Read digo Zaburi 38 Bible Online

Zaburi 38 - digo bible

Zaburi 38

¹Zaburi ya Daudi, sadaka ya kumuhenda atambukirwe. Ee Mwenyezi Mlungu usinidemurire kuno ukareya usinitiye adabu kuno ukatsukirwa!

²Mana miviyo ikanidunga na mkpwonoo ukanifyeha.

³Mwiri wangu sio mzima tsona kpwa sababu ukanireyera nkakala mnyonje kpwa sababu ya dambi yangu.

⁴Mana makosa gangu gakanizidi gananiremerera dza mzigo mziho nsiouweza.

⁵Kpwa sababu ya uzuzu wangu vironda vyangu vikaola na vinanuka.

⁶Nkazamiswa na nkabwagbwa photsi mutsi wosi naangaika na sonono.

⁷Vilungo vyangu vinaaka moho mwiri wangu tauna uzima.

⁸Nkalela na kuvundzika moyo ninaula kpwa sonono ya moyo.

⁹Ee Mwenyezi Mlungu, gosi niazago unago mseho wangu sio siri kpwako.

¹⁰Moyo wangu unaphiya mairo, nami sina mkpwotse, hata matso gangu piya tagaona vinono.

¹¹Asena angu na ayangu akanitenga kpwa sababu ya mateso gangu abari angu piya a kure nami.

¹²Alondao kuniolaga akanihegera mihego, anaolonda nrumire anapanga kuniangamiza mutsi wosi anapanga handzo.

¹³Ela ni dza masito, sisikira dza mutu ariye bwibwi asiyeweza kugomba rorosi.

¹⁴Nkakala dza mutu asiyesikira, na ambaye kanwaye taiweza kujibu.

¹⁵Ela nakugodzera, ee Mwenyezi Mlungu, uwe Mwenyezi Mlungu, Mlungu wangu ndiwe ndiyenijibu.

¹⁶Navoya tu usiriche maadui gangu gakanifyorera usiriche gakahamirwa kpwa kuona nkashindwa.

¹⁷Mimi ni phephi sana na kugbwa, nasikira maumivu wakati wosi.

¹⁸Nakubali uyi wangu, ninasononeka kpwa sababu ya dambi yangu.

¹⁹Maadui gangu manji gana nguvu, na anaonimena bila sababu ni anji.

²⁰Aho nrioahendera manono ananiripha mai kpwa sababu mino nalunga kuhenda manono.

²¹Usiniriche, ee Mwenyezi Mlungu, usikale kure nami, ee Mlungu wangu.

²²Henda wangbwi wedze uniterye, ee Mwenyezi Mlungu, muokoli wangu.