Read dhopadhola 1 Samwiri 31 Bible Online

1 Samwiri 31 - dhopadhola bible

1 Samwiri 31

¹Jofilistia jolwenyo gi Joisiraili i got Gilbowa. Jofilistia joneko Joisiraili kweth, aka Joisiraili megi joringo kiri gi Saulo kodi wote bende joringo.

²To Jofilistia joriemo jo, aka jomako jo to joneko wot Saulo adek; Yonathan, Abinadab, kodi Malikisua.

³Lweny obedo malieth swa thoko Saulo, aka go won aserin pa jakwor ocwowo go to weyo kwoŋe adholin.

⁴Saulo owaco ri jago pere ni, “Bol abor perin wonekan ŋey Jofilistia ma jok'othumere me jokiri jowonyeran to jonekan.” To jago pere k'otimo ameno, kole obedo gi lworo. Saulo won okwanyo abor pere, ocwowere gine to tho.

⁵Munyo jago pere oneno nike go otho, go bende omako abor pere, ocwowere gine to tho kanyacel gi Saulo.

⁶Ameno apaka Saulo, wote adek, kodi jago pere, kiri gi cwo pere jotho i ndelo no.

⁷Munyo Joisiraili m'oyido jonitie i thenge man, milelo Yezirel kodi m'oyido jonitie yuwok ceŋ ma malawa Yordan jowinjo nike jolweny pa Joisiraili joringo, aka Saulo kodi wote je oneki, joweyo tindi pajo to joringo. Aka Jofilistia jobino to jobed'iye.

⁸Yawere odikin munyo Jofilistia jogik kwanyo gigipiny kwoŋ delkwoŋ Joisiraili ma jotho, jonwaŋo delkwoŋ Saulo kodi wote joriere wi got Gilbowa.

⁹Joŋado ŋuti Saulo, jokwanyo gilweny pere, aka jooro jomikwenda gi jo wotho i piny Filistia paka rom tero wac maber ri werin pajo kodi ji pajo.

¹⁰Joketho gilweny pere i ot pa were pajo m'ilwoŋo ni Asitate, aka joguro delkwoŋ Saulo i kor cel ma tindi Bethsan.

¹¹Munyo ji ma Yabes i Gibeya jowinjo gima Jofilistia jotimo ri Saulo,

¹²cwo ma jomiseni joay to jocako woth wor gipi, aka jokwanyo delkwoŋ Saulo kodi wote wok i kor cel ma tindi Bethsan, jodwoko gi jo Yabes, aka jowaŋo kenyo.

¹³Jotero cokin pajo, aka joyiko i tiendi yath m'ilwoŋo ni tamarisk i tindi Yabes, to joriyo ma ndelo abirio.