Read digo Zaburi 119 Bible Online

Zaburi 119 - digo bible

Zaburi 119

¹Baha atu ambao njira zao tazina lawama, atu alungao shariya za Mwenyezi Mlungu!

²Baha aho alungao malagizoge, aho amuendzao kpwa mioyo yao yosi,

³asiohenda makosa, ela analunga njiraze.

⁴Uwe ukahupha malagizogo, ili hugalunge chikamilifu.

⁵Ningemendza nilunge malagizogo vinono, kahi za kulunga malagizogo!

⁶Nchilunga malagizogo gosi, sindaphaha waibu.

⁷Nindakutogola moyo kutsuka, ndiphodzifundza malagizogo ga haki.

⁸Nindagbwira shariyazo. Kpwa hivyo nakuvoya usiniriche tsetsetse.

⁹Dze, barobaro anawezadze kuhenda maishage gakale swafi? Ni kpwa kuishi kulengana na nenoro.

¹⁰Nakuvoya moyo kutsuka, usiniriche nkakosa kulunga malagizogo!

¹¹Nenoro nkariika mwangu moyoni, ili nisikuhendere dambi.

¹²Utogolwe, ee Mwenyezi Mlungu, nifundza shariyazo!

¹³Kpwa raka ra dzulu ninasemurira malagizogo gatulukago mwako kanwani.

¹⁴Nahamirwa ni kulunga malagizogo, dza viratu mutu ahamirwavyo ni utajiri munji.

¹⁵Ndaririkana kuhusu shariyazo na kugbwira njirazo.

¹⁶Nahamirwa ni shariyazo sindayala nenoro.

¹⁷Nihendera manono mimi mtumishio ili niishi na kugbwira nenoro.

¹⁸Ningʼaza matso gangu ili nione mambo ga ajabu garigo mwako shariyani.

¹⁹Mimi ni mjeni phapha duniani, mino natsupira tu, usinifwitse malagizogo.

²⁰Roho yangu inaluma kpwa kuaza kumanya shariyazo wakati wosi.

²¹Uwe ukuademurira enye kudzikarya, ariolaniwa, asiolunga malagizogo.

²²Niusira chibero chao na ufyozi wao, mana mimi nina chadi cha kulunga malagizogo.

²³Dzagbwe akulu ananipangira njama mbii, mino mtumishio ndaririkana shariyazo.

²⁴Malagizogo gananihamira ndigo ganago nipha ushauri.

²⁵Nikalazwa vumbini, nipha tsona uhai dza urivyolaga.

²⁶Nakuolangira njira zangu zosi nawe uchinijibu, nifundza shariyazo.

²⁷Nihenda nielewe mafundzo ga malagizogo nami ndaririkana mahendogo ga ajabu.

²⁸Moyo wangu una sonono, nitiya mkpwotse dza urivyolaga.

²⁹Nirinda nisigombe handzo, na kahi ya mbazizo nifundza shariyayo.

³⁰Nkatsambula njira ya uaminifu na nkadzilavya kulunga malagizogo.

³¹Nikagbwira malagizogo, ee Mwenyezi Mlungu, usiniriche nkamenya waibu!

³²Ndalunga malagizogo, mana ukanivugula ufahamu.

³³Ee Mwenyezi Mlungu, nifundza kulunga shariyazo, nami ndazilunga hadi mwisho.

³⁴Nipha ufahamu ili niweze kugbwira shariyayo na kuilunga moyo kutsuka.

³⁵Nilongoza kahi ya kugbwira njira za malagizogo, mana zinanihamira.

³⁶Elekeza moyo wangu ukale na chiru ya kulunga malagizogo, na si kpwa sababu ya kuphaha fwaida!

³⁷Rinda matso gangu gasilunge mambo gasigo mana, tundza maisha gangu sawa-sawa na nenoro.

³⁸Nitimizira ahadi uriyonilaga mimi mtumishio, ahadi ya hara akuogophao.

³⁹Niusira waibu ninaowogopha mana malagizogo ni manono.

⁴⁰Naaza sana kulunga malagizogo tundza maisha gangu mana uwe u wa haki!

⁴¹Mendzwayo isiyosika nainedzere, ee Mwenyezi Mlungu na wokofuo naunedzere kulengana na ahadiyo.

⁴²Hipho ndipho ndiphokala na jibu ra hinyo anaonifyorera, mana mino nakuluphira nenoro.

⁴³Nihenda nigombe kpweli chila wakati mana nikakuluphira malagizogo.

⁴⁴Ndalunga shariyazo siku zosi, hata kare na kare.

⁴⁵Nami ndakala huru, mana naendza shariyazo.

⁴⁶Nindagomba kuhusu malagizogo mbere ya afalume, nami sindaona waibu.

⁴⁷Mana nafwahirwa ni kugbwira malagizogo, kpwa kukala nagamendza.

⁴⁸Naishimu na kumendza malagizogo, nindaririkana kuhusu shariyazo.

⁴⁹Tambukira neno urironilaga, mimi mtumishio, neno ambaro rinanipha matumaini.

⁵⁰Utu unaoniphoza marenda wakati wa kugaya kpwangu ni kukala ahadiyo inanipha uzima.

⁵¹Atu a kudzikarya ananibera, ela siricha kulunga shariyazo.

⁵²Ninaphotambukira malagizogo ga hangu kare nasikira kuphozwa marenda, ee Mwenyezi Mlungu.

⁵³Nasikira utsungu kpwa sababu ya atu ayi, ambao aricha kulunga shariyazo.

⁵⁴Malagizogo gakakala wira wangu phophosi nisagalapho.

⁵⁵Usiku ninatambukira dzinaro, ee Mwenyezi Mlungu na kugbwira shariyazo.

⁵⁶Hiku kugbwira malagizogo, ni baraka kulu kpwangu.

⁵⁷Uwe Mwenyezi Mlungu ndiwe mtalo wangu ninaahidi kukala, nindagbwira manenogo.

⁵⁸Nikaendza usoo kpwa moyo wangu wosi, nionera mbazi dza urivyolaga.

⁵⁹Nikaririkana njira zangu, nami nkagaluza nyayo zangu kulunga malagizogo.

⁶⁰Nahenda upesi na sindachelewa kugbwira malagizogo.

⁶¹Atu ayi ananihega na nyugbwe ela mino sindayala shariyazo.

⁶²Usiku wa manane nalamuka na kukushukuru, kpwa sababu ya malagizogo ga haki.

⁶³Mino ni msena wa osi akuogophao, msena wa hinyo alungao malagizogo.

⁶⁴Ee Mwenyezi Mlungu, dunia ikaodzala mendzwayo isiyosika, nifundza malagizogo.

⁶⁵Ukanihenderato mimi mtumishio, sawa-sawa na nenoro, ee Mwenyezi Mlungu.

⁶⁶Nipha achili na marifwa mana ninakuluphira malagizogo.

⁶⁷Kabila kudzangbwenitiya adabu, nakala nkaangamika njira, ela vivi nagbwira nenoro.

⁶⁸Uwe u mnono na uhendago ni manono, nifundza malagizogo.

⁶⁹Dzagbwe atu adzikaryao anagomba handzo chinyume changu, ela mino nagbwira shariyazo moyo kutsuka.

⁷⁰Mioyo yao ni mii ela mino nahamirwa ni shariyazo.

⁷¹Ni vinono kukala nateseka, ili niweze kudzifundza shariyazo.

⁷²Shariya ya kula mwako kanwani ni bora kuriko maelufu ga vipande vya zahabu na feza.

⁷³Waniumba mwenye uwe, na mikonoyo, nipha ufahamu, ili nidzifundze malagizogo.

⁷⁴Hinyo akuogophao andaniona na ahererwe, kpwa kukala nikaika tumaini rangu kpwenye nenoro.

⁷⁵Namanya, ee Mwenyezi Mlungu, kukala hukumuzo ni za haki na kukala ukanitiya adabu kulengana na uaminifuo.

⁷⁶Mendzwayo isiyosika na iniphoze marenda kulengana na ahadi uriyonilaga mimi mtumishio.

⁷⁷Nionera mbazi ili niishi mana shariyayo inanihamira.

⁷⁸Aho adzikaryao naaibike, kpwa kunihendera makosa bila chausa, ela mino nindaririkana shariyazo.

⁷⁹Aho aniogophao naanigalukire, ili aweze kumanya malagizogo.

⁸⁰Moyo wangu naugbwire malagizogo ili nisedze nikamenya waibu.

⁸¹Roho yangu ikaremwa kpwa kugodzera wokofuo, ela nikaika tumaini rangu kahi ya nenoro.

⁸²Matso gangu gakaremwa kpwa kurorera ahadiyo, nauza, “Undaniphoza marenda rini?”

⁸³Mana ndipho nkakonya-konya dza chiriba chiricho mosini, ela sidzangbweyala malagizogo.

⁸⁴Mino mtumishio nigodzere hadi rini, undaatiya adabu rini ano anaonigayisa?

⁸⁵Atu a kudzikarya akanitsimbira madibwa, chinyume cha shariyayo.

⁸⁶Malagizogo gosi ni ga kukuluphirika, niterya mana atu ananigayisa bila chausa!

⁸⁷Phadide aniangamize, ela mino sidzangbwericha shariyazo.

⁸⁸Nitivya kulengana na mendzwayo isiyosika, ili niweze kulunga malagizogo.

⁸⁹Ee Mwenyezi Mlungu, nenoro rinadumu hata kare na kare, nkuima imara ko mlunguni.

⁹⁰Uaminifuo unadumu chivyazi hadi chivyazi, dunia ukayiika phatuphe nayo inadumu.

⁹¹Viumbe vyosi vi phapha rero kpwa shariyayo, mana vitu vyosi vinakuhumikira uwe.

⁹²Kalapho si ko kuhamirwa ni shariyazo mino ningekala nkafwa na kugaya kpwangu.

⁹³Sindagayala malagizogo, mana ndigo chigonihenda nkale moyo.

⁹⁴Mino ni wako, nitivya, mana nkahenda chadi kulunga malagizogo.

⁹⁵Atu ayi ananiotea aniangamize, ela mino naririkana malagizogo.

⁹⁶Nkamanya kukala chila chitu china mwishowe, ela malagizogo tagana mwisho.

⁹⁷Kpwa kpweli shariyayo naimendza, nasinda dii kuiririkana.

⁹⁸Malagizogo gananihenda nkale na ikima kuriko maadui gangu, mana ga phamwenga nami chila wakati.

⁹⁹Nina ufahamu kuriko alimu angu osi, kpwa kukala nkuririkana malagizogo.

¹⁰⁰Nina ufahamu kuriko atumia, mana ninagbwira shariyazo.

¹⁰¹Nkadzizuwiya nsilunge njira mbii, ili niweze kugbwira nenoro.

¹⁰²Sikaricha shariyazo, mana we mwenye ukanifundza.

¹⁰³Manenogo ga mtswano sana kpwangu, ga mtswano kuriko asali!

¹⁰⁴Kutsupira malagizogo ninaphaha ufahamu, kpwa hivyo nazira chila njira mbii.

¹⁰⁵Nenoro ndiyo taa inilongozayo, na ni mwanga wa njira yangu.

¹⁰⁶Nkaapa kpwa kuhenda rya chirapho kukala nindagbwira shariyazo za haki.

¹⁰⁷Nikagaya sana, ee Mwenyezi Mlungu, nihenda nikale moyo kulengana na nenoro!

¹⁰⁸Ee Mwenyezi Mlungu, phokera voyo rangu ra shukurani, na unifundze shariyazo.

¹⁰⁹Maisha gangu ga hatarini wakati wosi, ela siyala shariyayo.

¹¹⁰Atu ayi akanihegera mihego ela sindaricha malagizogo.

¹¹¹Malagizogo ni urisi wangu wa kare na kare, gago ndigo gahamirago mwangu moyoni.

¹¹²Moyo wangu u tayari kulunga shariyazo hata kare na kare.

¹¹³Simendze anafiki, ela namendza shariyayo.

¹¹⁴Uwe ndiwe chimbiriro rangu na ngao yangu, nikaika tumaini rangu kahi ya nenoro.

¹¹⁵Niukirani, mwi muhendao mai, ili niweze kulunga malagizo ga Mlungu wangu.

¹¹⁶Nigbwiririra dza urivyolaga kpwa nikale moyo, usikubali niifike kahi za tumaini rangu!

¹¹⁷Nigbwira kpwa nikale salama, na nienderere kuririkana shariyazo wakati wosi!

¹¹⁸Uwe ukuarema osi arichao kulunga shariyazo, mana likakado rao ni ra bure.

¹¹⁹Ayi osi duniani unaausa dza uchafu, kpwa hivyo mino namendza malagizogo.

¹²⁰Nakakama kpwa kukuogopha uwe, naogopha uamulio.

¹²¹Nkahenda garigo ga haki na ga sawa, usiniriche mikononi mwa hinyo anitesao.

¹²²Hakikisha mtumishio a salama, usiriche atu asiomanya Mlungu akanigayisa.

¹²³Matso gangu gakaremwa kurorera wokofuo, kpwa kugodzera chilaganecho cha haki.

¹²⁴Nihendera mimi mtumishio kulengana na mendzwayo isiyosika, na unifundze shariyazo.

¹²⁵Mimi ni mtumishio, nipha uwezo wa kuelewa ili nimanye malagizogo.

¹²⁶Ni wakati wa uwe kuhenda chitu, ee Mwenyezi Mlungu mana shariyazo tazilungbwa.

¹²⁷Mana mino namendza malagizogo kuriko zahabu, tsona kuriko zahabu swafi.

¹²⁸Na kpwa vira malagizogo gosi kpwangu ga sawa, ndiyo mana nazira chila njira ya handzo.

¹²⁹Malagizogo ni ga ajabu, kpwa hivyo mino nagalunga moyo kutsuka.

¹³⁰Maelezo ga mafundzogo nkureha mwanga, na kumuhenda asiyemanya aweze kuelewa.

¹³¹Mromo wangu u laza na navumahika, kpwa kuaza sana malagizogo.

¹³²Galuka unionere mbazi, dza uhenderavyo akumendzao wakati wosi.

¹³³Nilongoza kama urivyolaga kulengana na nenoro, usiriche uyi wowosi ukanitawala.

¹³⁴Nitivya na mateso ga anadamu ili niweze kugbwira shariyazo.

¹³⁵Nimwirikira mwangao mimi mtumishio, na unifundze shariyazo.

¹³⁶Matsozi gananimwagika kpwa vira ambavyo shariyazo tazigbwirwa.

¹³⁷Ee Mwenyezi Mlungu, Uwe u wa haki, na uamulio ni wa sawa.

¹³⁸Uwe ukalavya malagizogo kpwa haki na uaminifu.

¹³⁹Mendzwa yangu kpwako inanirya, kpwa sababu aviha angu taalunga manenogo.

¹⁴⁰Ahadizo zinakuluphirika, nami mtumishio nazimendza.

¹⁴¹Mino ni mdide na ninaberwa, ela mino siyala shariyazo.

¹⁴²Hakiyo ni haki hata kare na kare, na shariyayo ni ya kpweli.

¹⁴³Nkaphaha tabu na mashaka, ela malagizogo gananihenda nihamirwe.

¹⁴⁴Malagizogo ni ga haki hata kare na kare, nipha ufahamu kpwa nikale moyo.

¹⁴⁵Naiha na moyo wangu wosi, nijibu ee Mwenyezi Mlungu, nami ndalunga shariyazo.

¹⁴⁶Ninakuririra uwe, unitivye ili niphahe kugbwira malagizogo.

¹⁴⁷Nikurauka chiti na kuvoya msada, tumaini rangu nkariika kpwenye nenoro.

¹⁴⁸Nachesa matso usiku wosi ili niririkane ahadizo.

¹⁴⁹Sikira sauti yangu kulengana na mendzwayo isiyosika, rinda maisha gangu, ee Mwenyezi Mlungu, kulengana na shariyazo.

¹⁵⁰Hinyo anipangirao njama akanifikira phephi, ela aho a kure na shariyazo.

¹⁵¹Ela uwe u phephi nami, ee Mwenyezi Mlungu, na malagizogo gosi ni ga kpweli.

¹⁵²Hangu kare nádzifundza kula kpwa malagizogo, kpwa kukala wagahenda gakale ga kare na kare.

¹⁵³Lola vira nigayavyo na unitivye, mana siyarire shariyayo.

¹⁵⁴Nikanira na unikombole, rinda maisha gangu kulengana na ahadiyo.

¹⁵⁵Wokofu u kure na atu ayi, mana aho taaendza shariyazo.

¹⁵⁶Mbazizo ni nyinji, ee Mwenyezi Mlungu, manyirira maisha gangu kulengana na hakiyo.

¹⁵⁷Aviha angu na anigayisao ni anji, ela sindaricha kulunga malagizogo.

¹⁵⁸Nionapho aho ario si aaminifu, nikutsukirwa sana, mana taagbwira nenoro.

¹⁵⁹Lola vira nimendzavyo shariyazo, tundza maisha gangu, ee Mwenyezi Mlungu, kulengana na mendzwayo isiyosika.

¹⁶⁰Manenogo gosi ni ga kpweli, shariyazo zosi za haki zinadumu ta kare na kare.

¹⁶¹Akulu ananigayisa bila chausa, ela moyo wangu unakakama kpwa kuogopha nenoro.

¹⁶²Ninahamirwa ni nenoro, dza mutu achiyeteka mali nyinji.

¹⁶³Handzo narizira na kurinema, ela namendza shariyazo.

¹⁶⁴Nakutogola kano sabaa kpwa siku, kpwa ajili ya shariyazo za haki.

¹⁶⁵Hinyo amendzao shariyayo ana amani kulu na taphana chochosi ndicho ahenda akpwale.

¹⁶⁶Ninagodza unitivye, ee Mwenyezi Mlungu, na ninalunga malagizogo.

¹⁶⁷Nagbwira malagizogo, mana nagamendza sana.

¹⁶⁸Nagbwira shariyazo na malagizogo, mana uwe unamanya njira zangu zosi.

¹⁶⁹Chiriro changu nachikufikire, ee Mwenyezi Mlungu, nipha ufahamu kulengana na nenoro.

¹⁷⁰Mavoyo gangu nagakufikire, nitivya kulengana na ahadiyo.

¹⁷¹Madomo gangu nagakutogole, mana uwe unanifundza shariyazo.

¹⁷²Lilimi rangu rindaimba kuhusu nenoro, mana malagizogo gosi ni ga haki.

¹⁷³Mkpwonoo naukale tayari kuniterya, mana nkatsambula kugbwira shariyazo.

¹⁷⁴Naaza wokofuo, ee Mwenyezi Mlungu, na shariyayo inanihenda nihamirwe.

¹⁷⁵Nijaliya nkale moyo ili niphahe kukutogola, na shariyazo ziniterye.

¹⁷⁶Nkatanga-tanga dza ngʼondzi chiroangamika, niendza mimi mtumishio, mana siyala malagizogo.