Read digo Zaburi 22 Bible Online

Zaburi 22 - digo bible

Zaburi 22

¹Kpwa chilongozi wa aimbadzi. Kuhumira sauti ya “Chiphala cha ligundzu.” Zaburi ya Daudi. Mlungu wangu, Mlungu wangu, mbona ukaniricha? Nakuvoya na kuula, ela msadao u kure nami.

²Nkukuiha mutsi, Mlungu wangu, ela kunijibu; nkukuiha usiku, ela sioya.

³Ela uwe ndiwe Mtakatifu, usagariraye chihi cha endzi, utogolwaye ni Aiziraeli.

⁴Akare ehu akukuluphira, akukuluphira, nawe uchiaokola.

⁵Akuririra uwe, nao achitivywa; akukuluphira uwe, nao kuyaagbwiza haya.

⁶Ela atu nkuniona dza mnyololo, nao ananifyorera na kunibera.

⁷Atu osi anionao, nkunizemerera; nkunivwinyurira madomo na kusukasuka vitswa.

⁸Aho nkuamba, “Wamkuluphira Mwenyezi Mlungu, phahi naamutivye naamuokole mana anamuhamira!”

⁹Uwe ndiwe uriyenituluza kula ndanini mwa mayo, na ndiwe uriyeniika salama phakpwe chifuwani.

¹⁰Nkakala mikononi mwako hangu nivyalwe, na ukakala Mlungu wangu hangu nituluke ndanini mwa mayo.

¹¹Usikale kure nami, mana tabu i phephi, nami sina wa kuniterya.

¹²Maadui manji gakanizunguluka dza ndzau, maadui enye mkpwotse dza ndzau kula Bashani akanizangira![5]

¹³Maadui gangu gakafwenula kanwa zao chinyume changu, dza simba angurumao wakati anamwamula-mwamula nyama.

¹⁴Mwiri wangu ukasirirwa ni nguvu, mifupha yangu yosi ikateguka. Nkakata tamaa, moyo wangu ukatsatsamuka avi ni mshumaa uakao.

¹⁵Umiro wangu ukauma dza chidzaya na lilimi rangu rikagbwirana na lilakalaka. Nawe ukaniricha vumbini ili nifwe.

¹⁶Kundi ra atu ayi rikanizunguluka; rikanizangira dza kundi ra madiya. Rikadunga mikono na magulu gangu.

¹⁷Nkasala mifupha mihuphu, maadui gangu gakanitongʼorera matso na kunifyorera.

¹⁸Anaganya nguwo zangu, na kupigira kura kpwa ajili ya kandzu yangu.[6]

¹⁹Ela uwe Mwenyezi Mlungu, usikale kure nami; uwe uriye msada wangu, henda wangbwi wedze uniterye!

²⁰Nikombola sedze nikaolagbwa na upanga; tivya maisha gangu na madiya higo!

²¹Uniokole kanwani mwa simba; nitivya na pembe za nyahi!

²²Nindatangaza dzinaro kpwa enehu, nindakutogola kahi-kahi ya mkpwutano wao.

²³Mwimwi munaogopha Mwenyezi Mlungu, mtogoleni! Muishimuni mwi chivyazi cha Jakobo! Muogopheni mwi vivyazi vyosi vya Iziraeli!

²⁴Iye kayakpwinya agayi, wala kayabera kugaya kpwao; kayaaricha, ela ariphovoywa msada wasikira.

²⁵Nindakutogola kpwenye mkpwutano mkpwulu. Nindausa naziri zangu mbere za aho anaokuogopha.

²⁶Agayi andarya kumvuna. Osi amuendzao Mwenyezi Mlungu andamtogola. Kalani moyo ta kare na kare.

²⁷Atu a dunia ndzima andatambukira na amgalukire Mwenyezi Mlungu. Yani atu a makabila ganjina gosi duniani andaabudu mbereze.

²⁸Mana Mwenyezi Mlungu ni mfalume, naye anatawala mataifa gosi duniani.

²⁹Matajiri osi duniani andaabudu mbereze, osi ambao nkufwa andachita mavwindi mbereze, osi ambao taaweza kudziika moyo.

³⁰Vivyazi vyedzavyo vindamhumikira, vindasemurirwa habari za Mwenyezi Mlungu.

³¹Atu ambao taadzangbwevyalwa, andatangazirwa kukala Mlungu ndiye ariyetivya atue na kuapha haki.