Read dhopadhola 1 Samwiri 5 Bible Online

1 Samwiri 5 - dhopadhola bible

1 Samwiri 5

¹Munyo Jofilistia jomako Kakan ma Cikirok pa Were, jotiŋo wok Ebeneza to jotero i tindi Asidod.

²Jotero i ot ma lamo were pajo m'ilwoŋo ni Dagon to joketho cegin gi cal pa were no.

³Yawere odikin munyo ji ma Asidod jokidho i ot ma lamo Dagon, jonwaŋo ni Dagon oyido opodho piny gi nyime, ruwaŋ Kakan ma Cikirok pa Rwoth. Jotiŋo malo Dagon to jodwoko i kabedo pere.

⁴To munyo jocewi yawere odikin doko jonwaŋo Dagon opodho gi nyime piny ruwaŋ Kakan ma Cikirok pa Rwoth. Rume cinge ario je gi wiye oyido jotur to joywore kiri i dhiot; aka nyaka kore kende am'oyido odoŋ.

⁵Meno am'omiyo jocway ri Dagon i wi migam pere kodi jono je ma jolamo go i ot ma lamo go Asidod jokal'akala kenyo ma jokinyon kiri gi konon.

⁶Rwoth omiyo ji ma Asidod gir'acula matek ma bende obwoko jo. Okelo rijo kodi joger pajo akwota kwoŋ.

⁷Munyo ji ma Asidod joneno gim'oyido timere, jowaco ni, “Kakan ma Cikirok pa Rwoth pa Joisiraili kiripi doŋ gi wan; rupiri cingi go pek swa kwoŋ wan kodi Dagon were mawan.”

⁸Ameno jodhiro jomoro bongi rwodhe pa Jofilistia abic to jolwoŋo jo kanyacel to jopenjo jo ni, “Watim aŋo gi Kakan ma Cikirok pa Were pa Joisiraili?” To rwodhe no jodwoko ni, “Weyi Kakan ma Cikirok pa Were pa Joisiraili woter Gath.” Ameno to jokodo Kakan ma Cikirok pa Were pa Joisiraili kenyo.

⁹To munyo Kakan ma Cikirok otundo kenyo, Rwoth omiyo tindi no gir'acula to kelo kirin swa. Omiyo ji ma tindi no gir'acula ma two akwota kwoŋ, nyithindho gi jodongo parom.

¹⁰Ameno doko jodhiro Kakan ma Cikirok pa Were i tindi pa Jofilistia m'ilwoŋo ni Ekiron; to munyo Kakan ma Cikirok pa Were otundo Ekiron, ji ma Ekiron joywak ni, “Jokelo Kakan ma Cikirok pa Rwoth pa Joisiraili ka neko wan kiri gi ji mawan.”

¹¹Doko to jolwoŋo rwodhe pa Jofilistia kanyacel to jowaco rijo ni, “Dwoki win Kakan ma Cikirok pa Were pa Joisiraili kama ripo ni wobed'iye, wokiri woneki wan gi ji mawan.” Kirin obedo i tindi gipi rupiri Were oyido miyo jo gir'acula mapek.

¹²Kiri ji ma k'otho je two akwota kwoŋ omako jo; to ji ma tindi je joywak ri werin pajo ni jowokony jo.