Read digo Zaburi 20 Bible Online

Zaburi 20 - digo bible

Zaburi 20

¹Kpwa chilongozi wa aimbadzi. Zaburi ya Daudi. Mwenyezi Mlungu naakujibu wakati u mashakani. Dzina ra Mlungu wa Jakobo narikurinde.

²Naakurehere msada kula nyumbaye ya kuvoya Mlungu, na akuphe msada kula mwango wa Sayuni.

³Naatambukire sadakazo zosi naakubali sadakazo za kuochwa.

⁴Naakuphe chira uchiazacho mwako moyoni na aihende mipangoyo yosi ifwanikiwe.

⁵Hundashangiliya hutakaphoturya na huimise bendera zehu kpwa dzina ra Mlungu wehu. Mwenyezi Mlungu naakujibu mavoyogo gosi!

⁶Sambi ninamanya Mwenyezi Mlungu nkumterya mmwagirwa mafuhawe, andamjibu kula phatuphe phatakatifu kuko Mlunguni na kumupha ushindi mkpwulu kpwa uwezo wa mkpwonowe wa kulume.

⁷Anjina nkudzikarya kpwa sababu ya magari ga kuvwehwa ni farasi, anjina akadzikarya kpwa sababu ya farasi, ela swino hundakuluphira nguvu za Mwenyezi Mlungu, Mlungu wehu.

⁸Aho andadzikpwala na kugbwa ela swino hundaunuka na kuima wima.

⁹Muphe mfalume ushindi, ee Mwenyezi Mlungu, huchikuvoya hujibu.