Read digo Zaburi 18 Bible Online

Zaburi 18 - digo bible

Zaburi 18

¹Kpwa chilongozi wa aimbadzi. Zaburi ya Daudi, mtumishi wa Mwenyezi Mlungu. Iye wamuimbira Mwenyezi Mlungu hipho siku Mwenyezi Mlungu ariphomtivya kula mikono ya avihae osi na kula mkpwono wa Sauli. Waimba achiamba: Ninakumendza sana Mwenyezi Mlungu mana ndiwe nguvu zangu.

²Mwenyezi Mlungu ndiye mwamba wangu, ngome yangu na mkomboli wangu, Iye ndiye Mlungu wangu, mwamba wangu na chimbiriro rangu. Iye ndiye ngao yangu, nguvu ya wokofu wangu na ngome yangu.

³Námvoya Mwenyezi Mlungu astahiliye togo, naye achinitivya na maadui gangu.

⁴Kowa za chifo kala zikanizunguluka, maimbi ga kuangamiza ganibwiningiza.

⁵Kowa za kuzimu zanilinga-linga, mihego ya chifo yanizangira.

⁶Katika kugaya kpwangu námuiha Mwenyezi Mlungu, námririra Mlungu wangu. Naye wasikira sauti yangu kula mo mwakpwe nyumbani, masikiroge gachiphundza chiriro changu.

⁷Yo tsi yasumba na ichikakama, misingi ya myango ichisumba kpwa sababu Mlungu kala akatsukirwa.

⁸Mosi wafuka kula mwakpwe pulani, moho uochao uchituluka kula mwakpwe mromoni, makala ga moho gachituluka kula mumo.

⁹Wakuwesa ko Mlunguni achitserera, ingu dziru richikala tsini ya maguluge.

¹⁰Wapanda dzulu ya kerubi achiuruka. Achionewa dzulu ya mapha ga phepho.

¹¹Wahenda jiza rikale hemare chiromzunguluka, maingu maziho ga mvula.

¹²Mvula ya mawe na makala ga moho gatuluka kula kpwa nyo mwanga mkali uriokala mbereze na go maingu maziho ga mvula.

¹³Chisha Mwenyezi Mlungu wapiga msindo ko mlunguni, iye Ariye Dzulu Kuriko Vyosi wakota kululu, na kuchinya mvula ya mawe na makala ga moho.

¹⁴Watsupha miviye, achitsamula maaduige, waatsuphira limeme, achiachimbiza.

¹⁵Ndipho mikondo ya madzi ichioneka na misingi ya dunia ichifwenulwa kpwa kudemurirwa ni uwe Mwenyezi Mlungu, kpwa pumuzi za pulayo.

¹⁶Wagolosa mkpwonowe kula dzulu, achinigbwira, achinituluza kula madzi manji.

¹⁷Wanitivya na maadui angu enye mkpwotse, hinyo arionimena mana kala ana mkpwotse zaidi yangu.

¹⁸Anivamia wakati kala nagaya ela Mwenyezi Mlungu achinikanira.

¹⁹Achinituluza achiniphirika phatu pharipho na nafwasi, achinitivya kpwa kukala kala ninamhamira.

²⁰Mwenyezi Mlungu wanihendera sawa-sawa na haki yangu, waniripha sawa-sawa na uswafi wa mikono yangu.

²¹Mana nágbwira njira za Mwenyezi Mlungu, na siyamricha Mlungu wangu, kpwa kuhenda uyi.

²²Mana malagizoge gosi nagagbwira, na amurize siyaziricha.

²³Siyakala na kosa mbereze, nádzizuwiya nsihende dambi.

²⁴Phahi Mwenyezi Mlungu akaniripha sawa-sawa na haki yangu, sawa-sawa na uswafi wangu mbereze.

²⁵Kpwa mutu muaminifu unadzionyesa kukala u muaminifu, kpwa mutu asiye na kosa unadzionyesa kukala kuna makosa,

²⁶kpwa mutu achiyedzitakasa unadzionyesa kukala u mtakatifu, ela kpwa mutu mui unadzionyesa kukala u msiru.

²⁷Unaativya atu a pole, ela unaatsereza atu adziunulao.

²⁸Uwe Mwenyezi Mlungu, ndiwe uasaye taa yangu. Mlungu wangu nkuhenda jiza rangu rikakala nuru.

²⁹Kpwa msadao, ninashambulia jeshi, kpwa msada wa Mlungu wangu ninaturya midzi yenye ngome.

³⁰Njira ya Mlungu taina ila, ahadi ya Mwenyezi Mlungu ni ya kukuluphirika! Iye ni ngao kpwa osi amchimbirirao.

³¹Takuna Mlungu wanjina isiphokala Mwenyezi Mlungu. Takuna mwamba wanjina isiphokala Mlungu wehu.

³²Mlungu ndiye anitiyaye mkpwotse, na kuhenda njira yangu ikale salama.

³³Anahenda magulu gangu, gakale dza ga kulungu, na kuniwezesha niime kpwenye myango.

³⁴Nkunifundza kupigana viha ili mikono yangu iweze kutonyola uha wa shaba.

³⁵Nawe ukanipha ngaoyo ya ushindi, na mkpwonoo wa kulume ukanigbwiririra, msadao ukanihenda nkale mutu mkpwulu.

³⁶Ukahenda njira yangu ikale pana, na magulu gangu tagahereza.

³⁷Názoresa maadui gangu hadi nchigagbwira, nami siyalola nyuma hadi niriphogaangamiza.

³⁸Nágapiga hadi gachigbwa phangu maguluni, nago tagawezere kuunuka tsona.

³⁹Wanipha nguvu za kupigana viha, na uchihenda maadui gangu gachite mavwindi mbere zangu.

⁴⁰Wahenda maadui gangu ganichimbire, nami nkuangamiza osi animenao.

⁴¹Aririra msada ela taphana ariyeativya, amririra Mwenyezi Mlungu, ela ye kayaajibu.

⁴²Náasaga-saga achikala dza vumbi riphepheruswaro ni phepho, nchiavyoga-vyoga dza tope za njirani.

⁴³Uwe waniokola kula kpwa atu angu ariolonda kunishambuliya, uchinihenda mfalume wa mataifa. Atu nsioamanya akakala tsini yangu.

⁴⁴Ariphosikira habari zangu tu, nyo ajeni anitii, achedza na achidzitsereza mbere zangu.

⁴⁵Ajeni avundzika moyo, achituluka kula mwao ngomeni kuno anakakama.

⁴⁶Mwenyezi Mlungu a moyo! Naatogolwe hiye ariye mwamba wangu! Náaunulwe Mlungu wa wokofu wangu.

⁴⁷Iye ndiye Mlungu aniriphiziraye chisasi, na kuika mataifa gakale tsini yangu,

⁴⁸anitivyaye kula kpwa maadui gangu. Waniunula dzulu ya atu anipingao, na uchinitivya na atu a fujo.

⁴⁹Kpwa hivyo, nindakulavira shukurani kahi za mataifa, uwe Mwenyezi Mlungu, nami ndaimba mawira ga kukutogola.

⁵⁰Mlungu nkumupha mfalumewe ushindi mkpwulu, na kumuonyesa mendzwa isiyosika hiye mmwagirwa mafuhawe, yani Daudi na chivyaziche hata kare na kare.