Read dhopadhola 1 Samwiri 25 Bible Online

1 Samwiri 25 - dhopadhola bible

1 Samwiri 25

¹Samwiri otho, aka Joisiraili jocokere kanyacel to joywako go. Joyiko go peco pere i Rama. Rumacen Daudi oay to kidho i thim iy'adec ma Paran.

²To bedo jacwo m'ilwoŋo ni Nabal janono Kaleb, m'oyido wok i tindi Mayon, aka nitie gi lowo cegin gi tindi Kamel. Go oyido obedo jal m'oŋaŋ swa; aka nitie gi rombo 3,000 kodi diegi 1,000. Cege oyido ilwoŋo ni Abigayili, aka oyido obedo dhako mariek. To Nabal oyido obedo jagwondo, aka kikur nge pere. Nabal oyido thumo rombo pere Kamel.

⁴Ndelo acel, Daudi owinjo gi i thim kama go oyido nitie iye ni Nabal thumo rombo.

⁵To Daudi oro yac apar, aka owaco rijo ni jowokidhi Kamel bongi Nabal to jomotho go.

⁶To Daudi waco rijo waco ri Nabal ni, “Daudi dhiro rin moth, in mere pere. Siem obedi kodin, peco perin, gi kisi gimoro perin je.

⁷Go owinjo ni cwo perin jothumo rombo perin, aka go mitin iŋey ni ti munyo jokwath rombo perin oyido jonitie gi wan, ongoye gipajo ma wakwalo i hongo je ma jobedo gi wan Kamel

⁸In won bende penji jo, jobino waco rin. Riameno weyi cwo paran jowonwaŋ wor ruwaŋin; rupiri wabino i ndelo maber ma kalima. Go kwayo ni imiy wan ŋecin perin gim'inyalo miyo wan gi mere perin Daudi.”

⁹Cwo pa Daudi jowaco ri Nabal wac ma Daudi ooro jo gine; aka jokuro radwok wok bongi go.

¹⁰Rumacen Nabal odwoko jo ni, “Daudi me ŋa? Wod pa Yese me ŋa? Nitie ŋecin kweth ma ti me joŋweco woko kwoŋ jodongo pajo.

¹¹Akikidhi kwanyo mugat paran gi pi paran gi riŋo paran m'athumo ri ŋecin paran t'amiyo ji m'akuya kama jowok'iye!”

¹²Cwo pa Daudi jodok, aka jowaco rigo gima Nabal owaco je.

¹³To Daudi waco ri cwo pere ni, “Kisi nyatoro wotwey abor pere!” Kisi nyatoro otweyo abor pere aka Daudi bende otweyo apere. Cwo 400 jokadho gi Daudi, aka cwo 200 jodoŋ kuro gilweny.

¹⁴Acel kwoŋ ŋecin pa Nabal okidho to waco ri Abigayili cipa Nabal ni, “Neni, Daudi ooro jomikwenda wok i thim motho jadwoŋ mawan; to go koko rijo.

¹⁵Kucel ndir m'oyido wanitie i thim gi jo jonyutho wan bero; jok'ocando wan, aka jok'okwalo gigipiny mawan.

¹⁶Jogwoko kwo mawan kiri g'ogwaŋe mawan je i hongo ma wabedo gi jo i thim.

¹⁷Mondo par kwoŋ gime akinen gir'atima. Gime nyalo kelo teko ri jadwoŋ mawan kiri gi peco pere. Go obedo nyatoro ma kula pere rac swa, aka kiwinji gim'iwaco rigo.”

¹⁸Abigayili oredo to kwanyo mugat 200 pien ario ma vini, rombo abic m'othumi to ibulo, kutiya abic ma ŋano, nyingi vini m'othwo kayego 100 gi adhoŋ cinge 200 ma nyandere, to tweyo jo i punde.

¹⁹To go waco ri ŋecin pere ni jokadhi yuwiye go laluwo go; aka k'owaco ri cwore.

²⁰Munyo go gweyo punde kam'oumere gi got, oromo gi Daudi gi cwo pere munyo joloro jokidho yu bongi go.

²¹Daudi con mere oyido owaco ni, “Adieri aŋat'agwoko ri jame lim pere i thim manono, to ngoye gipere kad'acel m'orwenyo; aka me apaka go oculan raco ri bero.

²²Were onekan k'inen tundo dikin odikin akineko joje.”

²³Munyo Abigayili oneno Daudi, oloro i wi punde, oredo to bwonere ri Daudi.

²⁴Opodho i tiendi Daudi, aka owaco rigo ni, “Mondo jadwoŋ, akwayin iwinjan! Weyi ater apuse je.

²⁵Mondo ikir'ipar kwoŋ jal ma kula pere rac no. Go miŋamiŋa paka nyinge nyutho. Oyido angoye munyo cwo perin jobino.

²⁶Rwoth ama ogeŋin culo kwor t'ineko jokwor perin; t'onyo weyi jokwor perin je jowocale Nabal.[6]

²⁷Mondo akwayin jadwoŋ, yey ijoli mic ma ŋeca perin okelo rin me omiy cwo perin.

²⁸Mondo akwayin icwaki ran jadwoŋ ri gimarac m'atimo. Rwoth bino miyin ker makirum, rupiri ilwenyo lweny pa Rwoth; aka ongoye ŋati ma bino timo rin gimarac kafodi ikwo.

²⁹Ka nyatoro moro omonjin to temo nekin, Rwoth Were perin bino gwoko kwo perin paka ŋata gwoko lim pere ma welo. To jokwor perin Rwoth bino lilo woko kwo pajo pa ŋata lilo tele gi asumulu.

³⁰Aka ka Rwoth otieko timo rin bero je ma go ocikin to kethin kere ma Isiraili,

³¹kenyo nyaka ikilarembo, kosa ikilaŋuto ni raŋo i oyo remo m'ongoye atoŋa, kosa ma culo kwor. Aka ka Rwoth otieko miyin silwany, jadwoŋ, wiyin wokiri wowil kodan.”

³²Daudi odwoko Abigayili ni, “Rwoth Were pa Isiraili wopak m'oorin konon romo kodan!

³³Were wofoy ro rieko m'inyutho; aka ri gim'itimo to igeŋan timo reco ma neki gi culo kwor paran an won.

³⁴Rwoth wogeŋan timo riwin gimarac. To akwoŋere rin i nyingi Were pa Isiraili makwo ni bedi nende ikiredo romo kodan, dinyo tundo odikin onwaŋere ni cwo pa Nabal je jotho.”

³⁵Kenyo to Daudi jolo gigipiny ma Abigayili okelo rigo; aka owaco rigo ni, “Dok peco aka ikir'irembi. Alatimo gim'imito.”

³⁶Abigayili odok peco to nwaŋo munyo Nabal otimo kalima madwoŋ paŋini apa kere. Nabal oyido omer aka yodere; riameno Abigayili k'owaco rigo gimoro je tundo odikin.

³⁷Yawere odikin munyo Nabal fodi milengela, Abigayili owaco rigo gim'otimere je. Cuny Nabal otho to kwoŋe ŋinyere.

³⁸Munyo ndelo apar okadho to Rwoth tero kwo pere.

³⁹Munyo Daudi owinjo ni Nabal otho owaco ni, “Rwoth wopak m'oculo Nabal kwor ro gimarac m'otimo ran to geŋan timo gimarac.” Kenyo Daudi ooro ŋecin pere weco gi Abigayili bedo cege.

⁴⁰Cwo pa Daudi jokidho bongi Abigayili Kamel to jowaco rigo ni, “Daudi ooro wan bino terin ibedi dhako pere.”

⁴¹Abigayili oay to bwonere to waco ni, “Abedo ŋeca pa Daudi aka ayikere lwoko tiendi ŋecin pere.”

⁴²Abigayili oay to redo, aka oidho punde pere. Kanyacel gi nyir pere abic m'oyido jobedo jotic pere jokadho gi cwo pa Daudi to bedo cipa Daudi.

⁴³Daudi oyido onywomo dhako m'ilwoŋo ni Ahinowam ma wok loka Yezirel, aka onyo Abigayili bende to bedo cege.

⁴⁴Korin Saulo opoko nyare Mikal m'oyido cipa Daudi ri jacwo m'ilwoŋo ni Palti wod pa Layis, ma wok i tindi Galim.