Read digo Zaburi 105 Bible Online

Zaburi 105 - digo bible

Zaburi 105

¹Mshukuruni Mwenyezi Mlungu, mvoyeni, amanyiseni mataifa mambo arigohenda.

²Muimbireni, imbani mawira ga kumtogola, semurirani mahendoge ga ajabu!

³Hendani ngulu kpwa sababu ya dzinare takatifu. Hinyo amuogophao Mwenyezi Mlungu naahererwe.

⁴Muendzeni Mwenyezi Mlungu na nguvuze, chila wakati londani kukala aripho iye.

⁵Tambukirani mahendo ga ajabu arigohenda, vilinjevye na hukumu arizolavya,

⁶mwimwi chivyazi cha Burahimu mtumishiwe, mwimwi chivyazi cha Jakobo, atue ariokutsambulani.

⁷Iye Mwenyezi Mlungu, ndiye Mlungu wehu, uamuliwe wa haki unaonekana duniani kosi.

⁸Iye anatambukira chilaganeche cha kare na kare, na anatambukira ahadiye hadi vivyazi elufu,

⁹chilagane arichoika na Burahimu, na ahadi ariyomuapira Isaka.

¹⁰Ariyomuhakikishira Jakobo dza amuri kpwa Iziraeli dza chilagane cha kare na kare,

¹¹waamba, “Ndakupha tsi ya Kanani ikale seemu ya urisi wenu.”

¹²Ariphokala ni achache, ee achache sana, na ajeni mumo,

¹³adengereke kula taifa hadi taifa, kula ufalume mmwenga hadi wanjina,

¹⁴kayamruhusu yeyesi aaonere, waademurira afalume kpwa sababu yao.

¹⁵Waamba, “Msigute apakpwa mafuha angu, wala msiahende mai manabii angu.”

¹⁶Mlungu wareha ndzala kahi ya tsi naye achibananga chakurya chao chosi.

¹⁷Ela kala akaatangulizira mutu mmwenga, Yusufu yekala akaguzwa dza mtumwa.

¹⁸Maguluge gafungbwa silisili, na achimfunga silisili ya chuma singoni,

¹⁹hadi gariphotimiya gara arigotabiri, hadi neno ra Mwenyezi Mlungu ririphomanyikana kukala ni ra kpweli.

²⁰Mfalume walagizira kukala avugulwe, mtawala wa mataifa wamrichira huru.

²¹Achimuhenda muimirizi wa nyumbaye, na mkpwulu wa malize zosi,

²²Aafundze akulu a utawalawe kama aonavyo sawa na aafundze ikima atumiae.

²³Ndipho Aiziraeli achiinjira tsi ya Misiri, Jakobo achisagala dza mjeni kpwenye tsi ya Hamu.

²⁴Phahi Mwenyezi Mlungu wahenda atue avyalane, na achiahenda akale na mkpwotse kuriko aviha ao.

²⁵Achihenda Amisiri azire atue na aahendere mai atumishie.

²⁶Chisha wamhuma mtumishiwe Musa, phamwenga na Aruni ariyekala akamtsambula.

²⁷Achihenda vilinjevye kahi za Amisiri, na mahendoge ga ajabu kpwenye tsi ya Hamu.

²⁸Wahuma jiza kpwenye yo tsi, ela Amisiri achirema kulunga manenoge.

²⁹Madzi gao achigagaluza kukala milatso, na achihenda ngʼonda aho afwe.

³⁰Tsi yao ichigota magula, hata vyumbani mwa atawala ao.

³¹Achigomba na kuchedza maindzi na madadada tsi yosi.

³²Achiarehera mvula ya mawe na limeme richimeka kula pembe mwenga ya tsi hadi yanjina.

³³Wabananga mizabibu na mitini yao, na achivundza-vundza mihi yosi ya tsi yao.

³⁴Mlungu walagiza na kuchedza ndzije, na maelufu ga fumbiri,

³⁵achedzarya mimea yosi ya tsi yao, achirya matunda ga tsi yao.

³⁶Halafu waolaga ana a mwandzo osi a tsi yao, matunda ga kpwandza ga nguvu zao.

³⁷Ndipho achiatuluza Aiziraeli kula tsi hira kuno akatsukula feza na zahabu, wala taphana hata mmwenga wao ariyekpwala.

³⁸Amisiri ahamirwa ariphouka, mana kala anaogopha sana.

³⁹Mlungu waaikira ingu kufwinika dzuwa ra mutsi na moho ili uaangʼazire usiku.

⁴⁰Achimvoya, naye achiarehera makpware, achiapha chakurya kpwa unji kula mlunguni.

⁴¹Waahula dziwe, richituluza madzi gachijera dza muho hiko jangbwani.

⁴²Mana kala akatambukira ahadiye takatifu, ariyomupha mtumishiwe Burahimu.

⁴³Kpwa hivyo achilongoza atue na raha atu arioatsambula achiphiya kuno anashangiliya.

⁴⁴Achiapha tsi za mataifa ganjina, achihala minda ambayo kala ikarimwa ni atu anjina,

⁴⁵ili mwishowe akale andagbwira malagizoge na kulunga shariyaze. Mwenyezi Mlungu naatogolwe! Haleluya.