Read digo Zaburi 147 Bible Online

Zaburi 147 - digo bible

Zaburi 147

¹Haleluya. Mwenyezi Mlungu naatogolwe! Ni vinono kumuimbira sifwa Mlungu wehu, vinafwaha na vinahama kumtogola.

²Mwenyezi Mlungu ndiye adzengaye Jerusalemu, na kukusanya Aiziraeli ariokala akatsamizwa kpwa lazima.

³Anaphoza marenda ariovundzika moyo na kualagula vironda vyao.

⁴Ndiye apangaye nyenyezi zikale ngaphi, na kuzipha zosi madzina gao.

⁵Mwenyezi Mlungu wehu ni mkpwulu, na ana uwezo munji, kumanyakpwe takuna mphaka.

⁶Mwenyezi Mlungu anaaunula anyenyekevu ela atu ayi anaabwaga photsi.

⁷Muimbireni Mwenyezi Mlungu mawira ga shukurani, mpigireni ngephephe Mlungu wehu.

⁸Iye nkufwinika mlunguni na maingu, tsi akaipha mvula, nkuhenda nyasi zimere dzulu ya vidzango.

⁹Nkuapha chakurya nyama a tsakani na vidzana nyama a mapha virirapho.

¹⁰Kahamirwa ni mkpwotse wa farasi wala usujaa wa anajeshi.

¹¹Ela Mwenyezi Mlungu ahamirwa ni hinyo amuogophao, hinyo adamirao mendzwaye isiyosika.

¹²Ee Jerusalemu, mtogole Mwenyezi Mlungu! Mtogole Mlunguo uwe Sayuni.

¹³Mana ndiye adinisaye magbwama ga maryangogo, iye nkuajaliya atuo ario mumo.

¹⁴Iye nkuhenda miphakayo ikale na amani, nkukumvunisa na nganu nono.

¹⁵Iye nkulavya malagizoge duniani na nenore nkukamilisha kaziye, mara mwenga.

¹⁶Nkutandaza barafu phepheya dza nyoya za mangʼondzi na kutsamula manena dza ivu.

¹⁷Nkureha mvula ya mawe dza kokoto, takuna awezaye kuvumirira mnyevu aihumayo.

¹⁸Chisha nkugomba neno gakatsatsamuka, akavumisa phutore, na madzi gakajera.

¹⁹Nkumanyisa nenore kpwa chivyazi cha Jakobo, na Aiziraeli masharutige na malagizoge.

²⁰Gaga kagahenderere taifa ranjina rorosi, aho taamanya shariyaze. Haleluya. Mwenyezi Mlungu naatogolwe!