Read digo 2 Samueli 22 Bible Online

2 Samueli 22 - digo bible

2 Samueli 22

¹Daudi wamuimbira Mwenyezi Mlungu maneno ga wira huno, hipho siku Mwenyezi Mlungu ariphomtivya kula mikono ya avihae osi na kula mkpwono wa Sauli;

²achiamba, “Mwenyezi Mlungu ndiye mwamba wangu, na ngome yangu, na muokoli wangu.

³Mlungu ni mwamba wangu, iye ndiye chimbiriro rangu ngao yangu, na nguvu ya wokofu wangu. Iye ndiye ngome yangu, na chimbiriro rangu, muokoli wangu, anitivyaye na atu a fujo.

⁴Námvoya Mwenyezi Mlungu astahiliye kutogolwa, naye achinitivya na maadui gangu.

⁵Maimbi ga chifo ganizunguluka, mafuriko ga kuangamiza ganibwiningiza.

⁶Kowa za kuzimu zanilinga-linga, mihambo ya chifo yanizangira.

⁷Katika kugaya kpwangu námuiha Mwenyezi Mlungu, námririra Mlungu wangu. Naye wasikira sauti yangu kula mo mwakpwe nyumbani, masikiroge gachiphundza chiriro changu.

⁸Yo tsi yasumba na ichikakama, misingi ya mlunguni ichisumba kpwa sababu Mlungu kala akatsukirwa.

⁹Mosi wafuka kula mwakpwe pulani, moho uochao uchituluka kula mwakpwe mromoni, makala ga moho gachituluka kula mumo.

¹⁰Mlunguni wakuzamisa achitserera, ingu dziru richikala ri tsini ya maguluge.

¹¹Wapanda dzulu ya kerubi achiuruka. Achionewa dzulu ya mapha ga phepho.

¹²Wahenda jiza rikale hemare chiromzunguluka, maingu maziho ga mvula.

¹³Makala ga moho, gaaka kula kpwa nyo mwanga mkali uriokala mbereze.

¹⁴Mwenyezi Mlungu wapiga msindo kula mlunguni, iye Ariye Dzulu Kuriko Vyosi wakota kululu.

¹⁵Wajeza mivi, achitsamula maaduige. Waatsuphira limeme, achiachimbiza.

¹⁶Ndipho mikono ya bahari ichioneka, na misingi ya dunia ichifwenulwa, kpwa kudemurirwa ni Mwenyezi Mlungu, kpwa mvumo wa pumuzi ya kula mwakpwe pulani.

¹⁷Wagolosa mkpwonowe kula dzulu, achinigbwira, achinituluza kula madzi manji.

¹⁸Wanitivya na maadui angu enye mkpwotse, hinyo arionimena, mana kala ana mkpwotse zaidi yangu.

¹⁹Anivamia wakati kala nagaya, ela Mwenyezi Mlungu achinikanira.

²⁰Achinituluza achiniphirika pharipho nafwasi, achinitivya kpwa kukala kala anahamirwa ni mimi.

²¹Mwenyezi Mlungu wanihendera sawa-sawa na haki yangu, waniripha sawa-sawa na uswafi wa mikono yangu.

²²Mana nágbwira njira za Mwenyezi Mlungu, na siyamricha Mlungu wangu, kpwa kuhenda uyi.

²³Mana malagizoge gosi nagagbwira, na amurize, siyaziricha.

²⁴Siyakala na hatiya mbereze, nádzizuwiya nsihende dambi.

²⁵Phahi Mwenyezi Mlungu akaniripha sawa-sawa na haki yangu, sawa-sawa na uswafi wangu mbereze.

²⁶Kpwa mutu muaminifu, unadzionyesa kukala u muaminifu, kpwa mutu asiye na kosa, unadzionyesa kukala kuna makosa,

²⁷kpwa mutu achiyedzitakasa unadzionyesa kukala u mtakatifu, ela kpwa mutu mui unadzionyesa kukala u msiru.

²⁸Unaativya atu a pole, ela unaalola atu adziunulao, ili uatsereze.

²⁹Kpwa kpweli uwe Mwenyezi Mlungu, u taa yangu. Mwenyezi Mlungu ukuningʼazira naphokala jizani.

³⁰Kpwa msadao, ninashambulia jeshi, kpwa msada wa Mlungu wangu ninashinda midzi yenye ngome.

³¹Njira ya Mlungu taina ila, ahadi ya Mwenyezi Mlungu ni ya kukuluphira! Iye ni ngao kpwa osi amchimbirirao.

³²Takuna Mlungu wanjina isiphokala Mwenyezi Mlungu. Takuna mwamba wanjina isiphokala Mlungu wehu.

³³Mlungu ndiye chimbiriro rangu renye nguvu, akahenda njira yangu ikale salama.

³⁴Anahenda magulu gangu, gakale dza ga kulungu, na kuniwezesha niime kpwenye myango.

³⁵Nkunifundza kupigana viha, ili mikono yangu iweze kutonyola uha wa shaba.

³⁶Nawe ukanipha ngaoyo ya ushindi, na msadao ukanihenda nkale mutu mkpwulu.

³⁷Ukahenda njira yangu ikale pana, na magulu gangu tagahereza.

³⁸Názoresa maadui gangu hadi nchigagbwira, nami siyalola nyuma hadi gariphoangamizwa.

³⁹Nágapiga hadi gachigbwa phangu maguluni, nago tagawezere kuunuka tsona.

⁴⁰Wanipha mkpwotse wa kupigana viha, na uchihenda maadui gangu gachite mavwindi mbere zangu.

⁴¹Wahenda maadui gangu ganichimbire, nami nkuangamiza osi animenao.

⁴²Aririra msada ela taphana ariyeativya, amririra Mwenyezi Mlungu, ela ye kayaajibu.

⁴³Náasaga-saga achikala dza vumbi ra tsi, nchiavyoga dza tope za njirani.

⁴⁴Uwe waniokola kula kpwa atu angu ariolonda kunishambuliya, uchiniika nikale mfalume wa mataifa. Atu nsioamanya akakala tsini yangu.

⁴⁵Ariphosikira habari zangu tu, nyo ajeni anitii, achedza na achidzitsereza mbere zangu.

⁴⁶Ajeni avundzika moyo, achituluka kula mwao ngomeni kuno anakakama.

⁴⁷Mwenyezi Mlungu a moyo! Naatogolwe hiye ariye mwamba wangu! Náaunulwe Mlungu wa wokofu wangu.

⁴⁸Iye ndiye Mlungu aniriphiziraye chisasi, aikaye mataifa tsini yangu,

⁴⁹aniokolaye kula kpwa maadui gangu. Waniunula dzulu ya atu anipingao, na uchinitivya na atu a fujo.

⁵⁰Kpwa hivyo, nindakulavira shukurani kahi za mataifa, uwe Mwenyezi Mlungu, nami ndaimba mawira ga kukutogola.

⁵¹Mlungu nkumupha mfalumewe ushindi mkpwulu, na kumuonyesa mendzwa isiyosika hiye mmwagirwa mafuhawe, yani Daudi na chivyaziche hata kare na kare.”