Read digo Zaburi 145 Bible Online

Zaburi 145 - digo bible

Zaburi 145

¹Zaburi ya sifwa ya Daudi. Nindakulika uwe Mlungu wangu na mfalume wangu, nindatogola dzinaro hata kare na kare.

²Chila siku ndakulika uwe, na kutogola dzinaro hata kare na kare.

³Mwenyezi Mlungu ni mkpwulu na anafwaha kutogolwa sana, ukuluwe taupimika.

⁴Sifwa za mahendoge zindasemurirwa chivyazi hadi chivyazi.

⁵Nindaririkana nguma ya unono wa ukuluo na mahendogo ga ajabu.

⁶Atu andatangaza ukulu wa mahendogo ga kuogofya nami ndatangaza ukuluo.

⁷Andatangaza sifwa za vira urivyo mnono sana na kuimba kpwa kufwahirwa kuhusu haki uriyo nayo.

⁸Mwenyezi Mlungu ana huruma na mbazi, iye katsukirwa upesi na ana unji wa mendzwa isiyosika.

⁹Mwenyezi Mlungu ni mnono kpwa osi, na ana mbazi na vyosi arivyoumba.

¹⁰Viumbevyo vyosi vindakutogola, ee Mwenyezi Mlungu, atakatifuo andakuuyizira shukurani.

¹¹Andagomba kuhusu nguma ya ufalumeo, na kugomba kuhusu uwezoo,

¹²ili chila mutu amanye mahendogo makulu, na nguma ya unono wa ufalumeo.

¹³Ufalumeo ni wa kare na kare, na utawalao unadumu vivyazi vyosi. Mwenyezi Mlungu ni muaminifu kahi ya gosi arigolaga, na wa mbazi katika gosi ahendago.

¹⁴Mwenyezi Mlungu nkuaimisa osi agbwao na kuaunula osi anaoremererwa ni mizigo.

¹⁵Viumbe vyosi vinakulolera uwe nawe unavipha chakurya kpwa wakati unaofwa.

¹⁶Unafwenula mkpwonoo, na kumvunisa chila chiumbe chiricho moyo.

¹⁷Mwenyezi Mlungu ni wa haki kahi ya njiraze zosi, na ni wa mbazi kahi ya mahendoge gosi.

¹⁸Mwenyezi Mlungu a phephi na osi amvoyao, osi amuihao kpwa uaminifu.

¹⁹Nkuatimizira haja zao osi amuogophao, tsona nkusikira chiriro chao na kuativya.

²⁰Mwenyezi Mlungu nkuarinda osi ammendzao, ela andaangamiza ayi osi.

²¹Mino ndatangaza sifwa za Mwenyezi Mlungu, viumbe vyosi navitogole dzinare takatifu hata kare na kare.