Read digo Zaburi 118 Bible Online

Zaburi 118 - digo bible

Zaburi 118

¹Mshukuruni Mwenyezi Mlungu, mana ni mnono, mendzwaye isiyosika inadumu hata kare na kare.

²Aiziraeli naambe, “Mendzwaye isiyosika inadumu hata kare na kare.”

³Atu a chivyazi cha Aruni naagombe aambe, “Mendzwaye isiyosika inadumu hata kare na kare.”

⁴Aho amuogophao Mwenyezi Mlungu naambe, “mendzwaye isiyosika inadumu hata kare na kare.”

⁵Kahi ya tabu zangu namuiha Mwenyezi Mlungu, naye achinijibu kpwa kuniika huru.

⁶Mwenyezi Mlungu a uphande wangu, nami sindaogopha chochosi. Mwanadamu andanihendani?

⁷Mwenyezi Mlungu a uphande wangu ili aniterye, nami ndadzionera aho achionimena achiturywa.

⁸Baha umchimbirire Mwenyezi Mlungu kuriko kumkuluphira mwanadamu.

⁹Baha uchimbirire Mwenyezi Mlungu kuriko kukuluphira akulu.

¹⁰Mataifa ganjina gosi kala gakanizangira ela nchigaturya kpwa dzina ra Mwenyezi Mlungu.

¹¹Ganizangira chila uphande ela nchigaturya kpwa dzina ra Mwenyezi Mlungu.

¹²Ganizunguluka dza nyuchi ela gachiphya mara mwenga dza moho wa miya, kpwa dzina ra Mwenyezi Mlungu nchigaangamiza.

¹³Násukumwa sana, phadide nigbwe ela Mwenyezi Mlungu achiniterya.

¹⁴Mwenyezi Mlungu ndiye nguvu yangu, iye akakala wokofu wangu.

¹⁵Sauti za raha na ushindi zinasikirika kpwenye mahema ga ahendao haki, “Mkpwono wa kulume wa Mwenyezi Mlungu ukahenda makulu.

¹⁶Mkpwono wa kulume wa Mwenyezi Mlungu ukareha ushindi! Mkpwono wa kulume wa Mwenyezi Mlungu ukahenda Makulu!”

¹⁷Sindafwa ela ndakala moyo, nitangaze mahendo ga Mwenyezi Mlungu.

¹⁸Mwenyezi Mlungu akanitiya adabu sana ela kakaniricha nifwe.

¹⁹Nivugurira maryango ga haki, niphenye nimlavire shukuruni Mwenyezi Mlungu.

²⁰Riri ndiro ryango ra Mwenyezi Mlungu, atu a haki andatsupira phapha.

²¹Nakushukuru kpwa kukala ukanijibu na ukakala wokofu wangu.

²²Dziwe roremewa ni adzengi, ndipho rikakala dziwe kulu ra msingi.

²³Mwenyezi Mlungu ndiye yehenda dzambo hiri, naro huchirilola rinahuangalaza!

²⁴Hino ni siku achioihenda Mwenyezi Mlungu nahuhererwe na hukaleni na raha.

²⁵Hutivye, hunakuvoya uwe, ee Mwenyezi Mlungu! Ee Mwenyezi Mlungu, hunakuvoya huhende huongokerwe.

²⁶Naajaliwe iye edzaye kpwa dzina la Mwenyezi Mlungu! Hundakujaliya kula nyumba ya kuvoya Mlungu.

²⁷Mwenyezi Mlungu ni Mlungu, akahungʼazira mwangawe. Gbwirani maphungo ga mihi mwenu mikononi mlongozane wakati wa sikukuu, mphiye phamwenga phenye pembe za phatu pha kulavira sadaka.

²⁸Uwe u Mlungu wangu, nami nindakushukuru, uwe u Mlungu wangu, nindakutogola.

²⁹Mshukuruni Mwenyezi Mlungu, mana ni mnono mendzwaye isiyosika, inadumu hata kare na kare!