Read digo 1 Nyakati 16 Bible Online

1 Nyakati 16 - digo bible

1 Nyakati 16

¹Chisha arireha sanduku ra Mlungu na achiriika kahi-kahi ya hema ambaro kala Daudi akarichita kpwa ajili hiyo. Alafu alavya sadaka za kuochwa na sadaka za amani mbere za Mlungu.

²Naye Daudi ariphomala kulavya sadaka za kuochwa na sadaka za amani, waabariki atu kpwa dzina ra Mwenyezi Mlungu,

³tsona achiaganyira chila mutu wa Iziraeli, mlume kpwa mchetu bofulo, phande ra nyama na gande ra zabibu.

⁴Zaidi ya hivyo, Daudi watsambula Alawi anjina akale a huduma mbere za sanduku ra Mwenyezi Mlungu, kuika kumbukumbu, kulavya shukurani na kutogola Mwenyezi Mlungu, Mlungu wa Iziraeli.

⁵Asafu kala ndiye mkpwulu, wa phiriwe kala ni Zakariya, alafu Jeieli, Shemiramothi, Jehieli, Matithia, Eliabu, Benaya, Obedi-Edomu na Jehieli. Hinyo ni apigadzi vinanda na ngephephe, Asafu kala ni mpigadzi matoazi.

⁶Nao alavyadzi-sadaka Benaya na Jahazieli kano kpwa kano kala ni apigadzi tarumbeta mbere za sanduku ra chilagane ra Mlungu.

⁷Iyo ndiyo siku ambayo Daudi walagiza kpwa kano ya kpwandza kukala Asafu na abarie amlavire Mwenyezi Mlungu shukurani kpwa kuimba wira huno:

⁸Mshukuruni Mwenyezi Mlungu, mvoyeni; Amanyiseni mataifa mambo arigohenda.

⁹Muimbireni, imbani mawira ga kumtogola. Semurirani mahendoge gosi ga ajabu.

¹⁰Hendani ngulu kpwa sababu ya dzinare takatifu. Hinyo amuogophao Mwenyezi Mlungu naahererwe.

¹¹Muendzeni Mwenyezi Mlungu na nguvuze chila wakati londani kukala aripho iye.

¹²Tambukirani mahendo ga ajabu arigohenda, vilinjevye na uamuliwe ariolavya.

¹³Mwimwi chivyazi cha Iziraeli mtumishiwe, mwimwi chivyazi cha Jakobo, atue ariokutsambulani.

¹⁴Iye, Mwenyezi Mlungu, ndiye Mlungu wehu, uamuliwe wa haki unaonekana duniani kosi.

¹⁵Iye anatambukira chilaganeche cha kare na kare, na anatambukira ahadiye hadi vivyazi elufu.

¹⁶Chilagane arichoika na Burahimu, na ahadi ariyomuapira Isaka.

¹⁷Ariyomuhakikishira Jakobo dza amuri, kpwa Iziraeli dza chilagane cha kare na kare,

¹⁸achiamba, “Ndakupha tsi ya Kanani ikale seemu ya urisi wenu.”

¹⁹Ariphokala ni achache, ee achache sana, na ajeni mumo,

²⁰atangatanga kula taifa hadi taifa, kula ufalume mmwenga hadi wanjina.

²¹Kayamruhusu yeyesi aaonere, waademurira afalume kpwa sababu yao.

²²Achiaambira, “Msigute apakpwa mafuha[14] angu, wala msiahende mai manabii angu.”

²³Muimbireni Mwenyezi Mlungu dunia yosi! Chila siku tangazani wokofuwe!

²⁴Tangazirani mataifa gosi ngumaye, gaambireni makabila gosi kuhusu mahendoge ga ajabu.

²⁵Mana Mwenyezi Mlungu ni mkpwulu naye anastahili kutogolwa, iye anafwaha kuogophewa kuriko milungu yosi.

²⁶Mana milungu yosi ya mataifa ni vizuka tu, ela Mwenyezi Mlungu waumba mlunguni.

²⁷Ishima na ukulu u mbereze, iye ndiye chandzo cha nguvu na furaha.

²⁸Mupheni Mwenyezi Mlungu, mwi atu phapha duniani, mupheni Mwenyezi Mlungu nguma na nguvu.

²⁹Mupheni Mwenyezi Mlungu nguma inayofwaha. Reheni sadaka na mwedze mbereze! Muabuduni Mwenyezi Mlungu kpwa sababu ya unono wa utakatifuwe,

³⁰dunia yosi naikakame mbereze, dunia yiimara taisumbisika.

³¹Mlunguni nakule shangbwe na dunia ihererwe, nao agombe kahi za mataifa aambe, “Mwenyezi Mlungu anatawala!”

³²Bahari na vyosi virivyo mumo navivume. Minda na vyosi virivyo mumo navipige njerejere kpwa raha!

³³Ndipho mihi ya tsakani indaimba kpwa raha mbere za Mwenyezi Mlungu, kpwa kukala aredza aamule dunia.

³⁴Mshukuruni Mwenyezi Mlungu mana iye ni mnono; kpwa kukala mendzwaye isiyosika ni ya kare na kare.

³⁵Namwi mundaamba: “Hutivye, ee Mlungu utivyaye, hukusanye na u hutivye kula kahi ya mataifa, huphahe kurishukuru dzinaro takatifu, na hushangilie kuno hunakutogola.”

³⁶Naatogolwe Mwenyezi Mlungu, Mlungu wa Iziraeli, hangu kare na kare hadi kare na kare. Chisha atu osi achiamba, “Amina!” Mtogoleni Mwenyezi Mlungu.

³⁷Phahi Daudi waaricha hiko mbere za sanduku ra chilagane ra Mwenyezi Mlungu, Asafu na nduguze, ili ahudumu mbere za sanduku kano kpwa kano dza vyo ilondwavyo kpwa iyo siku.

³⁸Na piya Obedi-Edomu na nduguze mirongo sita na anane arichwa ahudumu nao. Obedi-Edomu mwana wa Jeduthuni na Hosa akale arindzi a ryango.

³⁹Daudi waricha Sadoki yuya mlavyadzi-sadaka na nduguze, hara alavyadzi-sadaka mbere za hema ra Mwenyezi Mlungu kahi za phatu pha dzulu pha ibada hiko Gibioni,

⁴⁰ili amlavire Mwenyezi Mlungu sadaka za kuochwa dzulu ya phatu pha kulavira sadaka za kuochwa chila siku, ligundzu na dziloni, sawa-sawa na gosi garigoandikpwa ndani ya shariya ya Mwenyezi Mlungu, ariyoalagiza Aiziraeli.

⁴¹Phamwenga nao kala ni Hemani na Jeduthuni na hinyo anjina ariotsambulwa na madzina gao gachihadzwa kukala alavye shukurani kpwa Mwenyezi Mlungu, manage mendzwaye taisika ta kare na kare.

⁴²Hemani na Jeduthuni kala ni apiga tarumbeta na matoazi na kpwa ajili ya zumo na piya akala avumbadzi a vifwaya vyanjina vya mawira ga kumvwinira Mlungu. Ana a Jeduthuni atsambulwa arinde ryango.

⁴³Chisha atu osi achiphiya vyao chila mmwenga kpwakpwe kaya, naye Daudi achiphiya kaya kpwendabariki atue.