Read dhopadhola 1 Samwiri 23 Bible Online

1 Samwiri 23 - dhopadhola bible

1 Samwiri 23

¹Ndelo acel, wac otundo ri Daudi ni Jofilistia oyido jomonjo tindi Keila aka oyido jokwalo ŋano m'oyido nyaka okec.

²Ameno Daudi openjo Rwoth ni, “Akidhi amonji Jofilistia?” To Rwoth dwoko ni, “Ey monji jo ibothi tindi Keila.”

³To cwo pa Daudi jowaco rigo ni, “K'inen wanitie iy'adec ma Yuda to fodi wanitie gi lworo, t'obedi nedi ka wanokidhi to wamonjo jolweny pa Jofilistia!”

⁴Ameno Daudi doko openjo Rwoth. To Rwoth doko waco rigo ni, “Ay, lori ikidhi Keila; rupiri alamiyin Jofilistia i cingin.”

⁵Ameno Daudi gi cwo pere jokidho Keila aka jomonjo Jofilistia; joneko Jofilistia kweth to jonyaga ogwaŋe pajo. Aka ameno apaka Daudi obotho tindi Keila.

⁶I hongo ma Abiatha okwale to kidho bongi Daudi Keila, okidho gi law pere ma jocway ri Were i wi migam joruko.

⁷Owaci ri Saulo ni Daudi okidho Keila, to go waco ni, “Were omiyan go i cingan. Daudi won ocikere to kidho i tindi m'othok gi cel.”

⁸Ameno to Saulo lwoŋo cwo pere je kidho i lweny, jowokadhi yupiny Keila, jowothoki Daudi gi cwo pere.

⁹Munyo Daudi owinjo ni Saulo oyido cano gimarac rigo, owaco ri Abiatha jacway ri Were i wi migam ni, “Keli law pa jocway ri Were i wi migam ka.”

¹⁰To Daudi kwayo Rwoth ama, “Rwoth, Were pa Isiraili, awinjo ni Saulo cano bino reyo woko Keila ro an.

¹¹Jotel ma Keila jomiyan i cingi go? Adieri Saulo labino paka ŋeca perin owinjo? Rwoth, Were pa Isiraili akwayin idwokan!” Rwoth odwoko Daudi ni, “Saulo labino.”

¹²To Daudi doko openjo ni, “Jotel ma Keila jomiyan gi cwo paran i cingi go?” To Rwoth dwoko ni, “Jolajwango win.”

¹³Ameno Daudi gi cwo pere ma romo 600 joay dicel to jongoye Keila aka jokadho kaman. Munyo Saulo owinjo ni Daudi okwale wok Keila, oweyere gi can pere.

¹⁴Daudi obedo konyo pondo i piny matendere tendere i thim cegin gi tindi Zif.

¹⁵Munyo Daudi nitie Hores, i thim cegin gi Zif, go obedo gi lworo rupiri oneno ni Saulo oyido dwaro kwo pere.

¹⁶Yonathan wod pa Saulo oay to kidho bongi Daudi i Hores to yomo cuny Daudi, aka owaco rigo ni Were bino gwoko go.

¹⁷Yonathan owaco ri Daudi ni, “Ikir'ibedi gi lworo; baba kilaketho cinge kwoŋin rupiri go won bende oŋeyo paka iŋat'ibino bedo kere pa Joisiraili ma laluwo aka aŋat'abino luwin.”

¹⁸Yonathan gi Daudi to doko jokwoŋere i nyingi Rwoth bedo mere.

¹⁹Ji moro jowok Zif to kidho bongi Saulo Gibeya, aka jowaco rigo ni Daudi opondo iy'adec pajo i tendere ma Hores, wi got Hakila, yupiny ma thim i Yesimon.

²⁰Jono jowaco ri Saulo ni, “Jadwoŋ, waŋeyo paka imito mako go; riameno biye iy'adec mawan, aka walaneno ni imako go.”

²¹Saulo odwoko ni, “Rwoth womiy win silwany rupiri wiworan!

²²Kidhi win doko wiridhi; neni win to wiŋeyo kama go pond'iye, kodi ŋat'ocowo neno go kanyago; rupiri owaci ran ni niaŋ paro pere kiyot.

²³Rangi win kama go pond'iye je, aka widwoki ran gi wac ma ridho. Nyaka abino kidho gi win, aka k'inen go fodi nitie iy'adec, alarango go i piny Yuda gipi.”

²⁴Ameno jono joay to jodok Zif yuwiy Saulo. Daudi gi cwo pere oyido jonitie i thim Mawon, milelo kam'othwo yupiny ma thim Yesimon.

²⁵Saulo gi cwo pere jokidho to jocako dwaro Daudi. To munyo nyatoro moro owaco ri Daudi, jokidho i thim Mayon to jodoŋ kenyo. Munyo Saulo owinjo ni Daudi nitie kenyo, ocako riemo go.

²⁶Saulo gi cwo pere oyido jonitie i thengi got acel, aka Daudi gi cwo pere bende oyido jonitie i thenge man. Daudi gi cwo pere oyido joringo ngoye woko bongi Saulo gi cwo pere. To munyo Saulo oyido jocegin mako jo,

²⁷jamikwenda moro obino to waco ri Saulo ni, “Redi idwoki; rupiri Jofilistia jomonjo piny Isiraili.”

²⁸Ameno Saulo oweyo riemo Daudi to gik lweny gi Jofilistia. Meno am'omiyo ilwoŋo kenyo ni got ma thek.

²⁹Daudi oay kenyo to kidho i tendere ma Engedi to pondo kenyo.