Read digo Zaburi 2 Bible Online

Zaburi 2 - digo bible

Zaburi 2

¹Kpwa utu wani atu a mataifa ganjina anapanga njama mbii? Mbona anapanga mambo ambago tagandahendeka?

²Afalume a dunia anadzitayarisha, na atawala anapanga njama phamwenga, chinyume cha Mwenyezi Mlungu na chinyume cha ye mmwagirwawe mafuha.

³Aho anaamba, “Nahukate silisili zao, ili husikale atumwa tsona.”

⁴Hiye atawalaye hiko mlunguni anatseka; Mwenyezi Mlungu anaanyetera.

⁵Chisha andaademurira kpwa usiru na kuatishira kpwa tsukizi, aambe,

⁶“Mimi nkatawaza Mfalume nriyemtsambula, anatawala kula Sayuni, mwango wangu mtakatifu!”

⁷Na ye Mfalume anaamba: “Nindakuambirani lagizo rolaviwa ni Mwenyezi Mlungu. Iye waniamba, ‘Uwe u mwanangu, rero nikakala sowe.

⁸Nivoya, nami nindahenda mataifa ganjina gosi gakale urisio, na dunia yosi indakala yako.

⁹Undaavundza na fwimbo ya chuma na kuatisa-tisa dza nyungu.’ ”

¹⁰Kpwa hivyo, mwimwi afalume kalani na ikima, na mwimwi atawala mchikanywa, sikirani!

¹¹Muhumikireni Mwenyezi Mlungu na wuoga, fwahirwani na mkakame.

¹²Msujudiyeni, sedze akatsukirwa, namwi mkafwa kabila ya wakati, mana tsukizi za Mlungu ni za phephi. Ela atu amchimbirirao Mlungu, aajaliwa.