Read digo Zaburi 109 Bible Online

Zaburi 109 - digo bible

Zaburi 109

¹Chilongozi wa aimbadzi. Zaburi ya Daudi. Usinyamale, ee Mlungu nkutogolaye,

²mana kanwa za atu ayi na a handzo zinanishambuliya, zinagomba maneno ga handzo chinyume changu.

³Akanizunguluka na maneno ga kunimena, na ananishambuliya bila chausa.

⁴Dzagbwe naamendza nyo anishitaki ela hata hivyo naavoyera.

⁵Kpwa hivyo ananiripha mai kpwa manono gangu, na tsukizi kpwa mendzwa yangu.

⁶Muikire mviha wangu muamuli mui na ye amshitakiye naime mkpwono kulume.

⁷Ndiphoamulwa naaphahikane kukala ana makosa, mavoyoge nagaisabiwe kukala ni dambi!

⁸Sikuze na zikale chache, na cheoche nachihalwe ni mutu wanjina!

⁹Anae na akale anachiya, na mchewe naakale gungu.

¹⁰Anae naazemeheke na akale a kuvoya-voya naazolwe atuluke himo nyumba za magandzo!

¹¹Hiye ariyemuaphasa naedze ahale vitu vyosi arivyonavyo, ajeni naedze abanange matunda ga jashore.

¹²Naphasikale na yeyesi wa kumuonera mbazi wala wakuaonera mbazi anachiyae.

¹³Atu a chivyaziche naangamizwe, dzinare na riyalwe kpwenye chivyazi chedzacho!

¹⁴Mwenyezi Mlungu naatambukire uyi wa akaree dambi ya nine naisifutwe!

¹⁵Mwenyezi Mlungu naatambukire dambi zao siku zosi, na aho enye naayalwe kabisa duniani.

¹⁶Mana kayatambukira kuhenda manono, ela waonera achiya na agayi na atu ariovundzika moyo hadi achifwa.

¹⁷Wamendza kulani atu, sambi lana naimuphahe mwenye. Kayamendza kubariki, sambi baraka nazikale kure naye.

¹⁸Wadzivwika lana avi ni koti, phahi lana nazimuinjire dza mutu anwavyo madzi, na nazimuinjire dza mafuha ga mwakpwe mifuphani.

¹⁹Naikale dza shuka adzifwinikirayo, na dza mkanda adzifungao chila siku.

²⁰Mwenyezi Mlungu naariphe gago aho anishitakio, aho agombao mai kunihusu!

²¹Ela uwe, ee Mwenyezi Mlungu Bwana wangu, nishuulikiya vinono kpwa sababu ya dzinaro kpwa vira mendzwayo isiyosika ni nono, nitivya.

²²Mana mino ni mchiya tsona mgbwayi, na moyo wangu ukalumizwa sana.

²³Mimi nkuyaya dza chivurivuri cha dziloni, nkakutwa-kutwa dza ndzije.

²⁴Mavwindi gangu ganarejera kpwa kufunga, na nkasala mifupha mihuphu.

²⁵Nkakala utu wa kuberwa ni anishitakio achiniona anasukasuka vitswa vyao.

²⁶Niterya, ee Mwenyezi Mlungu, Mlungu wangu! Niokola kulengana na mendzwayo isiyosika!

²⁷Amanyise kukala uhu ni mkpwonoo, kukala uwe, ee Mwenyezi Mlungu ndiwe uriyehenda vivyo!

²⁸Ariche alani ela we unajaliya! Ariche aviha angu aphahe waibu, mtumishio naahererwe!

²⁹Anaonishitaki naaphahe waibu waibu wao nauabwiningize dza mutu adzibwiningizavyo burangeti!

³⁰Ndamlavira Mwenyezi Mlungu shukurani kulu na mromo wangu, nindamlika kahi za borori ra atu,

³¹mana ndiye akaniraye agayi na kuativya kula kpwa hara anaoamulwa kuolagbwa.