Read digo Zaburi 139 Bible Online

Zaburi 139 - digo bible

Zaburi 139

¹Kpwa chilongozi wa aimbadzi. Zaburi ya Daudi. Uwe Mwenyezi Mlungu ukanichunguza nawe unanimanya vyo nrivyo.

²Unanimanya nisagalapho na niunukapho; unamanya maazo gangu wakati u kure nami.

³Uwe unamanya kutuluka kpwangu na kulala kpwangu unaelewa njira zangu zosi.

⁴Hata kabila ya mimi kugomba neno rorosi, uwe Mwenyezi Mlungu ukumanya rondirogomba.

⁵Unanizangira pande zosi, mbere na nyuma, nawe unanirinda na mkpwonoo wenye uwezo.

⁶Marifwago, gananiangalaza, ni makulu sana hata siweza kugaelewa.

⁷Niphiyephi ili nchimbire Rohoo? Niphiyephi ili nchimbire usoo?

⁸Nchiambuka kuphiya mlunguni, uwe u kuko; nchihenda kuzimu kukala chitanda changu, uwe u kuko.

⁹Nchiuruka dza nyama wa mapha, hadi kure sana ko uphande wa mlairo wa dzuwa, au hata nchisagala mwisho wa bahari,

¹⁰hata kuko undanilongoza na mkpwonoo, mkpwonoo wa kulume undanigbwira ngingingi.

¹¹Nchiamba, “Hakika jiza narinibwiningize, na mwanga uchionizunguluka ukale usiku,”

¹²mana ro jiza taringekala jiza kpwako, usiku ungengʼala dza mutsi, mana jiza na mwanga usawa kpwako.

¹³Uwe ndiwe uriyeumba vilungo vyosi vya ndani vya mwiri wangu, waniunganisha phamwenga ndanini mwa mayo.

¹⁴Nakutogola mana waniumba kpwa njira ya ajabu. Mahendogo ni ga ajabu, nami nagamanya tsetsetse.[20]

¹⁵Umbo rangu tariyafwitsika mwako nriphoumbwa phatu pha siri, nriphoumbwa kpwenye vivwa vya dunia.

¹⁶Uwe waniona kabila sidzangbwekamilika. Siku zangu zosi urizonipangira, zaandikpwa mwako chitabuni kabila taidzangbwekalako hata mwenga.

¹⁷Ee Mlungu, maazogo ni ga samani sana kpwangu! Ni manji hata tagaweza kuolangika.

¹⁸Ningegaolanga gangekala manji kuriko mtsanga. Nilamukapho bado ni phamwenga nawe.

¹⁹Ee Mlungu, naaza ungeolaga atu ayi! Niukirani hipha mwi aolagadzi!

²⁰Anagomba mai kukuhusu, na kugomba mai kpwa kuhumira dzinaro.

²¹Ee Mwenyezi Mlungu, unamanya kukala ninaamena nyo akumenao, na kuatsukirirwa nyo anaokuasi.

²²Maaduigo ni maadui gangu, nami ndaamena piya.

²³Nichunguza, uwe Mlungu, umanye moyo wangu, nijeza umanye maazo gangu.

²⁴Lola ichikala muna njira mbii mwangu ndani, na unilongoze njira ya kare na kare.