Read dhopadhola 1 Samwiri 28 Bible Online

1 Samwiri 28 - dhopadhola bible

1 Samwiri 28

¹Munyo hongo moro okadho, Jofilistia jocokere lweny gi Joisiraili. Akis owaco ri Daudi ni, “Niaŋ ni in gi cwo perin wilalwenyo i thenge paran.”

²Daudi odwoko ni, “Meno ber, ilaŋeyo gima ŋeca perin nyalo timo.” Akis owaco ri Daudi ni, “Meno ber alakethin bedo jakur paran.”

³I hongo me Samwiri oyido otieko tho, Joisiraili joywako go, aka joyiko go i tindi pere Rama. Aka Saulo oyido oriemo woko jojwok gi ji ma joluwo gi tipo pa jom'otho i piny Isiraili.

⁴Jolweny pa Jofilistia jobino to jocokere cegin gi tindi Sunem; aka Saulo gi cwo pere jocokere i got Gilbowa.

⁵Munyo Saulo oneno jolweny pa Jofilistia, cunye ocako kirin gi lworo.

⁶To Saulo penjo Rwoth gir'atima, to Rwoth k'odwoko go i lek, kosa gi gima jocway ri Were i wi migam jo oro ma ŋeyo mito pa Were, kosa luwo i jotuci wac Were.

⁷Kenyo Saulo owaco ri cwo pere rango rigo dhako ma luwo gi tipo pa jom'otho ŋey okidhi bonge openji go. Cwo pere jowaco rigo ni nitie dhako ma luwo gi tipo pa jom'otho i tindi Endor.

⁸Ameno Saulo orukere i nger matek niaŋ kwoŋe. Aka munyo piny olokere macol, go gi cwo pere ario jobino bongi dhako no. Saulo owaco ri dhako no ni, “Lwoŋ ran tipo pa ŋati m'akidho waco rin nyinge.”

⁹Dhako no odwoko ni, “Adieri iŋeyo paka Saulo oriemo woko jojwogi gi ji ma luwo gi tipo pa jom'otho i piny Isiraili. To onyo raŋo imito ciko an ŋey onekan?”

¹⁰Saulo okwoŋere ri dhako no i nyingi Rwoth to waco rigo ni ongoye gir'acula m'ibino miyo go.

¹¹Dhako no openjo Saulo ni, “Alwoŋ rin tipo pa ŋa?” Saulo odwoko ni tipo pa Samwiri.

¹²Munyo dhako no oneno tipo pa Samwiri, okoko malo, aka owaco ni, “Raŋo iwondan? In kere Saulo!”

¹³Saulo owaco rigo ni, “Ikir'ilwor. Aŋo m'ineno?” Dhako no odwoko ni, “Aneno were wok piny.”

¹⁴Saulo openjo go ni, “cale nedi?” Dhako no odwoko go ni, “Manago jal m'oti ama wok piny aka oruko kanzu.” Saulo oniaŋ ni manago Samwiri, okulo wiye piny i wor to bwonere.

¹⁵Samwiri openjo Saulo ni, “Raŋo icandan gi kelan malo?” Saulo odwoko ni, “Anitie i teko! Jofilistia jobino lweny kodan, aka Were ojwangan doko kidwokan. Go kidwokan kada i lek kosa luwo i jotuci wac Were. Riameno alwoŋin iwaci ran gir'atima.”

¹⁶Samwiri owaco ri Saulo ni, “Raŋo i penjan k'inen Rwoth ojwangin, aka olokere jakwor perin?

¹⁷Rwoth otimo rin gima go ndelo no owaco rin luwo i an; Rwoth oyeco woko ker wok i cingin to miyo jager perin Daudi.

¹⁸Rupiri ikiwinjo dwondi Rwoth to ikwero reyo woko Joamalek gi gigipiny pajo je, riameno Rwoth otimo rin gime konon.

¹⁹Aka kiri Rwoth bino miyo in gi Joisiraili i cingi Jofilistia; aka dikin in gi wotin wilabino kam'anitie iye. Rwoth lamiyo jolweny pa Joisiraili i cingi Jofilistia.”

²⁰Gima Samwiri owaco obwoko Saulo, aka opodho piny to riere rupiri oyido k'ocemo ndelo no gi wor gipi, aka meni oyido ongoye kwoŋe.

²¹Dhako no okidho bonge to neno nger m'oyido lworo omako go, aka owaco rigo ni, “Mondo jadwoŋ, ajwango kwo paran t'atimo gim'ikwayan.

²²Riameno in bende winji ŋeca perin; weyi atedi rin cemo moro icami ŋey ilimi meni ma woth.”

²³Saulo okwero, aka owaco ni kilacamo gimoro je. To cwo pere ario ma go owotho gi jo jonaŋo go; go oyeyo, aka oay malo to bedo gi madeko.

²⁴Dhako no oredo to thumo nyathi dhiaŋ ma go oyido kwayo. Okwanyo moko ŋano aka otedo mugat ma k'oketh'iye gima miyo mugat yenyo.

²⁵Dhako no otoko ri Saulo gi cwo pere cemo to jocemo. Joay to jokadho wor no.