Read digo Zaburi 49 Bible Online

Zaburi 49 - digo bible

Zaburi 49

¹Kpwa chilongozi wa aimbadzi. Zaburi ya ana a Kora. Phundzani higa, mwimwi atu a mataifa gosi, hegani masikiro mwi mosi msagalao mumu duniani.

²Phundzani mosi, avyere kpwa adide tajiri na achiya osi phamwenga.

³Kanwa yangu indagomba maneno ga ikima maazo ga moyo wangu gandalavya kuelewa.

⁴Mimi nindahega sikiro nisikize msemo na nvugule mana ya fumbo kutsupira ngephephe.

⁵Kpwa utu wani niogophe wakati wa tabu, wakati uyi wa anaonigayisa ukanizunguluka,

⁶aho akuluphirao mali zao na kudzikarya kpwa sababu ya utajiri wao?

⁷Hakika takuna mutu awezaye kudzikombola mwenye[10] au kumripha Mlungu mzamana ili akale moyo.

⁸Mana garama ya maisha ga mutu ni kulu sana, mutu kaweza kuripha chochosi chikatosha,

⁹kumuhenda aenderere kukala moyo hata kare na kare bila ya kuona kaburi.

¹⁰Osi anamanya kukala hata mutu wa ikima nkufwa, apumbavu na azuzu nao piya nkufwa na kurichira atu anjina mali zao.

¹¹Mbira zao ndizo nyumba zao hata kare na kare ndigo makalo gao chivyazi bada ya chivyazi, dzagbwe kala ana minda yoipha madzina gao enye.

¹²Ela anadamu, phamwenga na utajiri wao, kandadumu, andafwa tu dza nyama.

¹³Higa ndigo gaafikago anaodzikuluphira, ndio mwisho wa hinyo atoshekao na misemo yao enye.

¹⁴Andaphirikpwa kuzimu dza mangʼondzi, chifo chindakala avi ni mrisa wao, andatserera mbirani mwenga kpwa mwenga,[11] miri yao indaola kuko, kuzimu kundakala makalo gao.

¹⁵Ela Mlungu andanikombola, andanitivya na nguvu za kuzimu, mana andaniphokera.

¹⁶Usiogophe uchiona mutu anatajirika, na maliye ya nyumbaye ichienjerezeka.

¹⁷Mana achifwa kandatsukula chochosi, malize tazindatserera kuzimu phamwenga naye.

¹⁸Dzagbwe wakati anaishi nkudziharira kukala ana baha, na kulikpwa ni atu, wakati anaphoongokerwa.

¹⁹Achifwa andadziunga na akaree ambako taandaona mwanga tsona.

²⁰Mwanadamu ambaye ni tajiri ela kana ufahamu, anafwa dza nyama.