Read digo Zaburi 37 Bible Online

Zaburi 37 - digo bible

Zaburi 37

¹Zaburi ya Daudi. Usibabaishwe ni atu ayi, usionere wivu atu ahendao makosa.

²Mana andanyala upesi dza nyasi na aume upesi dza mimea.

³Mkuluphire Mwenyezi Mlungu na uhende manono, ili uishi salama kpwenye yo tsi na uongokerwe.

⁴Hererwa kahi ya Mwenyezi Mlungu naye andakupha unagoaza mwako moyoni.

⁵Mrichire Mwenyezi Mlungu njirazo zosi, mkuluphire iye naye andakuhendera.

⁶Andahenda hakiyo ingʼale dza mwanga wa ligundzu na uamulio wa haki dza dzuwa ra lihosini.

⁷Hurira mbere za Mwenyezi Mlungu, mgodze na uvumirire, usibabaishwe ni iye ambaye njiraze zinaongokerwa, wakati anahenda mipangoye mii.

⁸Usireye wala kukala na tsukizi usibabaike sedze ukahenda mai.

⁹Mana atu ahendao mai andaangamizwa, ela anaomkuluphira Mwenyezi Mlungu andarisi tsi.

¹⁰Bada ya muda mfupi atu ahendao mai taandakalapho tsona hata ukaaendza hipho akalapho, kundaaona.

¹¹Ela hinyo anaogbwa maguluni andarisi tsi, nao andasagala kpwa amani na aongokerwe.

¹²Mutu ahendaye mai nkumpangira njama mbii mutu wa haki na kumkundzira uso kpwa kummena.

¹³Ela Mwenyezi Mlungu anamtseka hiye muhenda mai mana anamanya sikuye iredza.

¹⁴Atu ahendao mai anatuluza panga zao na kuphinda maha gao aolage agayi na achiya, atsindze hinyo anaohenda garigo sawa.

¹⁵Ela panga zao zindadunga mioyo yao enye na maha gao gandavundzwa.

¹⁶Baha chidide aricho nacho mutu wa haki kuriko utajiri wa atu anji ahendao mai.

¹⁷Mana nguvu ya ahendao mai indauswa ela Mwenyezi Mlungu andaroroma enye haki.

¹⁸Mwenyezi Mlungu anamanya hesabu ya siku za uhai wa hinyo asio na makosa, na andarinda urisi wao ukalepho hata kare na kare.

¹⁹Taandagaya wakati wa mashaka, na wakati wa ndzala andakala na chakurya cha kukola.

²⁰Ela ahendao mai andaangamika. Maadui ga Mwenyezi Mlungu ni dza maruwa ga weruni, gandanyala ee gandaangamika dza mosi.

²¹Mutu mui nkuaphasa na kuripha, ela enye haki nkulavya na moyo mmwenga.

²²Mana ariojaliwa ni Mwenyezi Mlungu andarisi tsi, ela ariolaniwa ni Mwenyezi Mlungu andaangamizwa.

²³Mwenyezi Mlungu nkulongoza hatuwa za mutu, ambaye njiraze zinamhamira,

²⁴hata achikpwala kandagbwa mana Mwenyezi Mlungu andamgbwira mkpwono.

²⁵Hangu ni mdide hata vino nkatsakala sidzangbweona mwenye haki akarichwa ni Mlungu wala anae anavoya-voya chakurya.

²⁶Wakati wosi analavya moyo mmwenga na kuaphasa anjina na anae andakala baraka.

²⁷Richa uyi uhende manono nawe undasagala kpwenye yo tsi hata kare na kare.

²⁸Mana Mwenyezi Mlungu anamendza uamuli wa haki, naye kandaricha atakatifue. Enye haki andaroromwa hata kare na kare ela chivyazi cha ahendao mai chindaangamizwa.

²⁹Atu a haki andamiliki tsi na kusagala mumo hata kare na kare.

³⁰Kanwa ya mutu wa haki igomba ikima na lilimire rigomba uamuli wa haki.

³¹Shariya ya Mlunguwe i mwakpwe moyoni wala karicha kuilunga.

³²Mutu mui anamuoteya mwenye haki, kpwa kuendza njira za kumuolaga.

³³Ela Mwenyezi Mlungu kandamricha mwakpwe mikononi wala kandaricha mwenye haki ahukumiwe kukala ni mkosa ndiphoshitakiwa.

³⁴Mgodze Mwenyezi Mlungu na ugbwire njiraze, naye andakuunula na akuhende umiliki tsi, nawe undashuhudiya atu ayi achiangamizwa.

³⁵Siku mwenga naona mutu mui na katili anawanda dza muhi wa muerezi wa Lebanoni,

³⁶badaye nátsupa tsona na phapho ela achikala kapho! Námuendza ela wapi, siyamuona.

³⁷Chunguza mutu asiye lawama, na mutu wa haki mana mutu amendzaye amani chivyaziche nkpwenderera.

³⁸Ela enye dambi osi andaangamizwa na chivyazi cha atu ai tachindaenderera.

³⁹Wokofu wa enye haki ni Mwenyezi Mlungu, iye ndiye chimbiriro rao wakati wa shida.

⁴⁰Mwenyezi Mlungu nkuaterya na kuakombola, nkuakombola na atu ahendao mai na kuativya kpwa sababu anamchimbirira iye.