Read digo Zaburi 33 Bible Online

Zaburi 33 - digo bible

Zaburi 33

¹Mwimwi enye haki, muimbireni na raha, Mwenyezi Mlungu, mwimwi muhendao irivyo sawa inafwaha mumtogole.

²Mtogoleni Mwenyezi Mlungu kpwa ngephephe, muimbireni kpwa kuhumira chinubi cha nyugbwe kumi.

³Muimbireni wira muphya, pigani chinubi kuchimanya na mpige njerejere.

⁴Kpwa mana neno ra Mwenyezi Mlungu ni ra kpweli na kazize zosi nkuzihenda kpwa uaminifu.

⁵Mwenyezi Mlungu anamendza haki na uamuli wa haki, dunia ikaodzala mendzwaye isiyosika.

⁶Kpwa neno ra Mwenyezi Mlungu, mlunguni kpwaumbwa, na vyosi virivyo mumo kpwa pumuzi ya kanwaye.

⁷Wakusanya madzi ga bahari achigaikira miphaka na vivwa achivifungira seemuye.

⁸Dunia yosi naimuogophe Mwenyezi Mlungu! Atu osi duniani na amuishimu.

⁹Ariphogomba dunia yaumbwa aripholavya amuri chila chitu chichitsembuka.

¹⁰Mwenyezi Mlungu nkubananga mipango ya mataifa ganjina na kuzuwiya mipango ya atu isikale.

¹¹Ela mipango ya Mwenyezi Mlungu inadumu hata kare na kare malengoge ganaenderera hata kare na kare.

¹²Baha taifa ambaro Mlunguwe ni Mwenyezi Mlungu, atu ambao Mlungu akaatsambula ili akale urisiwe.

¹³Mwenyezi Mlungu analola photsi kula mlunguni, na anaona anadamu osi.

¹⁴Iye analola osi asagalao duniani kula hipho asegerepho kpwenye chihiche cha utawala.

¹⁵Iye watengeza mioyo yao osi, kpwa hivyo anaelewa mahendo gao gosi.

¹⁶Mfalume kativywa kpwa sababu ana jeshire kulu, na sujaa kativywa kpwa kukala ana nguvu nyinji.

¹⁷Kukuluphira farasi wa viha kureha ushindi takufwaha, dzagbwe ana nguvu nyinji kaweza kutivya mutu.

¹⁸Ela matso ga Mwenyezi Mlungu ganalola hinyo anaomuogopha, hinyo anaokuluphira mendzwaye isiyosika,

¹⁹ili aativye na chifo na kuaika moyo wakati wa ndzala.

²⁰Mioyo yehu inamkuluphira Mwenyezi Mlungu, iye ndiye msada wehu na ngao yehu.

²¹Ee, mioyo yehu inahererwa kpwa sababuye, mana hunakuluphira dzinare takatifu.

²²Hujaliye mendzwayo isiyosika, ee Mwenyezi Mlungu mana swino hunakukuluphira uwe.