Read digo Zaburi 107 Bible Online

Zaburi 107 - digo bible

Zaburi 107

¹Mshukuruni Mwenyezi Mlungu, mana iye ni mnono, mana mendzwaye isiyosika inaenderera hata kare na kare!

²Hinyo ariokombolwa ni Mwenyezi Mlungu naagombe hivyo, ariokombolwa kula mikononi mwa aviha.

³Na achiakusanya kula tsi zosi, kula mlairo wa dzuwa na kula mtswerero wa dzuwa, kula uphande wa vurini na kula uphande wa mwakani.

⁴Anjina adengereka jangbwani, taaonere njira ya kualongoza kpwenye mudzi wa kusagala.

⁵Asikira ndzala na chiru, nao achivundzika moyo.

⁶Chisha achimririra Mwenyezi Mlungu kahi ya tabu zao, naye achiakombola kula kpwa mateso gao.

⁷Achialongoza kpwenye njira ya mwenga kpwa mwenga, hadi achifika mudzi ambao kala andasagala.

⁸Naamshukuru Mwenyezi Mlungu kpwa sababu ya mendzwaye isiyosika, na mahendoge ga ajabu ahenderago anadamu.

⁹Mana nkumuusira chiru hiye ariye na chiru, na kumvunisa enye ndzala na vitu vinono.

¹⁰Anjina asagala jizani murimo na sonono, akala afungbwa agayao na silisili za chuma.

¹¹Mana arema kugbwira maneno ga Mlungu, tsona abera wasiya wa Iye Ariye Dzulu Kuriko Vyosi.

¹²Kpwa hivyo achiaricha alazimishwe kazi ngumu, adzikpwala na taphakarire mutu wa kuaterya.

¹³Alafu achimririra Mwenyezi Mlungu kpwa sababu ya tabu zao, naye achiativya kula kpwa mateso gao.

¹⁴Waatuluza jizani na kuriko na sonono kali, achivundza silisili zokala zikaafunga.

¹⁵Naamshukuru Mwenyezi Mlungu kpwa sababu ya mendzwaye isiyosika, na mahendoge ga ajabu ahenderago anadamu,

¹⁶mana nkuvundza maryango ga shaba, na kukata magbwama ga chuma.

¹⁷Anjina akala azuzu kpwa sababu ya uasi wao, achiteseka na makongo sababu ya uyi wao.

¹⁸Asinywa ni chila aina ya chakurya, hata achikala a phephi na kufwa.

¹⁹Halafu achimririra Mwenyezi Mlungu kpwa sababu ya shida zao, naye achiativya na mateso gao.

²⁰Wahuma nenore richiaphoza, na achiakombola asiangamike.

²¹Naamshukuru Mwenyezi Mlungu kpwa sababu ya mendzwaye isiyosika, na mahendoge ga ajabu ahenderago anadamu.

²²Naamlavira sadaka za shukurani, na atangaze mahendoge kpwa mawira ga raha!

²³Phahi anjina aho asafiri baharini, na meli achihenda bishara zao kpwenye go madzi manji.

²⁴Aona mahendo ga Mwenyezi Mlungu, mahendo ga ajabu arigohenda mo vivwani.

²⁵Mana walavya amuri na kuchedza phuto kali rounula maimbi ga bahari.

²⁶Phahi gaapandiza atu hata dzulu mlunguni chisha gachiatsereza hadi tsini ya bahari werevu wao uchisira kahi za mipango yao mii.

²⁷Ayumba na achidedeleka avi ni alevi na ujuzi wao uchifika mwisho.

²⁸Ndipho katika tabu yao achimririra Mwenyezi Mlungu, naye achiativya na mateso gao.

²⁹Wahuriza rira phuto kali, nago maimbi gachihurira.

³⁰Hipho ahererwa kuriphohurira, achiafisa kpwenye yo bandari arikokala anailonda.

³¹Naamshukuru Mwenyezi Mlungu kpwa sababu ya mendzwaye isiyosika, na mahendoge ga ajabu ahenderago anadamu.

³²Mtogoleni kpwenye mkpwutano wa atu na mumtogole kahi za mkpwutano wa angambi.

³³Iye nkugaluza myuho ikakala jangbwa, na kuumisa pula za madzi,

³⁴nkuhenda tsi yenye rutuba ikakala litsapi kpwa sababu ya uyi wa atu anaosagala mumo.

³⁵Nkugaluza jangbwa rikala visima vya madzi, na tsi kavu ikakala na pula za madzi.

³⁶Chisha nkuaphirika ario na ndzala akasagala mumo, nao nkuimarisha mudzi akasagala.

³⁷Arima minda na achiphanda mizabibu, na achitsenga mavuno manji.

³⁸Waajaliya atue, nao achienjerezeka sana, wala kaphunguzire isabu ya mifugo yao.

³⁹Tsona ariphophunguka na kutserezwa, kpwa kuonerwa, kugayiswa na sonono,

⁴⁰waabera nyo akulu arioatesa achiazungulusa kahi ya jangbwa kusiko njira.

⁴¹Ela achiya nkuaunula akaausa kpwenye mateso gao, na kuahenda atu aho akale dza vyaa vya mangʼondzi.

⁴²Atu anaohenda garigo sawa anaona na kuhamirwa ela atu ayi osi andahendwa anyamale.

⁴³Yeyesi ariye na ikima naaririkane mambo higa, naaririkane kuhusu mendzwa ya Mwenyezi Mlungu isiyosika.