Read dhopadhola 1 Samwiri 19 Bible Online

1 Samwiri 19 - dhopadhola bible

1 Samwiri 19

¹Saulo owaco ri wode Yonathan gi ŋecin pere can pere ma neko Daudi. To Yonathan oyido omaro Daudi gi cunye je.

²Ameno Yonathan owaco ri Daudi ni, “Baba rango nekin, riameno kure; dikin odikin ikidhi kamoro aka ipondo kenyo

³alabino to acungo gi baba i sa kam'ipond'iye, aka alaluwo gi go kwoŋin. K'anuŋici gimoro je, abino miyin ŋeyo.”

⁴Yawere odikin Yonathan oluwo gi bamere kwoŋ bero pa Daudi. Owaco rigo ni, “Jadwoŋ, ikir'itim gimarac ri ŋeca perin Daudi, rupiri ongoye raco ma go otieko timo rin. Go otieko konyin luwo i tim pere.

⁵Go ojala kwo pere i ndelo m'oneko iye Goliath, aka Rwoth oloyo lweny madwoŋ swa ri Joisiraili. Munyo in bende ineno, iwinjo maber. T'onyo rango imito timo gimarac ri ŋati m'ongoye raco m'otimo rin; raŋo imito neko Daudi m'ongoye atoŋa ma miyin neko go.”

⁶Saulo owinjo dwondi Yonathan aka okwoŋere i nyingi Rwoth ni go kilaneko Daudi.

⁷Rumacen Yonathan olwoŋo Daudi to liesa rigo kisi gimoro je; aka otero go bongi Saulo to doko Daudi tiyo rigo.

⁸Lweny man doko otur i dier Jofilistia gi Joisiraili. Daudi gi cwo pere jomonjo Jofilistia aka joneko jolweny kweth, aka man joringo.

⁹Ndelo acel, Rwoth odhiro cuny m'ocido to monjo Saulo, aka go oyido obedo i ot pere otiŋo toŋ pere i cinge. Daudi bende onwaŋo goyo tongol pere.

¹⁰Saulo otemo cwowo Daudi i kor ot g'abor pere to Daudi leŋo aka toŋ omoko i kor ot aka Daudi oringo to kwale.

¹¹Gi wor no won Saulo ooro jopendo pere i ot pa Daudi, ŋey jowoneki go yawere odikin. Mikal, cipa Daudi, owaco rigo ni, “K'ikikwale wor me, dikin odikin ibino nekin.”

¹²To Mikal wodho go g'idirisa aka Daudi oringo to kwale.

¹³Mikal okwanyo cal m'oyido nitie i ot aka opielo i wi kitanda, to theno wiye gi gima oyiki gi yer diel, aka oumo kwoŋe gipi.

¹⁴Munyo Saulo ooro jopendo pere kidho mako Daudi, Mikal owaco rijo ni go two.

¹⁵To Saulo owaco rijo ni jowogiki wegi joneni. Omiyo cik ni jowokidhi jowotiŋ Daudi gi kitanda aka jowoteri bonge go won woneki Daudi.

¹⁶Munyo jopendo jodonjo i ot, jonwaŋo cal m'oyido nitie i ot opiel i kitanda, aka othen wiye gi gim'otim gi yer diel.

¹⁷Saulo openjo Mikal ni, “Raŋo iwondan t'iweyo jakwor paran kwale?” Mikal odwoko ni, “Go owaco ran ni k'akikonyo go to kwale go lanekan.”

¹⁸Daudi okwale to kidho bongi Samwiri i tindi Rama aka owaco ri Samwiri gima Saulo otimo rigo je. Samwiri gi Daudi joay to jokidho Nayoth.[5]

¹⁹Nyatoro moro owaco ri Saulo ni Daudi nitie i tindi Rama.

²⁰Kenyo Saulo ooro jopendo pere kidho mako Daudi. Munyo joneno kitipa pa jotuci wac Were jomielo aka jokoko; aka Samwiri am'oyido telo jo, cuny pa Rwoth oloro kwoŋ jo aka bende jocako miel k'onyo jokoko.

²¹Munyo Saulo owinjo gime, ooro jopendo man. Jono bende munyo jotundo jocako miel k'onyo jokoko. Saulo doko to oro jopendo ma didek, aka gimoro acel otimere rijo.

²²I cowe mere Saulo won oay to mako yo ma kidho Rama. Munyo go otundo i jwom madwoŋ Seku, openjo kama Samwiri gi Daudi oyido jonitie; aka owaci rigo ni jonitie Nayoth.

²³Munyo Saulo nitie i yo ma kidho Nayoth, i tindi Rama, cuny pa Rwoth oloro kwoŋe; aka go bende ocako miel konyo koko i yo malomalo konyo kadhi Nayoth i Rama.

²⁴Saulo olunyo nangin pere, aka omielo konyo koko ruwaŋ Samwiri. Go obedo kinyoro ndelo no gi wor gipi. Me am'omiyo iwaco ni, “Kiri Saulo je olokere jatuci wac Were!”