyo pama akwayin, cwaki ran reco paran aka adoki kodin ŋey anyal lamo Rwoth.”

²⁶Samwiri odwoko Saulo ni, “Ak'odoki kodin rupiri ikwero winjo or pa Rwoth, aka go okwerin paka kere pa Joisiraili.”

²⁷Munyo Samwiri owire kadho, Saulo opodho i law pere to yec.

²⁸Samwiri owaco ri Saulo ni, “Rwoth otieko yeco woko ker ma Isiraili kwoŋin konon to miyo jager perin maber loyin.

²⁹Aka Were pa Isiraili madwoŋ kitwodi kosa kiwir paro pere; rupiri go k'obedo nyatoro manyalo wiro paro pere.”

³⁰Saulo odwoko ni, “Atimo reco! To kad'ameno nyuthan wor ruwaŋ jotel pa ji paran kodi Isiraili je. Dok kodan ŋey anyal lamo Rwoth Were perin.”

³¹Ameno Samwiri odok gi go, to Saulo lamo Rwoth.

³²Samwiri owaco ni, “Keli ran win Agag kere pa Joamalek ka.” Agag obino bonge munyo kirin gi lworo to waco ni, “Obedo gima lithi swa tho.”

³³Samwiri owaco ri Agag ni, “Paka toŋ perin omiyo mon mathoth doŋ paka mon ma bu nyithindho, apaka konon me bende yokin ladoŋ paka dhako ma kinywol.” To Samwiri toŋo Agag mathindho thindho ruwaŋ Rwoth i Gilgal.

³⁴Samwiri odok Rama to Saulo dok peco pere i Gibeya.

³⁵Samwiri doko k'oneno kere Saulo tundo tho, to owinjo gi rem swa ri Saulo. Rwoth orem ni oyido oloko Saulo bedo kere pa Joisiraili.