Read dhopadhola 1 Samwiri 7 Bible Online

1 Samwiri 7 - dhopadhola bible

1 Samwiri 7

¹To ji ma Kiriath Yerim jobino omo Kakan ma Cikirok pa Rwoth aka jokelo i ot pa Abinadab m'oyido bedo i wi tendere; to joketho gicen wode m'ilwoŋo ni Eliazar bedo jakur ma Kakan ma Cikirok pa Rwoth.

²Kakan ma Cikirok pa Rwoth ocowo Kiriath Yerim hongo malac, oro piero ario gipi. I hongo me Joisiraili je joywak ri Rwoth wokonyi jo.

³Ameno Samwiri owaco ri Joisiraili je ni, “Ka wigik bongi Rwoth g'adundo mewin je, wiripo ketho gicen werin pa jopath kodi cal pa Asitate were mewin madhako. Miyere win kicutho ri Rwoth aka wilam go kende, aka go labotho win kwoŋ meni pa Jofilistia.”

⁴Ameno Joisiraili joketho gicen cal pa Bal gi Asitate, to jolamo Rwoth kende.

⁵Kenyo to Samwiri lwoŋo Joisiraili je romo gi go Mizipa, ka waco ama: “Alakwayo Rwoth riwin kenyo.”

⁶Jocokere Mizipa aka jotwomo pi moro to jokonjo ri Rwoth paka cowirok, aka joriyo ndelo no gipi. Jowaco ni, “Wanyeko ruwaŋ Rwoth.” Aka Samwiri oyido winjo banjin pa Joisiraili gi Mizipa.

⁷Munyo Jofilistia jowinjo ni Joisiraili jocokere Mizipa, rwodhe abic pa Jofilistia jokidho gi jolweny pajo monjo Joisiraili. Aka munyo Joisiraili jowinjo, lworo omako jo.

⁸To jowaco ri Samwiri ni, “Ywak m'ikikeŋ ri Rwoth Were mawan riwan, wonyali botho wan wok i cingi Jofilistia.”

⁹To Samwiri kwanyo nyathi rombo ma fodi dhoth to miyo Rwoth paka cowirok awaŋa; aka Samwiri oywaki ri Rwoth wokonyi Joisiraili to Rwoth dwoko go.

¹⁰To munyo nyaka Samwiri miyo cowirok awaŋa no, Jofilistia jocore cegin monjo Joisiraili; to Rwoth mor gi dwonde ma meni wok i polo kwoŋ jo to jonywowere; aka Were omiyo Jofilistia ringo.

¹¹To Joisiraili joriemo Jofilistia wok Mizipa tundo kiri Bethkar, k'onyo joneko jo i yo malomalo.

¹²Samwiri okwanyo tele to ketho i dier Mizipa kodi Yesana to lwoŋo ni Ebeneza[2] to waco ni, “Rwoth okonyo wan tundo ka.”

¹³Joisiraili jokengila Jofilistia, aka Rwoth doko k'oyeyo jo monjo Joisiraili i lowo pajo i hongo je ma Samwiri otelo Joisiraili.

¹⁴Tindin je ma Jofilistia oyido jomako i dier Ekiron gi Gath, Rwoth odwoko ri Joisiraili. Aka siem obedo i dier Joisiraili kodi Jokanan.

¹⁵Samwiri otelo Joisiraili i hongo je m'oyido go fodi kwo.

¹⁶Kisi oro go oyido wotho thoko Bethel, Gilgal, kodi Mizipa ka winjo banjin pa Joisiraili.

¹⁷Ka ocowo, go oyido dok Rama kole peco pere oyido nikenyo aka bende oyido go winjo banjin pa ji kenyo. I Rama, go ogeto ri Rwoth migam.