Read digo Zaburi 102 Bible Online

Zaburi 102 - digo bible

Zaburi 102

¹Voyo ra mutu ariye tabuni. Ambaye anagaya na anamlalamikira Mwenyezi Mlungu. Phundza mavoyo gangu, ee Mwenyezi Mlungu chiriro changu cha kuvoya msada nachikufikire!

²Usinilozere kogo siku ndiphokala ninagaya sikiroro na riniphundze, nijibu mara mwenga siku nikuvoyapho!

³Mana siku zangu zinatsupa dza mosi, na mifupha yangu inaphya dza tanu.

⁴Moyo wangu ukabumbundika na kunyala avi ni nyasi, sina hata hamu ya chakurya.

⁵Kpwa sababu ya sonono yangu nkasala mifupha mihuphu.

⁶Nkakala dza chimburu cha weruni, dza chimburu chiricho phatu photsamwa.

⁷Nilalapho siphaha usingizi dza nyama wa mapha chiyesala macheye dzulu ya nyumba.

⁸Maadui gangu gananifyorera dii. Hinyo anaonibera, anahumira dzina rangu kulani atu.

⁹Ivu rikakala ndicho chakurya changu, matsozi ganatsanganyika na chinwadzi changu

¹⁰kpwa sababu ya tsukizizo nyinji mana ukanitsola na kunitsupha kure.

¹¹Siku zangu zikakala avi ni chivurivuri cha dziloni ninanyala dza nyasi.

¹²Ela uwe, ee Mwenyezi Mlungu, unatawala ta kare na kare, dzinaro rinatambukirwa ni vivyazi vyosi.

¹³Uwe undazuka uhuonere mbazi mudzi wa Sayuni, mana wakati wa kuhuhendera manono ukafika.

¹⁴Atumishio anahusamini dzagbwe ukabomolwa, na anahuonera mbazi dzagbwe ni gandzo.

¹⁵Atu a mataifa ganjina andaogopha dzina ra Mwenyezi Mlungu, afalume osi duniani andaogopha utukufuwe.

¹⁶Mwenyezi Mlungu andadzenga luphya Sayuni andatsembuka kuonyesa ngumaye.

¹⁷Andajibu mavoyo ga achiya wala kandarema mavoyo gao.

¹⁸Mambo higa nagaandikpwe phatu kpwa sababu ya vivyazi vyedzavyo, ili ndiovyalwa badaye aweze kumtogola Mwenyezi Mlungu.

¹⁹Mwenyezi Mlungu walola photsi kula phatuphe phatakatifu pha dzulu, Mwenyezi Mlungu walola dunia kula mlunguni,

²⁰asikize chiriro cha mabusu na kuarichira ariokala akahukumiwa kuolagbwa,

²¹ili atu atangaze dzina ra Mwenyezi Mlungu ko Sayuni na amtogole kuko Jerusalemu,

²²siku atu ndiphokusanyika phamwenga na falume zikutane kumuabudu Mwenyezi Mlungu.

²³Mlungu akaphunguza nguvu zangu wakati nchere mwanache, akahenda maisha gangu gakale mafupi.

²⁴Kpwa hivyo naamba, “Uwe Mlungu wangu, usinihale sambi kahi-kahi ya maisha gangu, uwe ambaye unaishi hata kare na kare!

²⁵Pho kare, uwe waika misingi ya dunia, na ko mlunguni ni kazi ya mikonoyo.

²⁶Vyosi vindaangamika, ela uwe undadumu, vyosi vindatsakala dza nguwo. Uwe undavigaluza dza nguwo navyo tavindaparara,

²⁷ela uwe kundagaluka, na miakayo taina mwisho.

²⁸Ana a atumishio andasagala salama, vivyazi vyao vindadumu kpwa uwezoo.”