Read dhopadhola 1 Samwiri 9 Bible Online

1 Samwiri 9 - dhopadhola bible

1 Samwiri 9

¹Obedo jal moro m'oŋaŋ aka jamaker ma wok i nono pa Benyamin, nyinge oyido Kisi. Go oyido wod pa Abiel aka nyakwar Zeror; aka nywole i ot pa Bekorath, adec ma nono pa Afiya.

²Kisi oyido nigi wode m'ilwoŋo ni Saulo, m'oyido jayac maŋon swa. Ŋono pere oyido kipimere gi nyatoro moro je ma Isiraili aka oyido bende go loyo ji je ma Isiraili i boro.

³Ndelo acel, punde pa Kisi jorwenyo. Kisi owaco ri wode Saulo ni, “Kwany acel kwoŋ ŋecin wikidhi wirangi punde.”

⁴Joluwo gi piny matendere tendere Efrayim iy'adec ma Salisa to jok'onwaŋo punde. Ameno joluwo iy'adec ma Salim to punde oyido jongoye kenyo. To joluwo iy'adec ma Benyamin, to je jok'onwaŋo punde.

⁵Munyo jotundo iy'adec m'ilwoŋo ni Zuf, Saulo owaco ri ŋeca pere ni, “Weyi wadok peco, ka k'obedo ameno baba nyalo weyo rembo ri punde to cako rembo riwan.”

⁶Ŋeca no odwoko Saulo ni, “Neni, nitie nyatoro pa Were i tindi me, aka iworo go swa rupiri gima go waco je bedo adieri. Weyi wakidhi bonge, aka kono go nyalo waco riwan kama wanyalo nwaŋo iye punde no.”

⁷Saulo openjo ŋeca pere ni, “To ka wakidho bonge, aŋo ma walatero rigo? Mugat mawan m'oyido watiŋo orumo, aka wangoye gi mic ma wanyalo tero rigo. Aŋo ma wanitie gine?”

⁸Ŋeca no odwoko Saulo ni, “Anitie gi nyaka penzi moro ka; alamiyo go to waco riwan kama wanyalo nwaŋ'iye punde.”

⁹Con mere i piny Isiraili, ka nyatoro okidho penjo kwoŋ Were, oyido waco ni, “Biye, weyi wakadhi bongi jawaci gima bino yuwaŋe.” Kole ŋata pama ilwoŋo ni jatuci wac Were con mere oyido ilwoŋo ni jawaci gima bino timere yuwaŋe.

¹⁰To Saulo waco ri ŋeca pere ni, “Meno paro maber! Biye wakadhi.” Ameno to jokadho i tindi kama nyatoro pa Were oyido nitie iye.

¹¹Munyo fodi joidho tendere ma kidho i tindi no, joromo gi nyir mogo mafoth munyo jokidho kulo. To jopenjo jo ni, “Janeno nitie i tindi?”

¹²Nyir no jodwoko ni, “Ey go nitie. Go otelo yu wiwin. Ka wiredo wilamako go. Tekin widonjo i tindi won ama wilanwaŋo go. Go nyaka obino i tindi pama won me, rupiri ji konon jokidho miyo cowirok i kacowirok. Ji m'olwoŋ jok'ocak cemo cuka go tundo rupiri go ripo kutho kwayo Were womiy cowirok silwany. Ka wikidho pama, wilaneno go mafodi go k'okidho cemo i kacowirok.”

¹⁴Ameno Saulo gi ŋeca pere jokidho i tindi; aka munyo nyaka jodonjo i tindi, joneno Samwiri munyo bino yubongi jo munyo go oyido wotho kidho i kacowirok.

¹⁵Oyido paka nyoro mere mafodi Saulo k'obino, Rwoth oyido otieko waco ri Samwiri ni

¹⁶“Dikin kapa sawa me aladhiro rin nyatoro ma wok i nono pa Benyamin, iwir go gi mo bedo kere pa ji paran Isiraili. Go bino botho ji paran wok i cingi Jofilistia. Atieko neno candirok pa ji paran aka atieko winjo ywak pajo ri kony.”

¹⁷Munyo Samwiri oneno Saulo, Rwoth owaco rigo ni, “Me a jal ma nyoro aluwo rin kwoŋe! Go ama bino dhumo ji paran.”

¹⁸Kenyo to Saulo kidho bongi Samwiri m'oyido nitie cegin gi waŋkac, to penjo ni, “Waci ran nikune ot pa jawaci gima bino yuwaŋe?”

¹⁹To Samwiri dwoko go ni, “Aŋat'abedo jawaci gima bino yuwaŋe; kadhi win yuwiyan i kacowirok. Wijario je konon wilacemo kanyacel kodan; aka dikin odikin alawaco riwin gima nitie i paro mewin t'aweyo wikadho.

²⁰To wikiri wirembi ri punde mewin ma jorwenyo ndelo adek yucen; rupiri jocowo nwaŋirok. Aka ŋa ma Joisiraili joyenyo swa? Ka k'obedo in kodi ot pa benin?”

²¹Saulo odwoko ni, “An ajanono pa Benyamin, nono mathin loyo kwoŋ nonin je i Isiraili, aka peco mawan ama sisiri swa i nono pa Benyamin; to raŋo iluwo kodan i nger me?”

²²Kenyo to Samwiri kwanyo Saulo kodi ŋeca pere to tero jo i kisika madwoŋ to miyo jo kabedo yuwiy ji piero adek m'oyido olwoŋi.

²³To Samwiri waco ri jatedo ni, “Keli adec ma riŋo ma nende amiyin t'awaco rin ni ikethi gicen.”

²⁴Ameno to jatedo kwanyo bat dhiaŋ kodi adec ma luwo bat to ketho ruwaŋ Samwiri. To Samwiri waco ri Saulo ni, “Neni, gim'oyido okethi gicen okethi ruwaŋin. Cami; rupiri oyido okan rin tundo i hongo m'oyerere, ŋey inyal cemo gi wendo.” I ndelo no to Saulo cemo kanyacel gi Samwiri.

²⁵Munyo joloro wok i kacowirok, to jogik i tindi, opedhi ri Saulo kanindo i wi ot to go nindo.

²⁶Munyo piny oyawere, Samwiri olwoŋo Saulo wok i wi ot ni, “Ay malo, aka aweyin ikadhi yo perin.” To Saulo ay, aka go gi Samwiri joluwo royo acel.

²⁷Munyo jotundo i kew ma tindi, Samwiri owaco ri Saulo ni, “Waci ri ŋeca perin otel yuwiy wan, aka ka go ocowo kadhi, icungi ma hongo moro, ŋey awaci rin gima Were owaco.”