Read digo Zaburi 115 Bible Online

Zaburi 115 - digo bible

Zaburi 115

¹Si kpwehu swiswi, ee Mwenyezi Mlungu, si kpwehu swiswi, ela nguma naihewe dzinaro, kpwa sababu ya mendzwayo isiyosika na uaminifuo!

²Kpwa utu wani mataifa ganjina gauze, “A phaphi ye Mlungu wao?”

³Mlungu wehu a mlunguni anahenda vira alondavyo.

⁴Milungu yao ni ya feza na zahabu, yotengezwa ni anadamu.

⁵Ina milomo ela taigomba, ina matso ela taiona.

⁶Ina masikiro ela taisikira, ina pula ela tainusa.

⁷Ina mikono ela taigbwira, ina magulu ela tainyendeka, miro zao tazituluza sauti yoyosi.

⁸Aho aitengezao, na aho aikuluphirao, andakala dza iyo.

⁹Mwi Aiziraeli, mkuluphireni Mwenyezi Mlungu, iye ndiye anayekuteryani na ndiye ngao yenu.

¹⁰Mwi chivyazi cha Aruni, mkuluphireni Mwenyezi Mlungu, iye ndiye anayekuteryani na ndiye ngao yenu.

¹¹Mwi muogophao Mwenyezi Mlungu, mkuluphireni, iye ndiye anayekuteryani na ndiye ngao yenu.

¹²Mwenyezi Mlungu anahutambukira na kuhujaliya. Andajaliya atu a Iziraeli, andajaliya chivyazi cha Aruni.

¹³Mwenyezi Mlungu andajaliya osi amuogophao, avyere kpwa adide.

¹⁴Mwenyezi Mlungu naakuhendeni muenjerezeke mwimwi na ana enu!

¹⁵Mwenyezi Mlungu ariyeumba mlunguni na tsi naakujaliyeni.

¹⁶Ko mlunguni ni kpwa Mwenyezi Mlungu, ela dunia waipha anadamu.

¹⁷Atu ariofwa taaweza kumtogola Mwenyezi Mlungu, wala aho ariotserera kuzimu.

¹⁸Ela swiswi hurio moyo hundamtogola Mwenyezi Mlungu, hundamtogola vivi sambi hata kare na kare. Mwenyezi Mlungu naatogolwe!