Read digo Zaburi 45 Bible Online

Zaburi 45 - digo bible

Zaburi 45

¹Kpwa chilongozi wa aimbadzi. Wira wa mendzwa wa atu a chivyazi cha Kora. Wira wa harusi. Moyo wangu ukaodzala maazo manono, nami namtungira mfalume wira wangu; lilimi rangu ni dza kalamu ya mutu amanyaye kuandika vinono.

²Uwe u mnono kuriko anadamu osi; maneno ga mbazi nkutuluka kula mwako kanwani, kpwa mana Mlungu wakubariki hata kare na kare.

³Tsomeka upangao chibiruni, uwe sujaa, mana una nguma na utukufu.

⁴Kahi ya ngumayo, sengera mbere ili uphahe ushindi; enderera kuhehera kpweli, upole na haki, na mkpwonoo wa kulume naukuhendere makulu.

⁵Miviyo iryayo naidunge mioyo ya maadui ga mfalume, na atu a mataifa naagbwe phako maguluni.

⁶Chihicho cha chifalume, uwe Mlungu, chindasala hata kare na kare, na utawalao ni wa haki.

⁷Uwe unamendza gara garigo manono, na kuzira gosi garigo mai. Kpwa hivyo Mlungu, Mlunguo, akakumwagira mafuha, ga kukuhenda uhamirwe kpwa kukuhenda mkpwulu kuriko ayao osi.

⁸Mavwazigo gananuka marashi ga manemane, udi na mdalasini. Kpwenye madzumba gopambwa na pembe za ndzovu mawira ganaimbwa kuhumira ngephephe na ganakuhenda ukale na raha.

⁹Ana achetu a afalume ni kahi ya hinyo anaokuchinjira, naye Malikia aimire uphandeo wa kulume, akavwala mapambo ga zahabu swafi kula tsi ya Ofiri.

¹⁰Sikiza mwanangu mchetu, hega sikiroro, tsona uririkane! Yala atuo na abari a sowe,

¹¹naye mfalume andahamirwa ni unonoo, muishimu kpwa kukala iye ndiye bwanao.

¹²Atu a mudzi wa Tiro[8] andakurehera zawadi, matajiri andadzipendekeza kpwako.

¹³Mwana mchetu wa mfalume, anagodzera mwakpwe chumbani. Vwazire rashonwa na nyugbwe za zahabu,

¹⁴analongozwa kuphiya kpwa mfalume, kuno akavwala ro vwazire. Anasindikizwa ni vyandamavye.

¹⁵Anainjira dzumba ra mfalume, kuno akahererwa na anapiga njerejere.

¹⁶Anao andakala afalume dza arivyokala akareo, undaahenda atawale duniani kosi.

¹⁷Nindahenda dzinaro ritambukirwe kahi za vivyazi vyosi, nago mataifa gandakutogola hata kare na kare.