Read digo 1 Nyakati 24 Bible Online

1 Nyakati 24 - digo bible

1 Nyakati 24

¹Mazuma ga ana a Aruni kala ni higa. Aruni anae ni Nadabu, Abihu, Eliazari na Ithamari.

²Ela Nadabu na Abihu afwa kabila ya ise yao kufwa na kala taana ana, ndipho Eliazari na Ithamari achikala alavyadzi-sadaka.

³Daudi waapangira mazuma chivyazi cha Aruni achiterywa ni Sadoki wa mbari ya Eliazari na Ahimeleki wa mbari ya Ithamari, kulengana na mpango wa kazi zao kpwenye utumishi wao.

⁴Kpwa vira aphahikana akulu anji kula kpwa chivyazi cha Eliazari kuriko kpwa chivyazi cha Ithamari, chivyazi cha Eliazari chapangbwa makundi tsini ya akulu kumi na sita na chivyazi cha Ithamari achipangbwa makundi tsini ya akulu anane.

⁵Aganywa kpwa kupigirwa kura bila upendeleo, mana kala kuna akulu a kuhumika phatu phatakatifu na atumishi a Mlungu kahi za ana a Eliazari na ana a Ithamari.

⁶Shemaya mwana wa Nethaneli, muandishi, ambaye kala ni Mlawi, waandika madzina gao mbere za mfalume na mbere za akulu: mlavyadzi-sadaka Sadoki na Ahimeleki mwana wa Abiathari, akulu a mbari za alavyadzi-sadaka na za Alawi. Mbari mwenga yatsambulwa kula kpwa Eliazari na yanjina kula kpwa Ithamari.

⁷Kura ya kpwandza yamgbwerera Jehoyaribu na ya phiri Jedaya,

⁸ya hahu Harimu, ya ne Seorimu,

⁹ya tsano Malikija, ya sita Mijamini,

¹⁰ya sabaa Hakozi, ya nane Abija,

¹¹ya tisiya Jeshuwa, ya kumi Shekania,

¹²ya kumi na mwenga Eliashibu, ya kumi na mbiri Jakimu,

¹³ya kumi na tahu Hupa, ya kumi na ne Jeshebeabu,

¹⁴ya kumi na tsano Biliga, ya kumi na sita Imeri,

¹⁵ya kumi na sabaa Heziri, ya kumi na nane Hapizezi,

¹⁶ya kumi na tisiya Pethahiya, ya mirongo miiri Jehezikeli,

¹⁷ya mirongo miiri na mwenga Jakini, ya mirongo miiri na mbiri Gamuli,

¹⁸ya mirongo miiri na tahu Delaya, ya mirongo miiri na ne Maazia.

¹⁹Hivyo ndivyo arivyopangirwa kazi katika huduma zao chila kundi rinaphokala na zuma ndani ya Nyumba ya kuvoya Mlungu, sawa-sawa na arivyoikirwa malagizo ni mkare wao Aruni, dza vyo Mwenyezi Mlungu, Mlungu wa Iziraeli arivyomuamuru.

²⁰Na kula kpwa ana anjina a Lawi: mmwenga kula kpwa chivyazi cha Amuramu kala ni Shebueli na kula kpwa chivyazi cha Shebueli kala ni Jedeya.

²¹Kula chivyazi cha Rehabiya, mkpwulu wao kala ni Ishia.

²²Kula chivyazi cha Ishari kala ni Shelomothi na kula kpwa Shelomothi kala ni Jahathi.

²³Nao ana a Heburoni, mkpwulu wao kala ni Jeria, wa phiri kala ni Amariya, wa hahu kala ni Jahazieli na wa ne kala ni Jekameamu.

²⁴Kula chivyazi cha Uzieli kala ni Mika na kula chivyazi cha Mika kala ni Shamiri.

²⁵Kula kpwa chivyazi cha Ishia ndugungbwa wa Mika kala ni Zakariya.

²⁶Ana a Merari kala ni Mahili na Mushi. Kahi za ana a Jaazia kala kuna Beno.

²⁷Adzukulu a Merari kutsupira Jaazia ni Beno, Shohamu, Zakuri, na Iburi.

²⁸Na kutsupira Mahili kala ni Eliazari, ambaye kala kana ana a chilume.

²⁹Kutsupira Kishi kala ni Jerahimeeli,

³⁰na kutsupira Mushi kala ni Mahili, Ederi na Jerimothi. Hano kala ni ana a Alawi, sawa-sawa na mbari za ise zao.

³¹Hano piya apiga kura, dza vyo arivyopiga kura ndugu zao, ana a Aruni, mbere za mfalume Daudi na mbere za Sadoki, Ahimeleki na akulu a mbari za alavyadzi-sadaka na za Alawi. Nyumba ya mwana mvyere yaruhusiwa kupiga kura sawa-sawa na nyumba ya mwana mdide.