Read digo Zaburi 34 Bible Online

Zaburi 34 - digo bible

Zaburi 34

¹Wira wa Daudi ariphodzihenda ana koma mbere za mfalume Abimeleki, wamzola na Daudi achiphiya vyakpwe. Nindamshukuru Mwenyezi Mlungu chila wakati ndamtogola siku zosi.

²Nindadzikarya kpwa go ambago Mwenyezi Mlungu akahenda, osi agayao naasikire na ahererwe!

³Ayangu, nahumupheni nguma Mwenyezi Mlungu nahutogole dzinare phamwenga.

⁴Mino námvoya Mwenyezi Mlungu, na achinijibu, achinikombola na gosi nrigokala ni muoga nago.

⁵Anaomlola iye, nyuso zao nkungʼala kpwa furaha namwi tamundaifika bii.

⁶Mgayi achimvoya Mwenyezi Mlungu, iye nkumsikira na akamtivya na tabuze zosi.

⁷Malaika wa Mwenyezi Mlungu nkurinda hinyo amuogophao na akaativya.

⁸Tatani muone vira Mwenyezi Mlungu arivyo mnono. Baha mutu anayemchimbirira iye.

⁹Ogophani Mwenyezi Mlungu mwi atakatifue, mana hinyo amuogophao taandatsowekpwa.

¹⁰Simba enye nguvu anaweza kukosa chakurya akahirika na ndzala, ela hinyo amuendzao Mwenyezi Mlungu taatsowa chochosi chinono.

¹¹Hebu ndzoni mniphundze anangu nami ndakufundzani kumuogopha Mwenyezi Mlungu.

¹²Dze, unaaza kuishi maisha mare na ga kuongokerwa?

¹³Phahi richa kugomba mai na usikale mutu wa handzo.

¹⁴Richa mai, uhende manono, endza amani na usiiriche.

¹⁵Matso ga Mwenyezi Mlungu ganalola ahendao haki, na masikiroge ganaphundza chiriro chao.

¹⁶Uso wa Mwenyezi Mlungu u chinyume cha ahendao mai, ili aahende asitambukirwe tsona duniani.

¹⁷Atu a haki achimvoya Mwenyezi Mlungu nkuasikira na nkuativya na tabu zao zosi.

¹⁸Mwenyezi Mlungu a phephi na chiyekuluhukpwa na nkumtivya hiye ambaye akavundzika moyo.

¹⁹Dzagbwe mutu ariye na haki nkuphaha mateso manji, ela Mwenyezi Mlungu nkumtivya nago gosi.

²⁰Tsona nkutundzato vilungo vyosi vya mwiriwe, usivundzike hata mfupha mmwenga.

²¹Uyi undaasukumiza chifoni aviha azirao atu a haki andaharirwa kukala ana makosa.

²²Mwenyezi Mlungu anativya maisha ga atumishie, takuna hata mmwenga wa hinyo achimbirirao urindzi wa Mlungu ndiyeharirwa kukala ana makosa.