Read digo Zaburi 106 Bible Online

Zaburi 106 - digo bible

Zaburi 106

¹Haleluya. Mtogoleni Mwenyezi Mlungu. Mshukuruni Mwenyezi Mlungu, mana iye ni mnono, kpwa kukala mendzwaye isiyosika ni ya kare na kare.

²Ni ani awezaye kusemurira mahendo makulu ga Mwenyezi Mlungu, au kutangaza sifwaze zosi?

³Baha aho anaohenda haki, anaohenda garigo sawa wakati wosi!

⁴Nitambukira, ee Mwenyezi Mlungu, wakati uonyesapho atuo mbazizo, uniterye wakati unaphoakombola

⁵ili nami nione kuongokerwa kpwa atuo urioatsambula, ili nidzikarye phamwenga na taifaro na kuungana na atuo kukutogola.

⁶Swiswi osi hwahenda dambi dza akare ehu, hukahenda makosa, swiswi hukahenda garigo mai.

⁷Akare ehu, ariphokala Misiri, taayajali mahendogo ga ajabu, taayatambukira unji wa mendzwayo isiyosika, ela aasi ko kanda-kanda ya Bahari ya Shamu.

⁸Ela ye achiativya kpwa sababu ya dzinare, ili uwezowe mkpwulu umanyikane.

⁹Wademurira Bahari ya Shamu, nayo ichiuma, naye achialongoza atue achivuka na vivwani avi anatsupa na jangbwani.

¹⁰Chihivyo achiativya atue kula mikononi mwa aviha ao, na achiakombola na nguvu za adui.

¹¹Madzi gachiahohesa aviha ao, taphana hata mmwenga ariyesala.

¹²Ndipho atuo achiamini manenoge, achiimba mawira ga kumtogola.

¹³Ela bada ya jumwa na chisiku ayala mahendoge taayagodzera mashaurige.

¹⁴Achikala na kpwiru ajabu kura jangbwani achimjeza Mlungu kuko weruni.

¹⁵Achiapha arichovoya, ela achiarichira ukongo wa nyerenyere.

¹⁶Kuko kambini atu aonera wivu Musa na Aruni, mtumishi mtakatifu wa Mwenyezi Mlungu.

¹⁷Hipho tsi yaahuka ichimiza Dathani, na kumzika Abiramu na kundire rosi.

¹⁸Moho uchiatulukira afuasi ao, uchiaocha nyo atu ayi.

¹⁹Achitengeza ndama ya zahabu ko Horebu achiabudu chizuka cha kuyayushwa.

²⁰Jibu abadilisha nguma ya Mlungu, achiipha chizuka cha ndzau iryayo nyasi.

²¹Ayala Mlungu muokoli wao, ambaye kala akaahendera mambo makulu ko Misiri,

²²mahendo ga ajabu katika tsi ya Hamu, na mambo ga kutisha ko Bahari ya Shamu.

²³Kpwa hivyo achiamba andaangamiza, ela Musa, ariyemtsambula, achiakanira achimuhenda Mlungu asiaolage kpwa tsukizize.

²⁴Halafu abera tsi ira nono kpwa sababu taayaamini ahadi za Mlungu.

²⁵Arurumika mwao mahemani wala taayamtii Mwenyezi Mlungu.

²⁶Kpwa hivyo waunula mkpwonowe achiapa kukala andaahenda afwe jangbwani,

²⁷na chivyazi chao achitsamule kahi za mataifa na achigoteze dunia yosi.

²⁸Halafu achidziunga kuabudu Baali kula Peori, achirya sadaka zolavirwa milungu ya kufwa.

²⁹Achimtsukiza Mwenyezi Mlungu kpwa mahendo gao, na ukongo mui uchiashambuliya.

³⁰Ela Finehasi waima achiakanira, na hura ukongo uchiarichira.

³¹Dzambo hiri nkutambukirwa kpwa ishimaye, ni vivyazi vyosi hata kare na kare.

³²Amtsukiza Mwenyezi Mlungu ko madzi ga Meriba, Musa achiphaha tabu kpwa sababu yao,

³³mana amtiya utsungu, hata achigomba vii bila ya kuririkana.

³⁴Tsona taayaolaga atu, dza arivyolagizwa ni Mwenyezi Mlungu,

³⁵ela badaye adzitsanganya na mataifa ganjina achidzifundza mila zao.

³⁶Ahumikira vizuka vyao, navyo vichikala muhego wa kuaangamiza.

³⁷Alavya ana aho alume na achetu kpwa pepho dza sadaka.

³⁸Amwaga milatso ya atu asio na makosa, milatso ya ana aho alume na achetu, arioalavya sadaka kpwa milungu ya Kanani, tsi ichikala najisi kpwa yo milatso yao.

³⁹Chihivyo nao achidzitiya najisi kpwa mahendo gao, akosa uaminifu kpwa Mlungu kpwa mahendo gao.

⁴⁰Tsukizi za Mwenyezi Mlungu zichiakira atue, achiatsukirirwa sana nyo ariokala urisiwe,

⁴¹achiatiya mikononi mwa atu a mataifa, na aho achitawalwa ni atu arioazira.

⁴²Maadui gao gachiaonera, achihendwa atumwa kpwa kushurutishwa.

⁴³Waativya kano nyinji, ela aho kala ni aasi kpwenye nia zao, nao achitserezwa kpwa uyi wao.

⁴⁴Ela Mlungu waajali vivyo kahi ya tabu zao, ariphosikira chiriro chao.

⁴⁵Kpwa sababu yao watambukira chilaganeche, achiaonera imani kulengana na unji wa mendzwaye isiyosika.

⁴⁶Achiahenda aonerwe mbazi ni hinyo ariokala akaatsamiza kpwa lazima.

⁴⁷Hutivye, ee Mwenyezi Mlungu, Mlungu wehu, hukusanye kula kahi ya mataifa ili hushukuru dzinaro takatifu na kudzikarya kpwa ngumazo.

⁴⁸Naajaliwe iye Mwenyezi Mlungu, Mlungu wa Iziraeli, hangu kare na kare, hata kare na kare! Nao atu osi na aambe, “Amina!” Mtogoleni Mwenyezi Mlungu! Haleluya.