Read dhopadhola 1 Samwiri 26 Bible Online

1 Samwiri 26 - dhopadhola bible

1 Samwiri 26

¹Ji moro ma jowok Zif jobino, aka jowaco ri Saulo ni Daudi opondo i got Hakila, i gike ma thim Yesimon.

²Saulo oay gi cwo 3,000 m'oyero wok kwoŋ Joisiraili to joloro i thim ma Zif rango Daudi.

³Jokidho to jocokere dho yo wi got Hakila. Daudi oyido fodi nitie i thim, aka munyo owinjo ni Saulo obino rango go i thim,

⁴ooro jopendo niaŋ ka Saulo obino adieri.

⁵Daudi oay to kidho kama Saulo gi cwo pere oyido jocokere iye; to Daudi neno kama Saulo gi wod pa Ner Abuner jamituka jolweny pere oyido jonindo iye. Saulo oyido nindo i kambi aka cwo pere jothoko go.

⁶To Daudi penjo Ahimelek Jahiti, gi Abisay omin Yowab (me wot dhako m'ilwoŋo ni Zeruya) ni, “Ŋa ma lakidho kodan i kambi pa Saulo?” Abisay odwoko ni, “Alaloro kodin.”

⁷Ameno Daudi gi Abisay jodonjo i kambi pa Saulo wor, aka Saulo oyido nindo i dier kambi, aka toŋ pere ocom piny cegin gi wiye. Abuner gi jolweny oyido jonindo thoko Saulo.

⁸Abisay owaco ri Daudi ni, “Rwoth omiyin jakwor perin i cingin wor me. Riameno weyi acwow go dicel kende gi toŋ pere won; ak'ocwow go dirio.”

⁹Daudi odwoko Abisay ni, “Ikir'ineki go; rupiri Rwoth bino miyo gir'acula ri ŋatimoro je m'oketh cinge kwoŋ kere ma go won owiro gi mo.”

¹⁰Daudi omedere waco ni, “Paka Rwoth kwo, Rwoth won bino neko go, ka k'obedo ameno go bino tho ka okidho i lweny.

¹¹To Rwoth ogeŋan ketho cingan kwoŋ ŋati ma go won owiro gi mo bedo kere. Weyi wakwanyi toŋ pere g'agwata pere ma pi wakadhi.”

¹²Ameno Daudi okwanyo toŋ gi agwata pi m'oyido nitie yuwiy Saulo, to jokadho. Ongoye ŋati m'oneno jo kosa oŋeyo gim'otimere kosa ocew, joje oyido jonindo, rupiri Rwoth odhiro rijo nindo mapek.

¹³Daudi oŋado to kidho loka man ma milelo wi got bor gi Saulo gin

¹⁴aka okoko to lwoŋo cwo pa Saulo gi Abuner ka waco ama: “Abuner, iwinjan?” Abuner openjo ni, “Meno ŋa ma lwoŋo kere?”

¹⁵Daudi odwoko ni, “Ŋa ma cale in Abuner kwoŋ Joisiraili je! To raŋo ikigwoko kwo pa jadwoŋ perin kere? Pama won me nyatoro moro owok bino neko jadwoŋ perin.

¹⁶Gim'itimo me kiber Abuner! Akwoŋere i nyingi Rwoth makwo ni win joje ber ni witho rupiri wikigwoko jadwoŋ mewin kere ma Rwoth owiro gi mo. Neni! Nikune toŋ pa kere g'agwata pi pere m'oyido nitie yuwiye?”

¹⁷Saulo ocew to niaŋ ni manago obedo dwondi Daudi to penjo ni, “Meno dwondin Daudi? Meno in wodan?” Daudi odwoko ni, “Meno dwondan, jadwoŋ paran, kere.”

¹⁸Daudi omedere waco ni, “Raŋo fodi idwaro ŋeca perin jadwoŋ? Aŋo m'atimo? Aŋo marac m'atimo?

¹⁹Jadwoŋ winji wac paran. K'inen Rwoth am'omiyin mon kodan, miyo go cowirok lamiyo go wiro paro pere; to k'inen obedo ji, lam pa Rwoth opodhi kwoŋ jo. Rupiri jomiyan wok piny Isiraili t'abino i piny m'alamo iye werin pa jopath.

²⁰Riameno ikir'imiy remo paran ooy i piny pa jopath, bor gi Rwoth. Raŋo kere ma Isiraili obino neko an lwaŋino me? Raŋo go dwaran paŋini winyo madudi?”

²¹Saulo odwoko ni, “Atimo gimarac. Dwoki Daudi wodan! Doko akibino temo timo rin gimarac rupiri wor me inwaŋo silwany ma nekan to ikitimo ameno. Neni, atimo gimiŋo aka atimo gimarac swa.”

²²Daudi owaco ni, “Abor perin ee ka jadwoŋ. Weyi acel kwoŋ cwo perin obin woomi.

²³Rwoth miyo kemba ri jono ma jotire gi ji ma jotimo adieri. Konon go omiyan in i cingan to akitimo rin gimarac rupiri Rwoth owirin gi mo bedo kere.

²⁴Neni, paka akoyo kwo perin konon me, Rwoth otim ran amanago bende to bothan i teko je!”

²⁵Saulo owaco ri Daudi ni, “Were womiyin silwany, wodan! Aka ibedi gi loyo i kisi gim'inotimi je.” Daudi okadho i yo pere to Saulo dok peco.