Read digo Zaburi 28 Bible Online

Zaburi 28 - digo bible

Zaburi 28

¹Zaburi ya Daudi. Nakuiha uwe Mwenyezi Mlungu, mwamba wangu, usinipuze. Mana uchininyamarira ndakala sina tafwauti na hinyo atserezwao mbirani.

²Phundza mavoyo gangu, ninaphokuririra uniterye, na ninaphounula mikono kuloza phatupho phatakatifu.

³Usiniangamize phamwenga na atu ayi, yani hinyo anaohenda mai atu abishao manono na ayawao kuno maroho gao ganaazira mai.

⁴Atiye adabu kulengana na mahendo gao, kulengana na mai arigohenda. Atiye adabu kulengana na arigohenda na mikono yao, ahendere gara ganagofwaha kuhenderwa.

⁵Kpwa vira taajali ahendago Mwenyezi Mlungu, wala kazi za mikonoye, andaabananga na kandaadzenga tsona.

⁶Mwenyezi Mlungu naatogolwe mana akasikira mavoyo gangu.

⁷Mwenyezi Mlungu ndiye nguvu yangu na ngao yangu, moyo wangu unamkuluphira iye, iye nkuniterya, na moyo wangu unashangiliya nami nindamuimbira wira wa shukurani.

⁸Mwenyezi Mlungu ndiye nguvu ya atue, ni chimbiriro ra usalama kpwa mpakpwa mafuhawe.

⁹Ativye atuo, ajaliye urisio kala mrisa wao, uarorome hata kare na kare.