Read digo Zaburi 48 Bible Online

Zaburi 48 - digo bible

Zaburi 48

¹Wira. Zaburi ya atu a chivyazi cha Kora. Mwenyezi Mlungu ni mkpwulu na anafwaha kutogolwa, kpwenye mudziwe urio kpwenye mwangowe mtakatifu.

²Ni mure na ni mnono atu a dunia yosi awoonapho anahamirwa. Mwango wa Sayuni, mudzi wa Mfalume mkpwulu, ni dza virere vya mwango Zafoni.[9]

³Kahi za ngomeze, Mlungu akadzionyesa kukala iye ndiye mrindzi.

⁴Mana afalume na majeshi gao gagbwirana achiandza kushambuliya mwango Sayuni.

⁵Ela ariphouona aangalala achigbwirwa ni wuoga, na achichimbira.

⁶Achiandza kukakama phapho kpwa wuoga, achikala na utsungu dza wa mchetu ariye phephi na kudzivugula.

⁷Uwe waavundza-vundza dza meli za Tarishishi zopigbwa ni phuto ra mlairo wa dzuwa.

⁸Go hurigosikira, ndigo huchigoona kpwenye mudzi wa Mwenyezi Mlungu, Mlungu wa majeshi, kpwenye mudzi wa Mlungu wehu ambao mwenye nkuuhenda ukale salama hata kare na kare.

⁹Himo ndani ya nyumba ya kuvoya Mlungu hukaririkana kuhusu mendzwayo isiyosika, ee Mlungu.

¹⁰Dza viratu dzinaro rinavyotogolwa chila phatu, ee Mlungu sifwazo zikagota pembe zosi za dunia na mkpwonoo wa kulume ukaodzazwa haki.

¹¹Atu a Sayuni naahamirwe! Atu a Juda naahererwe kpwa sababu ya uamulio wa haki!

¹²Nyendekani, zungulukani Sayuni yosi muolange minaraye,

¹³Zitundzeni vinono kutaze na ngomeze mziloleto mphahe kusemurira vivyazi vyedzavyo,

¹⁴kukala yuyu ni Mlungu, Mlungu wehu hata kare na kare. Andakala chilongozi wehu hata kare na kare.