Read dhopadhola 1 Samwiri 20 Bible Online

1 Samwiri 20 - dhopadhola bible

1 Samwiri 20

¹Daudi oringo wok Nayoth i tindi Rama, to kidho bongi Yonathan, aka openjo go ni, “Atimo aŋo? Raco aŋo m'atimo ri benin ma go mito nekan?”

²Yonathan odwoko ni, “Meno gima kimitere n'ilatho! Baba waco ran kisi gima go kidho timo kada bedi mathin nedi; aka go di k'onyalo kano kwoŋan gime. K'obedo adieri!”

³Daudi odwoko ni, “Benin oŋeyo maber swa ni imaran swa, aka go okwero waco rin gima go ocano timo ran, rupiri bino ramo cunyin. To akwoŋere rin i nyingi Rwoth makwo ni anitie cegin gi tho!”

⁴Yonathan odwoko ni, “Alatimo gimoro je ma imito ni atim rin.”

⁵Daudi odwoko ni, “Dikin obedo ndelo ma kalima ma dwe manyen, aka aripo cemo kanyacel gi kere. To weyi akadhi apondi i dudi tundo yawere othieno.

⁶To ka benin opar kwoŋan to penjo kam'anitie iye, wac rigo ni akwayin ywomirok ŋey anyal dok peco i Bethelehem; rupiri obedo hongo ma cowirok peco mawan gipi.

⁷Ka go owaci ni, ‘Meno ber.’ Meno nyutho ni ongoye wac. To ka go omaki nge, ilaŋeyo ni go omiyere nekan.

⁸Mondo tim kodan wor, i kur cikirok ma watimo ruwaŋ Rwoth. To k'inen anitie gi raco moro, in won nekan! Raŋo iteran bongi benin am'onekan?”

⁹Yonathan odwoko ni, “Ikir'ipar kada kwoŋ nger gino! Bedi oyido aŋeyo adieri ni baba omiyere timo rin gimarac, dinyo akiwaco rin?”

¹⁰Kenyo to Daudi penjo Yonathan ni go oŋey nedi ka Saulo odwoki gi nge.

¹¹Yonathan owaco ri Daudi ni, “Biye wakidhi i sa.” Ameno to jario jokadho i sa.

¹²To Yonathan waco ri Daudi ni, “Weyi Rwoth Were pa Isiraili obedi mujulisi mawan. Dikin kodi yawere i waŋceŋ paka ama alapenjo baba. K'inen go winjo maber kodin, abino waco rin.

¹³To k'inen baba mito timo rin gimarac; Rwoth wotim ran gimarac k'aweyo m'akiwaco rin, t'aweyin ikadho i siem.

¹⁴Kafodi akwo, kur cikirok ma watimo ruwaŋ Rwoth; to k'anotho,

¹⁵imaki wor gi jothuwan cil gi cil. Rwoth bino reyo woko jokwor perin je

¹⁶aka cikirok mawan kodin wokiri wotur. K'otur, Rwoth bino miyin gir'acula.”

¹⁷Yonathan doko to miyo Daudi kwoŋirok maro go, rupiri Yonathan oyido omaro Daudi gi cunye je.

¹⁸Kenyo to Yonathan waco ri Daudi ni, “Dikin obedo ndelo ma kalima ma dwe manyen, aka ji jolakeŋ in ka kom perin odoŋ nono i dhower cemo.

¹⁹Yawere dikin ji doko jolakeŋ in loyo; riameno kadhi ipondi kama ceŋino ipond'iye i ŋeti kidhur telin kenyo.

²⁰Alabolo aserin adek i thenge mere paŋini oyido nitie gimoro m'amito cwowo.

²¹Alaoro ŋeca paran bino rango aserin no. To k'anowaci rigo ni, ‘Neni! Jonitie i thenge perin me kwany jo.’ Meno nyutho ni ongoye wac aka inyalo wok kam'ipond'iye. Akwoŋere i nyingi Rwoth ni ongoye ŋata bino timo rin gimarac.

²²To k'anowaci rigo ni ‘Neni! Jonitie yuwiyin.’ Kenyo onyo ikadhi rupiri meno Rwoth oorin ikadhi.

²³To ri kwoŋirok ma watimo kodin, panen, Rwoth wokonyi wan wakur cil gi cil.”

²⁴Ameno to Daudi pondo i sa. Munyo kalima ma dwe manyen otundo, kere Saulo obino to bedo i dhower cemo.

²⁵Kere obedo i kabedo pere ma kisi ndelo kam'othenere gi kor ot; Yonathan obedo tirtir gi Saulo, to Abuner bedo kabuti kere, aka kom pa Daudi odoŋ nono.

²⁶Saulo k'owaco gimoro je ndelo no; rupiri oparo ni kono gimoro otimere ri Daudi aka onyo go k'olony ma bino i kalima.

²⁷Yawere munyo kalima ma dwe manyen orumo, kom pa Daudi oyido fodi odoŋ nono, to Saulo penjo Yonathan ni, “Raŋo Daudi k'obino i dhower cemo nyoro kiri gi konon?”

²⁸Yonathan odwoko ni, “Go okwayan ywomirok wonyali kidho Bethelehem.

²⁹Go owaco ran ni, ‘Mondo weyi akadhi rupiri jopeco mawan jomiyo cowirok i tindi madwoŋ aka omin an owaco ni aripo bedo. Ameno onyo k'inen ibedo mere paran, weyi akadhi alimi wade paran.’ Meno ay'atoŋa m'omiyo kom pere odoŋ nono i dhower cemo.”

³⁰Saulo omako nge gi Yonathan to waco rigo ni, “In ija wictek gi banirok paka yokin. Aŋeyo paka iriwere gi Daudi kelo wickwot rin gi yokin.

³¹Ikiŋey ni kafodi Daudi kwo i piny ikinyal bedo kere i piny me! Riameno dhiri nyatoro wokel go ka, rupiri go ripo tho.”

³²Yonathan openjo ni, “Raŋo ripo woneki go? Aŋo ma go otimo?”

³³Kenyo ama Saulo obolo toŋ pere ni wocwow Yonathan, aka kenyo ama Yonathan oŋeyo iye ni bamere oyido omiyere neko Daudi.

³⁴Yonathan oay i dhower gi ŋonge aka k'ocemo ndelo no gipi. Owinjo gi rem swa ri Daudi rupiri bamere oyido okwoto wi go.

³⁵Yawere odikin Yonathan okidho i sa romo gi Daudi paka oyido joyere; aka okidho gi ŋeca pere majayac.

³⁶Yonathan owaco ri ŋeca pere ni, “Ŋwec ikidhi irangi aserin m'akidho bolo.” Nyiyac no oŋweco, aka Yonathan obolo aserin to kalo go.

³⁷Munyo jayac no otundo kama aserin jopodh'iye, Yonathan okoko rigo ni, “Aserin jokinitie yuwiyin,

³⁸ikir'icungi kenyo redi!” Jayac no odimo aserin to gik bongi jadwoŋ pere,

³⁹ma go k'oŋeyo ni nyutho aŋo; Daudi gi Yonathan kende am'oyido joŋeyo.

⁴⁰Yonathan omiyo jayac no gilweny pere to waco rigo ni wodwoki jo i tindi.

⁴¹Tekin jayac no kadho, Daudi oay i ŋeti kidhur telin kam'oyido opond'iye, oguro conge to kule piny didek. Jario je jocwiyere lembi gin to joywak; aka rem pa Daudi oyido thoth loyo apa Yonathan.

⁴²Yonathan owaco ri Daudi ni, “Were wobedi kodin. Rwoth laneno ni an kodin, kodi wade mawan, wakuro kwoŋirok ma watimo.” Kenyo to Daudi kadho, aka Yonathan odok i tindi.