Read dhopadhola 1 Samwiri 2 Bible Online

1 Samwiri 2 - dhopadhola bible

1 Samwiri 2

¹Hana okwayo ama: “Cunyan yodere i Rwoth; Neni paka asangala ro gima go otimo ran! Anyero jokwor paran; kwoŋbedo afore i both perin!

²Ongoye ŋataleŋ paka Rwoth; ongoye ŋatiman ma cale in, ongoye tele lwanda ma pimere gi Were mawan.

³Bol win kwoto gi delok mewin gicen; wikiri wiluw gi gero. Kole Rwoth obedo Were ma jaŋeyo, aka go thumo banja ri kisi nyatoro wok i tim.

⁴Kwot pa jomeni otur woko, aka ji manyap onyo jolokere jomeni.

⁵Jom'oyido joyeŋ am'onyo kec neko jo, aka jom'oyido kec neko jo am'onyo joyeŋ Dhako m'oyido kinywol onyo nitie gi nyithindho abirio, aka dhako m'oyido omore gi nyithindho onyo ongoye kada g'acel.

⁶Rwoth ama kwanyo kwo to doko dwoko; go ama tero ji i piny pa jom'otho, to doko cerino jo.

⁷Rwoth ama loko jomegi jocandi, aka jomegi joŋaŋo; go dwoko piny jomegi aka tiŋo malo jomegi.

⁸Go tiŋo malo jocandi wok i fukefuke aka tiŋo jocandi wok i kumo pajo. Go ketho jo bedo kanyacel gi wot kere aka ketho jo i kabedo madwoŋ. Kindi piny obedo apa Rwoth; aka go ogeto piny gibe i wiye.

⁹Go kwonga kwo pa ji pere ma genere, to jokidakana jobino rere i colo kole nyatoro won kikwo ro meni pere.

¹⁰Rwoth bino reyo jokwor pere; go bino mwoc kwoŋ jo wok i polo. Rwoth bino thumo banja ri piny gibe; go bino miyo kere pere meni, go bino miyo kere pere ma go won oyero loyo.”

¹¹Ameno to Elikana dok peco pere Rama to Samwiri doŋ Silo tiyo ri Rwoth, kanyacel gi Eli jacway ri Were i wi migam.

¹²Wot Eli oyido jobedo jokidakana, aka oyido jokilwor Rwoth.

¹³Cik bende m'oyido mako kwoŋ gima jocway ri Were i wi migam joripo nwaŋo wok bongi ji, onwaŋo jokiluwi. Cik me oyido waco ni, ka nyatoro moro onwaŋo cowere, ŋeca pa jacway ri Were i wi migam oyido ripo bino gi uma ma ja lewe adek ka riŋo fodi twak,

¹⁴to rwako i ayiga, aka riŋo ma uma no owok gine je bedo apa jacway ri Were i wi migam. Joisiraili je m'oyido jokidho Silo cowirok jotimo ameno.

¹⁵Medo kwoŋ meno, kafodi k'owar bor t'iwaŋo, ŋeca pa jacway ri Were i wi migam oyido bino bongi ŋata cowere gi wac me, “Miy jacway ri Were i wi migam riŋo abula, kole go kilayeyo riŋo m'otedi kwanyo woko manumu.”

¹⁶To ka ŋato odwoko ni, “Weyi kutho wabul bor to nyaka ikwanyo paka iyenyo.” Ŋeca pa jacway ri Were i wi migam dwoko ni, “Be! Miyan pama won me, k'ikwero, alakwanyo gi mbaka.”

¹⁷Reco pa wot Eli oyido oasere ruwaŋ Rwoth, kwoŋbedo oyido jokiwor cowirok pa Rwoth.

¹⁸I hongo no Samwiri oyido tiyo ri Rwoth, aka ruko law maleŋ ma cale apa jocway ri Were i wi migam.

¹⁹Kisi oro min oyido kwoyo rigo law moro to tero rigo ka kwaŋo cwore miyo cowirok ma kisi oro.

²⁰Kafodi jok'odok peco pajo, Eli oyido maro miyo Elikana gi cege Hana silwany ka waco ama, “Weyi Rwoth womiyin nyithindho man gi dhako me jowonyal lunjo waŋ me m'imiyo Rwoth.”

²¹To Rwoth miyo Hana yac adek gi nyir ario. To Samwiri dongo k'onyo tiyo ri Rwoth.

²²I hongo no Eli oyido oti. Oyido iwaco rigo wac kwoŋ gigipiny ma yac pere oyido jotimo ri Joisiraili paka oyido jobedo gi mon ma tiyo i waŋkac ma Wema pa Rwoth.

²³To go waco rijo ni, “Raŋo witimo gima cale ameno? Kisi nyatoro waco ran reco ma witimo.

²⁴Be! Nyithindho paran gim'awinjo kwoŋ win ma ji pa Rwoth jowaco kiber.

²⁵Ka nyatoro otimo reco ruwaŋ nyawote, Were nyalo theko go, to ka nyatoro otimo reco ruwaŋ Rwoth, ŋa m'othek go!” To jok'onyalo winjo bajo, kole Rwoth oyido otieko yiko neko jo.

²⁶Samwiri omedo dongo to nwaŋo wor wok bongi Rwoth gi ji.

²⁷Jatuci wac Were moro obino bongi Eli gi wac me wok bongi Rwoth, “Anyuthere ri kwarin Aron gi peco pere munyo oyido jobedo ŋecin pa kere ma piny Misir.

²⁸Kwoŋ nonin je ayero Aron gi peco pere bedo jocway ri Were i wi migam, tundo i wi migam paran, waŋo buban, ruko law pa jocway ri Were i wi migam, aka amiyo go mic paran awaŋa je ma wok bongi Joisiraili.

²⁹To onyo raŋo wiŋiyo gi woro mic gi cowirok ma amito wok bongi ji paran! Raŋo in Eli imiyo yac perin wor loyan aka iyeyo jo kiri poŋo gi adec mabeyo ma cowirok awaŋa ma ji paran miyan!

³⁰An Rwoth Were pa Joisiraili oyido atieko cikin kanyacel gi nono perin ni wibino tiyo ran paka jocway ri Were i wi migam hongo je; t'onyo pama Rwoth waco kamaler ni gime doko kinyalere. Abino woro jono ma joworan aka jono ma joteran paka ŋatasisiri, abino tero jo paka gima bukony.

³¹Neni! Hongo bino tundo m'abino neko luse yac mathindho peco perin gi i nono perin, ŋey wongoye nyatoro moro ma wok peco perin ma bino tundo i oro ma tiyo.

³²Wibino bedo i teko to wineno gi waŋ win marac silwany m'abino miyo Joisiraili man, to ongoye kada nyatoro acel wok peco perin ma bino kiyindira cil gi cil.

³³T'abino koyo nyakwarin acel, aka go bino tiyo ran paka jacway ri Were i wi migam. To waŋe bino tho to ngoye gi geno; aka nyikwayin man je jobino tho malith.

³⁴Ka wotin ario, Hofin gi Finehas jotho i ndelo acel, meno bino ridho rin nike gim'atieko waco bino timere.

³⁵Abino yero jacway ri Were i wi migam paran m'ogenere, go bino timo gimoro je paka amito. Abino miyo go nyikwaye ma jobino bedo jocway ri Were i wi migam ri kerin paran je m'owir gi mo ma cil gi cil.

³⁶Nyikwayin moro je ma joboth jobino kidho bongi jacway ri Were i wi migam no, to jokwayo go pesa gi cemo, aka bende jobino kwayo go woyey jo konyo jocway ri Were i wi migam, ŋey jowonwaŋ gir'acama moro.”