Read digo 2 Samueli 1 Bible Online

2 Samueli 1 - digo bible

2 Samueli 1

¹Bada ya chifo cha Sauli, hipho Daudi ariphouya kula kpwendashinda Aamaleki, wakala siku mbiri hiko Zikilagi.

²Siku ya hahu, kpwakpwedza mutu kula kambi ya Sauli, nguwoze zikakpwanyulwa, chisha ana vumbi mwakpwe chitswani kuonyesa ana sonono. Ariphofika kpwa Daudi, wazama photsi, kumupha ishima.

³Daudi achimuuza, “Ula kuphi?” Iye mutu achijibu achiamba, “Nkatiya kula kambi ya Iziraeli.”

⁴Daudi achimuuza, “Hebu niambira, gakaphiyadze?” Achiamba, “Anajeshi akachimbira kula vihani, chisha anji aho akafwa, piya Sauli naye na mwanawe Jonathani akafwa.”

⁵Ndipho Daudi achimuuza yuya barobaro ariyemrehera habari, “Unamanyadze kukala Sauli na mwanawe Jonathani akafwa?”

⁶Hiye barobaro achiamba, “Kpwa bahati nono nákala dzulu ya mwango wa Giliboa, nchimuona Sauli akagandamira fumore, na magari ga kuvwehwa ni farasi ga maadui na aphirikie a phephi na kummamanira.

⁷Naye aripholola nyuma, waniona, achiniiha. Nchijibu, ‘Ee.’

⁸Achiniuza, ‘U ani we?’ Nchimjibu nchiamba, ‘Mino ni Muamaleki.’

⁹Achiniamba, ‘Sengera phephi nami, uniolage, mana narumira sana ela roho yangu bado ichere moyo.’

¹⁰Phahi, naima phephi naye, nchimuolaga, kpwa sababu namanya kukala kpwa kpweli kandawezakupona bada ya kugbwa. Nami naihala tadzi iriyokala mwakpwe chitswani na chikuku chirichokala mwakpwe mkpwononi nkavireha kpwa bwana wangu.”

¹¹Ndipho Daudi wagbwira nguwoze achizikpwanyula na atu osi ariokala phamwenga naye achihenda dza vivyo.

¹²Akala na huzuni, achirira na achifunga hata dziloni, kpwa ajili ya Sauli na mwanawe Jonathani na kpwa ajili ya Jeshi ra Mwenyezi Mlungu yani Aiziraeli, kpwa sababu akafwa kpwa upanga.

¹³Naye Daudi achimuuza yuya barobaro ariyekala anamʼbaza habari, “Ula kuphi we?” Wamjibu achiamba, “Mino ni Muamaleki, mjeni nsagalaye tsiiyo ya Iziraeli.”

¹⁴Daudi achimuuza, “Kpwadze kuyaogopha kumuolaga mmwagirwa mafuha wa Mwenyezi Mlungu?”

¹⁵Ndipho Daudi achimuiha mmwenga wa barobaro, achimuambira, “Muolage.” Phahi achimdunga fumo achimuolaga.

¹⁶Mana Daudi kala akamuambira, “Milatsoyo na ikale dzuluyo mwenye, mana ukadzisema mwenye, ukaamba, ‘Nkamuolaga mmwagirwa mafuha wa Mwenyezi Mlungu.’ ”

¹⁷Phahi huno ndio wira wa sonono ambao Daudi wautunga ili kumririra Sauli na mwanawe Jonathani.

¹⁸Iye walagiza wira huno ufundzwe atu a Juda. Wira huno wiihwa uha (nao waandikpwa kpwenye chitabu cha Jashari[1]). Wira wenye unaamba hivi,

¹⁹Atu ario fahariyo, ee Iziraeli, akaolagbwa mwako myangoni! Lola, masujaa gachivyogbwa gakafwa!

²⁰Msigasemurire mambo higa hiko Gathi, msigatangaze hiko njira za Ashikeloni, sedze achetu a Chifilisti akahererwa, ana achetu a atu asiotiywa tsatsani akaona raha sana.

²¹Mwino myango ya Giliboa, dzulu yenu kusikalepho manena wala mvula, wala minda ivyalayo chitu. Mana kuko ngao za masujaa zatiywa najisi, ngao ya Sauli, taindapakpwa mafuha tsona.

²²Uha wa Jonathani kala una nguvu, na upanga wa Sauli wahenda kazi ngumu. Amwaga milatso ya maadui gao, na achidunga miri ya masujaa.

²³Sauli na Jonathani amendzwa na ahamira atu. Maishani wala chifoni taayatengbwa, akala epesi a mairo kuriko makozi gaurukavyo, akala na nguvu kuriko simba.

²⁴Mwino achetu a Iziraeli, mririreni Sauli ambaye wakuvwikani mavwazi ga kundu ga bei, ariyepamba nguwo zenu na mapambo ga zahabu.

²⁵Lola, masujaa achivyogbwa kahi-kahi ya viha! Jonathani akaolagbwa myangoni.

²⁶Ninasononeka kpwa ajiliyo, mwenehu Jonathani, Kala uchinimendza sana. Mendzwayo kpwangu yakala ya ajabu, Kutsupa mendzwa ya achetu.

²⁷Lola vyo masujaa gachivyogbwa gakafwa! Na silaha za viha tazina mana tsona!