Read digo Zaburi 104 Bible Online

Zaburi 104 - digo bible

Zaburi 104

¹Mtogole Mwenyezi Mlungu, uwe roho yangu. Ee Mwenyezi Mlungu, Mlungu wangu, uwe ndiwe mkpwulu sana, ukaodzala nguma na mamlaka.

²Nawe unangʼala yesi avi ukavwala mwanga. Mlunguni nako ukakutandaza dza hema,

³na unasagala kuko. Maingu ukugahenda gariyo ya kuvwehwa ni farasi, na ukupanda dzulu ya phuto.

⁴Uwe ukuhenda malaikao akakala dza phuto, na ukuahenda atumishio akakala dza moho wa kuaka.

⁵Tsi nayo, waidinisa ndindindi kpwenye misingiye, hata taiweza kusumbiswa.

⁶Chisha uchiitandya bahari dzuluye dza nguwo, nago madzi gachibwiningiza hadi virere vya myango.

⁷Ela uriphogademurira, madzi higo gazola, gariphosikira kungurumako, gajera upesi.

⁸Madzi gapanda myango, gachitserera madeteni, kpwatu ambako kala ukagapangira.

⁹Uchigaikira mphaka ambao tagaweza kuuvuka, ili gasibwiningize dunia tsona.

¹⁰Ukuhenda vidzuho vimwage madzi madeteni, nayo myuho ijere kahi-kahi za vidzango.

¹¹Madzi higa nkuafwaha nyama a tsakani, hipho maforo nkuusa chiru zao.

¹²Nao nyama a mapha nkudzenga nyumba zao mo kanda-kanda na kuimba mo pandani.

¹³Ukuhuma mvula kula mlunguni ikanya dzulu ya myango, nayo tsi ikatosheka na matunda ga kaziyo.

¹⁴Ukuhenda nyasi zimere ili ngʼombe ziphahe marisa, na mimea imere ili mwanadamu ahumire. Kpwa hali iyo atu nkuphaha mavuno kula mtsangani,

¹⁵uchi wa zabibu wa kuachangamusha, mafuha ga kuahenda nyuso zao zinyinyihe, na chakurya cha kuatiya nguvu.

¹⁶Mihi ya Mwenyezi Mlungu inamwagirwa madzi ga kukola, mihi ya mierezi ya Lebanoni ariyoiphanda.

¹⁷Dzulu ya panda za yo mihi nyama a mapha nkudzenga nyumba zao, nao manjera nkuhenda makalo gao dzulu ya virere vyao.

¹⁸Myango mire ni makalo ga mbuzi a myangoni, mapango ni chimbiriro ra makpwangʼa.

¹⁹Uwe wahenda mwezi ukale ni alama ya kupimira minga, na dzuwa rimanye wakatiwe wa kutswa.

²⁰Ukuhenda jiza, nako kukakala usiku, na nyama osi a tsakani akatuluka.

²¹Simba nkunguruma achikala anaindza, nkuendza chakurya chao kula kpwa Mlungu.

²²Wakati dzuwa richituluka, nao nkuuka achadziambalaza kpwenye makalo gao.

²³Atu nao nkutuluka achaandza kazi zao nao nkukala na chadi cha kuhenda kazi hadi dziloni.

²⁴Ee Mwenyezi Mlungu, ukahenda mambo manji sana! Wagahenda gosi kpwa ikima, dunia ikaodzala viumbevyo!

²⁵Kuna bahari, kulu na pana, yoodzala viumbe visivyoolangika, viumbe vya chila aina vikulu kpwa vidide.

²⁶Meli nkutsupira mumo, na mumo ndimo murimo yuya nyama mkpwulu aihwaye Leviathani, uriyemuumba avumbe mumo.

²⁷Viumbevyo vyosi vinakugodzera uwe, uviphe chakurya chao kpwa wakati unaofwaha.

²⁸Uchivipha chochosi, vinahala; uchivugula mikonoyo, vinamvuna vinono.

²⁹Uchivilozera kogo, vinaogopha; uchiviusira pumuzi,[19] vinafwa, na kuuya mtsangani virikola.

³⁰Unaphohuma Rohoo, vinaumbwa, nawe ukugaluza sura ya dunia.

³¹Utukufu wa Mwenyezi Mlungu naudumu ta kare na kare; Mwenyezi Mlungu naahamirwe ni kazize.

³²Nkulola dunia, nayo nkusumba, nkuguta myango, nayo ikatuluza mosi!

³³Nindamuimbira Mwenyezi Mlungu maisha gangu gosi, ndaimba kumtogola Mlungu wangu siku zangu zosi.

³⁴Naahamirwe ni maazo gangu, mana Mwenyezi Mlungu ndiye anihamiraye.

³⁵Enye dambi naauswe duniani, phasikale na atu ayi tsona! Mtogole Mwenyezi Mlungu, uwe roho yangu! Mtogole Mwenyezi Mlungu!