Read dhopadhola 1 Samwiri 21 Bible Online

1 Samwiri 21 - dhopadhola bible

1 Samwiri 21

¹Daudi okidho Nob bongi Ahimelek jacway ri Were i wi migam. Ahimelek okidho bonge munyo kirin to penjo go ni, “Raŋo ibino ka kendin?”

²Daudi odwoko go ni, “Kere ooran timo rigo tic moro aka owaco ran ni akir'awaci ri nyatoro moro je gima go ooran. To ri cwo paran awaco rijo romo kodan kamoro.

³Ameno onyo aŋo m'initie gine i cingin? Miyan mugat abic kosa gimoro je m'initie gine.”

⁴Ahimelek odwoko ni, “Angoye gi mugat ma kisi ndelo, kwanyo woko anitie gi mugat maleŋ; anyalo miyin k'inen cwo perin jocowo hongo moro ma jok'obedo gi mon pajo.”

⁵Daudi odwoko jacway ri Were i wi migam ni, “Adieri wakibedi gi mon mawan kisi ka wakidho woko timo tic moro; t'onyo wanyalo nedi bedo gi mon mawan ma wabino timo tic pa kere.”

⁶Ameno to Abimelek miyo Daudi mugat maleŋ, rupiri meno kende a mugat ma go oyido nitie gine m'oyido okwany wok i wi meza maleŋ t'iketho mugat maleŋ man.

⁷I waŋceŋ acel no jacwo m'oyido obedo jatel pa jokwath dhok pa Saulo oyido nitie kenyo. Nyingi go oyido Doweg ma wok Edom. Go oyido obino kenyo timo kwer moro.

⁸Daudi openjo Abimelek ni, “Initie gi toŋ kosa abor moro? Rupiri akitiŋo toŋ kosa gilweny moro je rupiri kere ooran ma kwakirok.”

⁹Ahimelek odwoko ni, “Abor pa Goliath Jafilistia ma ndelo no ineko i milelo ma Ela ama nitie ka. Nitie yuŋey law pa jocway ri Were i wi migam otwey i law. K'imito kadhi gine rupiri a gilweny kende manitie ka.” Daudi owaco ni, “Miyan, doko ongoye abor kaman je maber loyo meno.”

¹⁰Ameno Daudi oringo woko bongi Saulo ndelo no to kadho bongi Akis kere ma Gath.

¹¹To ŋecin pa Akis jowaco rigo ni, “Me ki Daudi kere ma piny pere? Me a jal ma mon jowero munyo jomielo ni, ‘Saulo oneko ganin aka Daudi oneko ganin dipar?’ ”

¹²Daudi omako wac me i cunye to lworo mako go ri kere Akis.

¹³Ameno Daudi owiro tim pere ruwaŋ jo, to ero rendirok ni go janeko; aka ondiko i waŋkac ma tindi madwoŋ to cwero law i ye tike.

¹⁴To Akis waco ri ŋecin pere ni, “Neni! Jal me janeko! Raŋo wikelo go bongan?

¹⁵Angoye gi joneko, ma wikelo ran jal me tuko ran neko pere ruwaŋan? Jal me obin i ot paran?”