Read dhopadhola 1 Samwiri 27 Bible Online

1 Samwiri 27 - dhopadhola bible

1 Samwiri 27

¹Daudi obedo gi paro ni ndelo acel Saulo bino neko go. Ameno go owaco ni gimaber atima a kwalok kidho piny pa Jofilistia; nyaka Saulo laweyo rangan aka alabedo kam'opanere.

²Ameno Daudi oay gi cwo pere 600 to jokadho bongi kere ma Gath Akis wod pa Mayok.

³Daudi gi cwo pere jogeto Gath gi pecin pajo bongi Akis. Daudi oyido nitie gi mon pere ario, Ahinowam ma wok Yezirel, gi Abigayili ciliendi Nabal ma wok Kamel.

⁴Munyo Saulo owinjo ni Daudi oringo Gath, oweyo rango go.

⁵Daudi owaco ri Akis ni, “K'inen anwaŋo wor wok bongin, weyi abedi i tindi mathin rupiri kiber an bedo kodin i tindi madwoŋ.”

⁶Ameno Akis omiyo go tindi Ziklag, aka me ay'atoŋa m'omiyo Ziklag obedo lim pa kerin je ma jodhumo Yuda.

⁷Daudi obedo piny Filistia ma dwe apar g'aucel.

⁸I hongo ma Daudi gi cwo pere jobedo i piny Filistia, oyido jonyaga gigipiny pa ji ma piny Gesur, Girzi, gi Joamalek m'oyido jobedo iy'adec no wok con. Oyido jokidho kiri Sur tundo piny Misir.

⁹Daudi oyido reyo woko cwo gi mon aka dok gi rombo, dhok, punde, kayina, kiri gi law to dok gi jo bongi Akis.

¹⁰Akis oyido penjo go ni, “Konon ikidho kinyaga kune?” Daudi oyido dwoko go ni jokidho yupiny ma Yuda kosa iy'adec pa jonono pa Yeramel, kosa iy'adec pa Jokena.

¹¹Daudi oyido neko ji je, cwo gi mon, ŋey ongoye ŋati manyalo gik Gath to waco gima go gi cwo pere jotimo. Me a gima Daudi otimo i hongo je ma go obedo Gath.

¹²Kisi ogeno Daudi to waco ni, “Ji pere Joisiraili jodak go swa, ma go ladoŋ ka tiyo ran kwo pere je.”