Read digo Zaburi 135 Bible Online

Zaburi 135 - digo bible

Zaburi 135

¹Haleluya. Mtogoleni Mwenyezi Mlungu. Dzina ra Mwenyezi Mlungu naritogolwe, mtogoleni Mwenyezi Mlungu mwi atumishie.

²Mwimwi muhumikao kpwenye nyumba ya Mwenyezi Mlungu, muhalani mwa nyumba ya Mlungu wehu!

³Mtogoleni Mwenyezi Mlungu, mana iye ni mnono, muimbireni mana ana mbazi!

⁴Mana Mwenyezi Mlungu akadzitsamburira atu a chivyazi cha Jakobo, Aiziraeli akale atue anaoasamini.

⁵Mana namanya kukala Mwenyezi Mlungu ni mkpwulu na kukala iye ni zaidi ya milungu yosi.

⁶Mwenyezi Mlungu anahenda rorosi alondaro, mlunguni na duniani, baharini na katika vivwa vyosi.

⁷Iye ndiye ahendaye maingu gakazuka, chila pembe za dunia atengezaye limeme ra mvula, na kureha phepho kula kpwenye nyumbaze za kuika hazina.

⁸Iye ndiye ariyeolaga ana a mwandzo a chilume a Misiri, a binadamu na a nyama.

⁹Iye ambaye wakuhendera ishara na maajabu mo mwako uwe Misiri, chinyume na Farao na atumishie osi.

¹⁰Ariyeolaga atu a mataifa ganjina manji, na afalume a mkpwotse.

¹¹Sihoni, mfalume wa Aamori na Ogi, mfalume wa Bashani na falume zosi za Kanani.

¹²Tsi zao achizilavya kama urisi, urisi wa atue, Aiziraeli.

¹³Dzinaro, ee Mwenyezi Mlungu rinadumu hata kare na kare, undatambukirwa ni vivyazi vyosi.

¹⁴Mana Mwenyezi Mlungu andaamula atue kukala taana makosa, na kuaonera mbazi atumishie.

¹⁵Milungu ya mataifa, ni ya feza na zahabu, yotengezwa ni anadamu.

¹⁶Ina milomo ela taigomba, ina matso ela taiona.

¹⁷Ina masikiro ela taisikira, na milomoni mwao tamuna pumuzi.

¹⁸Aho aitengezao na aho aikuluphirao, andakala dza iyo.

¹⁹Mwi atu a Iziraeli, mtogoleni Mwenyezi Mlungu! Mwi a nyumba ya Aruni mtogoleni Mwenyezi Mlungu.

²⁰Mwi achina Lawi, mtogoleni Mwenyezi Mlungu! Mwi muogophao Mwenyezi Mlungu, mtogoleni!

²¹Mwenyezi Mlungu naatogolwe hiko Sayuni, iye asagalaye Jerusalemu! Mwenyezi Mlungu naatogolwe! Haleluya.