Read digo Zaburi 103 Bible Online

Zaburi 103 - digo bible

Zaburi 103

¹Zaburi ya Daudi. Mtogole Mwenyezi Mlungu, uwe roho yangu, Na vyosi virivyo ndani yangu navitogole dzinare takatifu.

²Mtogole Mwenyezi Mlungu, uwe roho yangu, na usiyale mahendoge gosi manono.

³Ndiye aniswameheye dambi zangu zosi, na kuniphoza makongo gangu gosi.

⁴Ndiye anikombolaye na mbira, tsona ndiye anionyesaye mendzwaye isiyosika na kunionera mbazi.

⁵Maisha gangu gosi nkunijaliya na vitu vinono na kunihenda nikale barobaro mwenye nguvu dza kozi.

⁶Mwenyezi Mlungu ndiye ahendaye mahendo ga haki na nkuahendera haki osi aonerwao.

⁷Wammanyisa Musa njiraze, na atu a Iziraeli achiaonyesa mahendoge.

⁸ Mwenyezi Mlungu ana huruma na mbazi, iye katsukirwa upesi na ana unji wa mendzwa isiyosika.

⁹Iye kandaalaumu atue hata kare na kare, wala kandaenderera kuareyera.

¹⁰Iye kahutiya adabu sawa-sawa na dambi zehu, wala kahuriphiza kadiri ya mahendo gehu mai.

¹¹Dza viratu mlunguni kurivyo dzulu sana kula duniani, vivyo ndivyo, mendzwaye isiyosika ni kulu kpwa hara amuogophao.

¹²Dza viratu mlairo wa dzuwa urivyo kure na mtswerero wa dzuwa, ndivyo Mlungu nkuusa dambi zehu zikakala kure naswi.

¹³Dza viratu baba anavyoonera anae mbazi, ndivyo Mwenyezi Mlungu anavyoonera mbazi amuogophao.

¹⁴Mana anamanya vira hurivyoumbwa, anatambukira kukala swiswi hu mitsanga.

¹⁵Ela maisha ga mwanadamu, ni dza nyasi tu: nkukula na kusitawi dza ruwa ra mundani,

¹⁶nkuphepheruswa ni phepho, na takuna ndiyeriona tsona.

¹⁷Ela mendzwa isiyosika ya Mwenyezi Mlungu kpwa aho amuogophao, ni ya kare na kare. Na hakiye nkuapha chivyazi hadi chivyazi,

¹⁸cha hara agbwirao chilaganeche na kulunga malagizoge.

¹⁹Mwenyezi Mlungu waika chihiche cha endzi hiko mlunguni, naye anatawala vitu vyosi.

²⁰Mtogoleni Mwenyezi Mlungu, mwimwi malaikae! Muna uwezo mkpwulu, namwi munalunga malagizoge na kuphundza gara agombago.

²¹Mtogoleni Mwenyezi Mlungu, mwi majeshi ga mlunguni! Mwimwi atumishie muhendao alondago!

²²Viumbe vyosi navimtogole Mwenyezi Mlungu; naatogolwe seemu zosi anazozitawala. Roho yangu naimtogole Mwenyezi Mlungu!