Read digo Zaburi 140 Bible Online

Zaburi 140 - digo bible

Zaburi 140

¹Kpwa chilongozi wa aimbadzi. Zaburi ya Daudi. Ee Mwenyezi Mlungu, nitivya na atu ayi, nchinga na atu a maroho ga kulonda kuhenda fujo,

²apangao mai mwao mioyoni na kufyakatsira kondo wakati wosi.

³Ananola malilimi gao na kukala dza ga nyoka, na maneno gao ni makali dza sumu ya tsakapala.

⁴Ee Mwenyezi Mlungu, nirinda na mikono ya atu ayi, nchinga na atu a maroho ga kulonda kuhenda fujo, ambao akapanga kunihega.

⁵Atu a kudzikarya akanihegera mihego akanihegera chimia na kowa akanihegera mihego mwangu njirani.

⁶Uwe Mwenyezi Mlungu, nakuambira kukala, uwe ndiwe Mlungu wangu, kpwa hivyo phundza mavoyo gangu.

⁷Ee Mwenyezi Mlungu, Bwana wangu na muokoli wangu mwenye nguvu, uniheheraye wakati wa viha.

⁸Ee Mwenyezi Mlungu, usiaphe ayi alondago, usiriche mipango yao mii ikaongokerwa.

⁹Usiruhusu maadui gangu gakanishinda, go mai anipangirago, nagaauyire enye!

¹⁰Makala ga moho nagaamwagikire, naatsuphwe mohoni, kpwenye madibwa na asiunuke tsona!

¹¹Hinyo amendzao kusengenya ayawao naasiongokerwe kpwenye tsi, uyi nauangamize mara mwenga hinyo atu ahendao fujo.

¹²Namanya kukala Mwenyezi Mlungu anakanira achiya, na kuahendera haki agayi.

¹³Hakika atu a haki andatogola dzinaro, na ahendao ga haki andasagala pho phako uripho.